Lisu Christian Hymnal
Hymn 33 ꓶꓼ ꓘꓶꓽ ꓫꓱ, ꓘꓶꓽ Lyrics
ꓬꓲ ꓠꓬ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓔꓯ ꓟꓳ ꓢꓲ꓾ ꓪ ꓚꓲ ꓗꓪ ꓓꓯ ꓙꓰ ꓢꓲ ꓠꓬꓲ. ꓠ. ꓗꓷ ꓠꓬ꓾ ꓬꓲ ꓛꓳ ꓒꓯ ꓐꓴ ꓬꓲ ꓔꓯ ꓡˍ ꓡꓳ꓿
ꓬꓲ ꓠꓬ ꓘꓶꓽ ꓒꓴ ꓢꓲ ꓬꓲ ꓪ ꓔꓯ ꓕꓱ ꓡꓱ ꓟ. ꓖꓶ ꓡꓳ꓿
ꓞꓳ ꓦꓻ ꓫ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓴꓷ ꓠꓽ ꓬꓲ ꓪ ꓔꓯ ꓟ ꓥ ꓡꓳ꓿
ꓠꓲ, ꓥꓴ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓲ, ꓗꓴ ꓟꓬ ꓗꓴ ꓟꓶˍ ꓥꓳ꓿
ꓠꓲ, ꓟ ꓠꓴꓽ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓟꓲ ꓠꓯ ꓟꓶ ꓡꓰ ꓥꓳ꓿
ꓙꓲ ꓫꓬ ꓟ ꓔꓯ ꓟꓷꓼ ꓢꓲ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓽ ꓒ ꓐꓳ ꓐꓰ ꓟꓶ ꓥꓳ꓿
ꓢꓴ ꓔꓯ ꓫꓱꓸ ꓤ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠ ꓫꓱꓸ ꓤ ꓟ ꓟꓶ ꓥꓳ꓿
ꓠꓲ ꓟ ꓢꓲ ꓫꓬ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓠ ꓪꓴ-ꓢ ꓔꓯ ꓟꓳ ꓪ ꓥꓳ꓿
ꓢꓴ ꓔꓯ ꓕꓽ ꓡꓯ ꓘꓳ ꓝꓲ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓔꓯ ꓠꓽ ꓪꓴ-ꓢ ꓤ ꓠꓱ ꓐꓰ ꓘꓴˍ ꓥꓳ꓿
ꓙꓲ ꓫꓬˍ ꓟ ꓪꓴ. ꓠꓬꓲ ꓗ. ꓧꓪ ꓟ ꓟꓶ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓴꓷ ꓠꓽ ꓬꓲ ꓪ ꓔꓯ ꓟ ꓥ ꓡꓳ꓿
ꓥꓪ ꓪꓴ. ꓠꓬꓲ ꓢꓴ ꓠꓴ ꓪ ꓔꓯ ꓫ ꓚꓲ.꓾ ꓠꓴ ꓪ ꓔꓯ ꓗ. ꓧꓪ꓾ ꓝꓮꓲ ꓠꓴ ꓪ ꓔꓯ ꓥꓶ ꓟ ꓬꓲ ꓫꓵ ꓬꓲ ꓙꓰꓽ ꓮ ꓔꓳ ꓔꓳ ꓫ ꓕꓱ ꓡˍ ꓕꓯ꓾ ꓠꓴ ꓪ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓿
ꓠꓴ ꓪ ꓠꓬ ꓗ ꓛꓲ ꓢꓲ ꓠꓲ, ꓒꓴ ꓔꓬ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓗꓪ ꓠꓴ ꓪ ꓡꓯ ꓫꓴ ꓠꓽ ꓬꓲ ꓓꓽ ꓟ ꓥ ꓡꓳ꓿ ꓠꓴ ꓪ ꓧꓶ. ꓕꓯ ꓗꓪ ꓟ ꓟꓷ ꓠꓷ ꓝ ꓢꓴ ꓔꓯˍ ꓟꓲ ꓬꓲ ꓪ ꓕꓱ ꓡꓱ ꓗ ꓧꓪˍ ꓡꓳ꓿
ꓠꓴ ꓪ ꓠꓬ ꓟꓲ ꓠꓯ ꓞꓼ ꓐꓳ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓞꓼ ꓐꓳ ꓬꓲ ꓢꓯꓼ ꓒꓲꓼ ꓬꓰ ꓠꓬ꓾ ꓮ ꓡꓲ ꓐꓰ ꓢꓲ ꓝꓮꓲ ꓛꓵꓻ ꓡ ꓝꓲ ꓠꓯˍ ꓡꓳ? ꓖꓳ ꓗ ꓠꓯ ꓠ ꓮ ꓫꓵ ꓣꓱ ꓬꓯ ꓖꓴ ꓟꓽ ꓙꓳ꓿ ꓠꓱ ꓫꓱ ꓟ ꓗꓪ ꓡꓳ ꓩꓴ ꓗꓷ ꓢꓲ ꓞꓳ ꓤ ꓡꓰ ꓕꓳꓼ ꓓꓴ ꓗꓷ ꓡꓰ ꓡꓳ꓿
ꓠꓴ ꓪ ꓠꓬ ꓟꓲ ꓠꓯ ꓠꓬꓲ ꓟꓳ ꓓꓴ ꓥ ꓡꓳ꓿ ꓪꓼ ꓚꓲ ꓗꓪ ꓔꓶ ꓔ ꓟ ꓡꓳ ꓒꓱ ꓠꓬ ꓚꓵ ꓔ ꓟꓽ ꓐ ꓡ꓿
ꓝꓮꓲ ꓟꓬ ꓡꓴ ꓟꓬ ꓢꓲ꓾ ꓡꓳꓻ ꓡꓰ ꓝꓴ ꓔ ꓢꓴ ꓟꓽ ꓙꓳ꓿ ꓟꓬ ꓡꓴ ꓕꓲ ꓗꓪ ꓗꓷ ꓔ ꓥꓳ꓿ ꓖꓳ ꓡꓱ ꓢꓲ ꓦꓲ ꓗꓪ ꓔꓬ ꓢꓴ ꓮ ꓙꓵ ꓔꓯ ꓣꓳꓺ ꓖꓶ ꓡ ꓥꓳ꓿
ꓖꓳ ꓟ ꓡꓰ ꓐꓰ ꓞꓳ ꓤ ꓠꓬ ꓠꓴ ꓪ ꓙꓲˍ ꓟ ꓬꓰˍ ꓟ ꓔꓯ ꓟꓳ ꓢꓲ꓾ ꓟꓴ ꓗꓪ ꓗꓪ ꓔꓬ ꓟ ꓠꓴ ꓪ ꓐ ꓐ ꓔꓯ ꓟꓬꓱ ꓓꓳ ꓖꓶ ꓠ ꓟ ꓠꓴ ꓪ ꓠꓬꓲ ꓟꓳ ꓓꓴ ꓔꓯ ꓠꓬ ꓬꓲ ꓪ ꓟꓲ ꓙꓬ ꓗꓪ ꓣꓳꓺ ꓖꓶ ꓡ ꓝꓲ꓿