ख्रिश्चन गाणी

गाणे 78 मंगल चिंतन, मंगल दर्शन गाण्याचे बोल

मंगल चिंतन, मंगल दर्शन,
मंगल तव गुणगान,
मंगल सेवा, मांगल्याचें,
देवा, तूंच निधान ! -१

अंतर्यामीं, खालीं, वरतीं,
मागें, पुढतीं उर्मी,
प्रेमसागरा तुझ्या, खेळती
मीन त्यांतले आम्ही -२

हें तृण, हे तरु, हे गिरि,
हे नभ, विश्व दिसें, न दिसे तें
त्या प्रेमाच्या मधुलहरींनीं
थबथबलेलें नुसतें ! -३

मी तव, माझें गान तुझें,
हें ऐकणार जे तेही
तुझेच, देवा ! तुझेंच तूं
हें सांभाळुनियां घेई -४

राज्य तुझें, तव महती अवघी,
बल, विक्रम तव, देवा !
एक सुखद अधिकार आमुचा,
कीं करिजे तव सेवा !-५