Nziyo Dzekereke RCZ hymnal

Hymn 305 Chirayiro Chashe Lyrics

 

1
Vadikanwa muna Jesu Kristu, inzwai mashoko okuvambwa kweChirayiro chaShe Jesu
Kristu, sezvatinoudzwa nomupostori Pauro patsamba yake kuna vaKorinte panoti:
“Nokuti ini ndakagamuchira kuna Ishe chiya chandakakupaiwo imi, chokuti Ishe
Jesu pausiku huya hwaakapandukirwa, wakatora chingwa, akavonga,
ndokuchimedura, akati: Uyu ndiwo muviri wangu wamunomedurirwa imi; itai
izvozvo kuti mundirangarire nazvo. Saizvozvowo, vakazoti vapedza kurayira,
wakatora mukombe akati: Mukombe uyu ndicho chitenderano chitsva muropa rangu;
itai izvozvi chero nguva dzamunenge muchidya chingwa ichi, muchinwira
mumukombe uyu, munoparidza rufu rwaShe kudzamara achiuya. Saka munhu anenge
achidya chingwa ichi kana kunwira mumukombe waShe nenzira isina kufanira,
achava nemhosva yomuviri neropa raShe. Asi munhu ngaazvinzvere agozoti odya
chingwa nokunwira mumukombe nenzira iyi. Nokuti munhu, anodya asinganatsi
kuzivisisa muviri waShe, anozvidyira nokuzvinwira kutongwa.

Zvino kana tichida kudya Chirayiro chaShe nomutoo kwawo tinofanira
kuzvigadzidzirira kwazvo, tigoziva kuzvininipisa pamberi paMwari. Pakutanga
mumwe nomumwe ngaarangarire mumwoyo make kuti, ndine zvivi, aone kuipa kwazvo,
agoziva kuzvininipisa pamberi paMwari. Uyezve, mumwe nomumwe ngaazvinzverewo
mumwoyo make, aone kuti, ndinotenda zvirokwazvo here kuti zvivi zvangu zvose
zvakakanganwirwa nokuda kwokutambura kwaJesu Kristu, uye nokufa kwake, ini
ndichipiwa kururama kwose kwaKristu.Mumwe nomumwe ngaanzverewo hana yake, aone
kuti, ndinoda kuonga Mwari nomwoyo wangu wose here ndichifamba nomufambire
wakarurama pamberi pake, nokuda vokwangu norudo kwarwo, ndichirasha ruvengo
rwose negodo.

Vose vane mirangariro yakadai zvirokwazvo Mwari anoda kuvagamuchira nenyasha
dzake, nokuvatendera kuti vadye patafura yoMwanakomana wake anodikanwa. Asi
vose vasina mirangariro yakadai vanozvidyira nokuzvinwira kurohwa. Ndivava
vorehwa zvino: vanopira zvifananidzo nemidzimu yavo, kana zvimwe zvinhu,
navaroyi, navauki, navashoperi, navanotenda izvozvi; vose vanoninipisa Mwari
neShoko rake neSakramende dzake tsvene; vose vanomhura Mwari, navanoidza
kumukira kereke kana vabati venyika, vose vanopika nhema, vose vasingatereri
vakuru vavo kana madzishe, vaurayi vose, uye vose vanogara vachivengana
nokutukana navamwe; vose vanoita upombwe, navanokarira doro, navabi,
namakororo, navanyengeri, navanoshumba zvavamwe, navanotamba mitambo yakaipa,
navanonyangadza vachigumbusa vamwe, vanhu vose vakadai, kana vachirambira
panzira dzavo, tinovanyevera kuti varege kudya zvokudya izvi, kuti kurohwa
kwavo kurege kunyanyiswa.

Asi izvi zvose, vadikanwa, ngazvirege kuodza mwoyo yavatendi vezvokwadi,
kubvira vaya vane mwoyo yakapwanyika nokuda kwokusakwana kwavo. Kuuya kwedu
pano ndiko kupupura kwedu kuti anongosichema zvivi zvedu, tichirwa nazvo misi
yose. Asi tinotenda kuti anotigamuchira hake nenyasha dzake, kunyangwe tisina
kukwana chose. Zvino Ishe wedu Jesu Kristu wakatirayirawo kuti tidye Chirayiro
chake, kuti timurangarire nazvo.Pakurangarira Jesu Kristu ngatitende nomwoyo
wedu wose kuti wakatumwa panyika naMwari Baba nokuda kwedu, akauya ari munhu
zvirokwazvo; paupenyu hwake hwose hwapano pasi wakatitakurira kutsamwa
kwaMwari, akaterera murayiro wose pachinhambo chedu; nokuti paGetsemani
wakasungwa iye, kuti isu tisunungurwe; akanyadziswa iye, kuti isu tirege
kuzonyara pamberi paMwari, akatongerwa rufu iye, kuti isu tisapiwa mhaka
pamberi pechigaro chokutonga chaMwari, akazoroverwa pamuchinjikwa iye kuti isu
tidzimirwe mhosva dzedu, ndokuzotivigira Chitenderano Chitsva chenyasha
nechokuyananiswa, zvichiitwa norufu rwake uye neropa rake.

Zvino nguva imwe neimwe kana tichidya Chirayiro ngatirangarire kuti
tinongoponeswa koga nokubayirwa kwakaitwa Jesu Kristu pamuchinjikwa kamwe;
saka nzara nenyota yemweya yedu zvingangopedzwa naiye oga. Wakabvisa zvivi
zvedu norufu rwake, akativigira Mweya wake Mutsvene anotiraramisa nanhasi.
Nairwo rufu rwakezve takayananiswa naMwari, tikapiwa mikomborero yake yose,
noupenyu husingaperi, nokururamiswa, uye isu vatendi tinosunganidzwa norudo
chairwo, zvatiri mitezo yomuviri mumwe, zvichionekwa pamashoko edu
nepamifambire yedu yose.
Mwari Baba vaShe wedu Jesu Kristu ngavatibatsire noMweya Mutsvene.

**Munyengetero**

Baba vedu venyasha, tinokumbira kuti mubate basa renyu mumimwoyo yedu,
neChirayiro ichi choMwanakomana wenyu; kuti tizvipe kwaari nokutenda kwose;
mweya yedu isimbiswe nomuviri wake neropa rake. Mutibetsere kuti tirege
kurambira muzvivi zvedu, asi Jesu agare matiri, nesuwo tigare maari. Tipei
nyasha dzenyu, kuti titakure muchinjikwa wedu nomufaro; tizvirambe;
tichingotarira kudzoka kwaShe wedu Jesu Kristu kusvikira nguva yaachazotitora
kuti tigare naye nokusingaperi.

_Mufundisi achimedura chingwa achati:_

Jesu wakati: Chingwa ichi ndiwo muviri wangu, wamunomedurirwa imi, idyai mose,
muchindirangarira.

_Kana Mufundisi achivapa mukombe achati:_

Jesu wakati: Mukombe uyu ndicho chitenderano chitsva muropa rangu; inwai mose
muchindirangarira.

_Kana Chirayiro chapera kudyiwa mufundisi achati:_

Vadikanwa muna Ishe, Mwari zvaakasimbisa Mweya yedu patafura yake, ngatikudzei
tose zita rake, tichimuvonga; mumwe nomumwe abvumire mashoko aya mumwoyo make:
Rumbidza Jehova, mweya wangu,
Zvose zviri mukati mangu,
Ngazvirumbidze zita rake dzvene.
Rumbidza Jehova, mweya wangu,
Urege kukanganwa mikomborero yake;
Iye anokanganwira zvakaipa zvako zvose;
Anoporesa kurwara kwako kwose;
Anodzikinura upenyu hwako pakuparadzwa;
Anokuisa korona younyoro nengoni;
Jehova ane tsitsi nenyasha,
Haachimbidziki kutsamwa, ane ngoni zhinji.
Haana kutiitira sezvakafanira zvivi zvedu,
Kana kutipa mubayiro sezvakafanira zvakaipa zvedu.
Nokuti sokukwirira kwokudenga kumusoro,
Ndizvo zvakaita kukura kwengoni dzake kuna vanomutya.
Sokuva kure kwamabvazuva namavirira,
Saizvozvo wakabvisa kudarika kwedu kwose kure nesu.
Sokunzwira tsitsi kwababa vana vavo,
Naizvozvo Jehova anonzwira tsitsi vanomutya.

Nokuti haana kuramba kunyangwe noMwanakomana wake asi wakamupa chose nokuda
kwedu tose; angarega seiko kutipawo zvose pamwe chete naye? Saizvozvo Mwari
wakaratidza rudo rwake kwatiri pakuti Kristu wakatifira tichiri vatadzi.
Zvatakayananiswa naMwari nokufa kwoMwnakomana wake, tichiri vavengi vake,
tichinyanya kuponeswa noupenyu hwake, zvino zvatakayananiswa. Saka muromo
wangu nomwoyo wangu zvicharumbidza Mwari, kubva zvino Hokusingaperi.