ख्रिश्चन गाणी

गाणे 80 माझ्या प्रभूला ठेवियेलें कोठें गाण्याचे बोल

 

माझ्या प्रभूला ठेवियेलें कोठें
माळी दादारे, माळी दादा ? -ध्रु

क्रूर जनांनीं त्याला मारीयेलें,
ह्याच थडयांत त्याला ठेवीयेलें,
काल शब्बाथिं येणें नाहीं झालें, झालें -१

पाहूं गेलें रे थडयांमधीं जेव्हां,
प्रेतवस्त्रें व दूत होती तेव्हां,
प्रिय माझा तारक नेला केव्हां, केव्हां -२

दिव्य गौरव सोडुनीया आला,
श्रेष्ठ असूनी फार लीन झाला,
प्राण अर्पीला जन तारायाला, याला -३

मोठ्या पहाटिं उठलें रे आज,
आलें करुनि सारें कामकाज,
कधीं भेटेल माझा महाराज, राज -४

तेल सुगंधी आणिलें रे भाऊ,
आतां कोणाला लावायाला जाऊं
सांग त्याला मी कुणिकडे पाहूं, पाहूं ?- ५

आहा सद्गुरुविण सारें कडू,
कोण उध्दरि कोणाआड दडूं
डोळे शिणले माझे रडूं, रडूं, रडूं -६

माळी बोले, का रडतेस बाई,

कोणा शोधिसि फार घाई घाई ?
मार्या बोले, मी करुं गत काई, काई ?-७

तेव्हा माळी बोलला, ‘अगे मार्या !
मार्या ओळखूनि म्हणे, ‘गुरुवर्या’
भेट होतांच म्हणे ना ‘मार्या, मार्या ! -८

प्रभु आग्रह, प्रीति, भाव पाही,
देई अशांस भेट लवलाही,
अशा शोधांत मन माझें राही, राही -९