Lisu Christian Hymnal
Hymn 50 ꓠꓲꓹ ꓗꓴ ꓟꓬ ꓗꓴ ꓘꓶꓽ Lyrics
ꓠꓴ ꓪ ꓠꓲꓹ ꓟ ꓕꓽ ꓙꓽ ꓫ꓿ ꓪꓴ-ꓢ ꓔꓯ ꓙꓵꓻ꓾ ꓥꓪ ꓔꓯˍ ꓟꓲ ꓙꓵꓻ꓿
ꓥꓪ ꓐꓹ ꓐ ꓦꓲ ꓗꓪ ꓔꓬ ꓖꓴ ꓮ ꓟꓬ ꓙꓳˍ ꓡꓳ꓿ ꓟꓽ ꓙꓳ ꓕꓯ ꓠꓽ꓾ ꓥꓪ ꓠꓴ ꓪ ꓔꓯ ꓧꓶ ꓕꓯˍ ꓡꓰ ꓐꓯ ꓖꓶˍ ꓡꓳ ꓫꓵꓽ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓴ ꓪ ꓐꓱ ꓶ ꓔꓬ ꓖꓴ ꓫꓬ, ꓖꓶꓽ ꓐꓰ ꓙꓰˍ ꓡꓳ꓿
ꓥꓪ ꓙꓰ ꓢꓲ꓾ ꓠꓴ ꓪ ꓐꓱ ꓶ ꓔꓬ ꓖꓴ ꓫꓬꓹ ꓓꓳ ꓡꓰ ꓠꓬ꓾ ꓥꓪ ꓝꓮꓲ ꓕꓲꓽ ꓧꓪꓹ ꓡ ꓢꓲ꓾ ꓠꓴ ꓪꓽ ꓔꓯ ꓘꓳ ꓣꓴ ꓢꓲ ꓠꓬꓲ꓾ ꓥꓪ ꓮ ꓡꓲ ꓗꓪ ꓔꓬ ꓠꓬ꓾ ꓠꓴ ꓪ ꓔꓯˍ ꓟꓲ ꓖꓳ ꓗꓪ ꓔꓬ ꓝꓲˍ ꓥꓳ꓿
ꓥꓪ ꓙꓰˍ ꓟ ꓙ ꓖꓴ ꓠꓴ ꓪ ꓢꓷˍ ꓡꓳ꓾ ꓐꓯˍ ꓡꓳ꓿
ꓕꓳ-ꓟ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓠꓴ ꓮ ꓡꓲ ꓗꓪ ꓙꓰˍ ꓟ ꓥꓪ ꓠꓴꓽ ꓟꓽ ꓢꓷ꓿ ꓙ ꓖꓴ ꓥꓪ ꓠꓴꓽ ꓮ ꓡꓲ ꓢꓷ ꓢꓰ꓾ ꓐꓯˍ ꓡꓳ꓿
ꓬꓰ-ꓢꓴ ꓡꓰ ꓬꓲ ꓔꓯ꓾ ꓙ ꓖꓴˍ ꓐꓰ ꓔꓱꓹ ꓚꓵꓺˍ ꓟ ꓐꓰ ꓢꓯꓼ ꓟꓬ ꓠꓬ ꓥꓪ ꓥ ꓡꓳ꓿ ꓥꓪ ꓗꓪ ꓐꓰ ꓟꓽ ꓥ ꓠꓬ꓾ ꓐꓹ ꓐ ꓔꓯ ꓡ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳꓻ꓿
ꓠꓴ ꓪꓽ ꓥꓪ ꓔꓯ ꓢꓷꓸˍ ꓕꓯ ꓠꓽ꓾ ꓥꓪ ꓐꓹ ꓐ ꓔꓯˍ ꓟꓲ ꓢꓷ ꓡꓳ ꓫꓵꓽ ꓥ ꓡꓳ꓿ ꓕꓱ ꓡꓱ ꓖꓳ ꓑꓳ. ꓠꓴ ꓪꓽ ꓬꓲ ꓔꓯ ꓢꓷˍ ꓟꓲ ꓢꓷꓸˍ ꓡꓳ꓾ ꓟꓳˍ ꓟꓲ ꓟꓳ ꓠꓬꓲꓳ꓾ ꓐꓯ ꓡꓳ꓿
ꓒꓲꓹ-ꓡꓲꓽ ꓡꓰ ꓬꓲ ꓔꓯ꓾ ꓢꓲꓺ ꓒꓽꓳ꓾ ꓐꓹ ꓐ ꓥꓪ ꓠꓴ ꓔꓯ ꓟꓳꓸ ꓖꓶ ꓡꓯ꓿ ꓖꓳ ꓡꓱ ꓠꓬ꓾ ꓥꓪ ꓠꓴꓽ ꓠꓲꓹ ꓘꓪ ꓫꓵˍ ꓥꓳ꓾ ꓐꓯˍ ꓡꓳ꓿
ꓬꓰ-ꓢꓴ ꓡꓰ ꓬꓲ ꓔꓯ꓾ ꓒꓲ-ꓡꓲꓳ꓾ ꓥꓪ ꓠꓬ ꓠꓴˍ ꓐꓰ ꓕꓱ ꓟꓶ ꓛꓲ ꓔꓬ ꓢꓲ꓾ ꓠꓴ ꓥꓪ ꓔꓯ ꓟꓽ ꓢꓷꓸ ꓢꓰꓽ ꓡꓺꓽ꓿ ꓥꓪ ꓔꓯ ꓟꓳ ꓠꓬꓲ ꓢꓴ ꓠꓬ꓾ ꓐꓹ ꓐ ꓔꓯ ꓟꓳ ꓠꓬꓲˍ ꓟ ꓥ ꓡꓳ꓿ ꓠꓴ ꓮ ꓡꓲ ꓐꓰ꓾ ꓐꓹ ꓐ ꓥꓪ ꓠꓴꓽ ꓔꓯ ꓟꓳꓸ ꓖꓶ ꓡꓯ꓾ ꓐꓯˍ ꓡꓳ꓾ ꓐꓯˍ ꓡꓳ꓿
ꓥꓪ ꓠꓬ ꓐꓹ ꓐ ꓠꓯꓸꓼ ꓗꓪ ꓔꓬˍ ꓟˍ ꓐꓰ꓾ ꓐꓹ ꓐ ꓠꓬ ꓥꓪ ꓠꓯꓸꓼ ꓗꓪ ꓔꓬˍ ꓟ ꓠꓴ ꓟꓽ ꓙꓵꓻ ꓡꓺꓽ꓿ ꓥꓪ ꓠꓴ ꓪ ꓔꓯ ꓐꓯ ꓖꓶˍ ꓟ ꓐꓯ ꓘꓶ ꓠꓬ ꓥꓪ ꓚꓲ ꓛꓬ ꓗꓪ ꓐꓰ ꓐꓯˍ ꓟ ꓟꓽ ꓥ꓿ ꓥꓪ ꓠꓯꓸꓼ ꓗꓪ ꓔꓬ ꓟ ꓐꓹ ꓐ ꓡꓰ ꓬꓲ ꓟꓬꓱꓽ ꓬꓲ ꓬꓰˍ ꓡꓳ꓿
ꓥꓪ ꓠꓽ ꓐꓹ ꓐ ꓠꓯꓸꓼ ꓗꓪ ꓔꓬˍ ꓟ ꓐꓰ꓾ ꓐꓹ ꓐ ꓠꓬ ꓥꓪ ꓠꓯꓸꓼ ꓗꓪ ꓔꓬꓹˍ ꓟ ꓔꓯ ꓙꓵꓻ꓿ ꓟꓽ ꓥ ꓠꓬ ꓥꓪ ꓬꓰˍ ꓟ ꓟꓬꓱꓽ ꓑꓶꓸ ꓓꓴ ꓥꓪ ꓔꓯꓸ ꓙꓵꓻ꓿
ꓥꓪ ꓔꓱ ꓔꓱˍ ꓐꓰ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓔꓯ ꓙꓵꓻ ꓢꓴ ꓠꓬ꓾ ꓥꓪ ꓬꓰˍ ꓟ ꓟꓬꓱꓽ ꓬꓲˍ ꓟꓲ ꓬꓰˍ ꓥꓳ꓿ ꓕꓱ ꓟ ꓕꓯ ꓢꓲ ꓪꓴꓽˍ ꓟ ꓟꓬꓱꓽˍ ꓟꓲ ꓬꓲ ꓬꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓐꓹ ꓐ ꓔꓯ ꓥꓪ ꓙꓰˍ ꓡꓳ꓿
ꓐꓹ ꓐ ꓠꓬ꓾ ꓮ ꓐꓲ ꓗꓪ ꓐꓰ ꓟꓬꓱ ꓓꓳꓽ ꓟꓶ ꓠꓹ ꓟ꓾ ꓥꓪ ꓟꓬꓱꓺ ꓗꓪ ꓐꓰ ꓠꓴ ꓪ ꓮ ꓫꓵꓽ ꓓꓰꓽˍ ꓠꓬ ꓖꓳ ꓟ ꓥꓪ ꓬꓰˍ ꓥꓳ꓿
ꓥꓪ ꓟꓬꓱꓺ ꓗꓪ ꓐꓰ ꓠꓴ ꓪ ꓮ ꓫꓵꓽ ꓓꓰꓽ ꓠꓬ꓾ ꓖꓳ ꓟ ꓥꓪ ꓬꓰˍ ꓥꓳ꓿
ꓠꓴ ꓪ ꓥꓪ ꓔꓯ ꓠꓲꓹ ꓠꓵˍ ꓠꓬ꓾ ꓥꓪ ꓕꓵꓼ ꓪ ꓠꓴ ꓪ ꓒꓵꓽ ꓛꓳˍ ꓥꓳ꓿
ꓖꓳ ꓡꓱ ꓢꓲ ꓐꓹ ꓐ ꓔꓯ ꓥꓪ ꓓꓰꓽ ꓗꓷ ꓠꓬ꓾ ꓬꓲ ꓡꓰ ꓠꓲꓹ ꓟ ꓗꓴ ꓖꓶ ꓢꓴ ꓬꓲ ꓔꓱ ꓬꓲ ꓕꓲ ꓣꓳ ꓠꓴ ꓪ ꓔꓯ ꓖꓶ ꓡˍ ꓥꓳ꓿