ख्रिश्चन गाणी

गाणे 159 चला सिद्ध व्हा, या समरा गाण्याचे बोल

चला सिद्ध व्हा, या समरा !
जयघोष करा, जयघोष करा
करा त्वरा रे, करा त्वरा,
जयघोष करा, जयघोष करा !

ढाल करीं घ्या विश्वासाची,
कट्यार घ्यारे प्रभुवचनाची,
खरेपणें बांधा कमरा,
जयघोष करा, जयघोष करा !

उरस्त्राण नीतीचें घाला,
चढवा तारण ह्या टोपाला,
प्रभुप्रीतीचा ध्वज उभारा,
जयघोष करा, जयघोष करा !

मोहपाप, दु:खादिक शस्त्रां
मोडा, तोडा या मरणास्त्रां
पराभूत सैतान करा
जयघोष करा, जयघोष करा !

ख्रिस्तपदांवर आणून घाला
दुरावलेल्या नरनारींला,
वसुंधरासंताप हरा,
जयघोष करा, जयघोष करा !

प्रसंग पडला जाणुन बांका,
दिवस असे तो झुंजा, जिंका !
प्रभु अपुला तरि विजय खरा,
जयघोष करा, जयघोष करा !

हृदयीं, इकडें, तिकडे, पुढतीं,
मागें, खालीं, किंवा वरतीं,
ख्रिस्त उभा हा भाव धरा,
जयघोष करा, जयघोष करा