ख्रिश्चन गाणी

गाणे 207 नक्षत्रांसम हे कोण प्रभूदरबारीं गाण्याचे बोल

 

नक्षत्रांसम हे कोण प्रभूदरबारीं
शोभती तयांच्या शिरीं मुकुट सोनेरी- ध्रु

वैभवशाली ही असे कुणाची सेना
स्वर्गीय आपुल्या राजाच्या करि स्तवना
तेजानें तळपत कोण दिपविती नयनां
हे उभे समोरी धवल घालुनी वसना

धन्य धन्य हे म्हणताती, ईश्वरा
प्रिय जनांस जो नच देई, अंतरा
एक जो अखिल सृष्टीचा, आसरा

कालाचा निर्दय हात प्रभूजी वारी
कांति सदा ठेवी अजरामर चदेरी

हेच ते जयांनीं गौरविलें प्रभुनामा
निशिदिनीं गाउनी निज त्रात्याचा महिमा
इहलोकिं कंठिलें जीवन झगडुन ज्यांनीं
पातकी जनांच्या मार्गी नच जाऊनी

रणधीर विर विजयी हे, शोभले
अति दु:ख, कष्ट प्रभुसाठीं, साहिले
गौरवून देवा यांनी, प्रार्थिलें

घनघोर लढा मग संपत जीवनसमरीं
प्रभु पुसून अश्रू सारें दु:ख निवारी

याजकांपरी हे सदा सिद्ध सेवेला
सर्वशक्‍ति प्रभुची संतांची प्रिय माला
तनु तसेंच मन हे वाहति प्रभुच्या चरणीं
पाळण्यास आज्ञा उभे हात जोडूनी

घेती रात्रंदिन त्याच्या, दर्शना
सादर प्रभुपदिं करताती, प्रार्थना
सौख्यास तयांच्या तेथें, अंत ना

प्रभुश्रेष्ठ मंगल प्रभुनामाच्या गजरीं
आशीर्वादित ते प्रियतम प्रभुच्या द्वारीं