Lisu Christian Hymnal

Hymn 28 ꓠꓵ ꓠꓲ ꓟꓽ ꓙꓳ ꓟꓽ ꓓ ꓟ Lyrics

ꓠꓲ ꓠꓵˍ ꓟ ꓐꓴꓳꓻ ꓣꓳ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓠꓯˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓵ ꓠꓲꓹ ꓠꓽ ꓪꓴ-ꓢ ꓔꓯ ꓐꓰ ꓡˍ ꓟ ꓥ ꓡꓳ꓿ ꓝꓮꓲ ꓠꓬ ꓠꓲ, ꓠꓵ ꓢꓴ ꓮ ꓟ ꓥ ꓟꓲ ꓪꓴ-ꓢ ꓡꓰ ꓦꓵꓻ ꓔˍ ꓟ ꓥ ꓢꓲ ꓪꓴ-ꓢ ꓔꓯ ꓢꓷ.ˍ ꓡꓳ꓿
ꓟꓽ ꓠꓲ, ꓠꓵ ꓢꓴ ꓠꓬ ꓪꓴ-ꓢ ꓔꓯ ꓟꓽ ꓢꓷꓸ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓠꓵ ꓠꓲ, ꓥ ꓡꓳ꓿
ꓣꓳ ꓠꓬ ꓬꓲ ꓗꓪ ꓐꓰ ꓢꓯ. ꓔꓬ ꓠ, ꓟ ꓪꓴ-ꓢ ꓠꓬ ꓬꓲ ꓤ ꓔꓲ. ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓡꓻꓳ꓿ ꓕꓱ ꓟ ꓗꓪ ꓐꓰ ꓪꓴ-ꓢ ꓣꓳ ꓔꓯ ꓠꓲ, ꓠꓵˍ ꓟ ꓟꓳꓸ ꓖꓶ ꓡ ꓡꓳ꓿
ꓣꓳ ꓡꓰ ꓪꓴ-ꓢ ꓔꓯ ꓠꓲ, ꓠꓵˍ ꓡꓳ ꓟꓽ ꓥ꓿ ꓪꓴ-ꓢ ꓡꓰ ꓣꓳ ꓔꓯ ꓠꓲ, ꓠꓵ ꓢꓲ꓾ ꓣꓳ ꓝꓴꓲ ꓑꓶ. ꓓꓴ ꓧꓳꓸ ꓡꓰˍ ꓟ ꓔꓲꓺ ꓓꓴ ꓬꓰ ꓠ ꓟ ꓬꓲ ꓮ ꓐꓲ ꓔꓯ ꓝꓲꓺ ꓩꓴ ꓡˍ ꓡꓳ꓿ ꓬꓲ ꓠꓵ ꓠꓲ, ꓠꓬ ꓕꓱ ꓗꓪ ꓥ ꓡꓳ꓿
ꓠꓲ, ꓠꓵˍ ꓟ ꓐꓴꓳꓻ ꓪꓴ-ꓢ ꓣꓳ ꓔꓯ ꓕꓱ ꓘꓶ ꓛꓲ ꓠꓲ, ꓠꓵ ꓠꓬ ꓣꓳˍ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓙꓲꓽ ꓙꓳˍ ꓡꓳ꓿
ꓮ ꓕꓯˍ ꓟꓲ ꓪꓴ-ꓢ ꓔꓯ ꓟꓳꓻ ꓠꓬꓲ ꓢꓴ ꓟꓽ ꓙꓳ꓿ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓠꓵ ꓡꓯ ꓘꓳˍ ꓕꓯ ꓠ꓾ ꓪꓴ-ꓢ ꓠꓬ ꓣꓳ ꓠꓯꓸꓼ ꓗꓪ ꓔꓬ ꓢꓲ꓾ ꓬꓲ ꓠꓵ ꓠꓲ, ꓣꓳ ꓠꓯꓸꓼ ꓗꓪ ꓜꓲꓼ ꓓꓰ ꓡꓰꓳ꓿
ꓪꓴ-ꓢ ꓬꓲ ꓦ ꓣꓳ ꓔꓯ ꓖꓶ ꓡ ꓟ ꓕꓱ ꓟ ꓗꓪ ꓐꓰ ꓣꓳ ꓠꓬ ꓬꓲ ꓠꓯꓸꓼ ꓗꓪ ꓔꓬ ꓟˍ ꓐꓰ ꓬꓲˍ ꓟꓲ ꓣꓳ ꓠꓯꓸꓼ ꓗꓪ ꓔꓬ ꓟ ꓣꓳ ꓢꓷˍ ꓡꓳ꓿
ꓐ ꓐ ꓠꓬ ꓬꓲ ꓮ ꓐꓲ ꓔꓯ ꓟꓲ ꓠꓯ ꓞꓳ ꓤ ꓚꓬꓴ ꓢꓲ ꓒ ꓬꓰ ꓠˍ ꓟ ꓝꓲꓺ ꓩꓴ ꓡ ꓟ ꓔꓯ ꓥꓪ ꓠꓴ ꓟꓳ ꓠꓬꓲ ꓢꓲ꓾ ꓢꓷ ꓙ ꓟꓳ ꓙˍ ꓡꓳ꓿
ꓬꓰ-ꓢꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥ ꓡꓳ ꓐꓰ ꓣꓷꓠ ꓢꓴ ꓮ ꓟ ꓥ ꓟꓲ ꓪꓴ-ꓢ ꓠꓬ ꓬꓲ ꓠꓯꓸꓼ ꓗꓪ ꓔꓬ ꓢꓲ ꓬꓲ ꓟꓲ ꓪꓴ-ꓢ ꓠꓯꓸꓼ ꓗꓪ ꓔꓬ ꓡꓳ꓿
ꓖꓳ ꓡꓱ ꓢꓲ ꓪꓴ-ꓢ ꓣꓳ ꓔꓯ ꓟꓳ. ꓠꓵ ꓠꓲ, ꓙꓳˍ ꓟ ꓣꓳ ꓢꓷ ꓟꓲ ꓢꓷˍ ꓡꓳ ꓙꓵꓻ ꓟꓲ ꓙꓵꓻ ꓗꓷꓳ꓿ ꓪꓴ-ꓢ ꓠꓬ ꓠꓵ ꓠꓲ, ꓥ ꓡꓳ꓿ ꓠꓵ ꓠꓲ, ꓠꓯꓸꓼ ꓗꓪ ꓔꓬ ꓢꓴ ꓠꓬ ꓪꓴ-ꓢ ꓠꓯꓸꓼ ꓗꓪ ꓔꓬ ꓡꓳ꓿ ꓪꓴ-ꓢ ꓟꓲ ꓬꓲ ꓠꓯꓸꓼ ꓗꓪ ꓔꓬ ꓡꓳ꓿
ꓕꓱ ꓟ ꓗꓪ ꓐꓰ ꓐꓯ ꓟꓴ ꓘꓶ ꓟ ꓦꓬ ꓠꓬꓲ ꓗꓪ ꓣꓳ ꓠꓲ ꓪꓴꓽ ꓓꓴ ꓙꓳ ꓠ ꓟ ꓠꓵ ꓠꓲ ꓠꓬ ꓣꓳ ꓠꓲ ꓟ ꓠꓯꓸꓼ ꓗꓪ ꓜꓲꓼ ꓓꓰ ꓡꓰ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓮ ꓡꓲ ꓥ ꓠꓬ ꓣꓳ ꓟꓲ ꓟꓲ ꓠꓯ ꓕꓱ ꓟ ꓗꓪ ꓬꓲ ꓖꓳ ꓡꓱ ꓥ ꓡꓳ꓿
ꓠꓵ ꓠꓲ, ꓠꓯꓸꓼ ꓗꓪ ꓠꓬ ꓙꓳꓺ ꓠꓲ, ꓟꓽ ꓙꓳ꓿ ꓜꓲꓼ ꓓꓰ ꓡꓰ ꓟ ꓠꓵ ꓠꓲ, ꓡꓰ ꓙꓳꓺ ꓠꓲ, ꓔꓯ ꓖꓼ ꓓꓳ ꓗꓷ ꓡꓳ꓿ ꓮ ꓡꓲꓳ ꓐꓯ ꓠꓬ ꓙꓳꓺ ꓠꓲ, ꓠꓬ ꓛꓬ ꓒꓵ ꓙꓳ ꓡꓳ꓿ ꓝꓮꓲ ꓙꓳꓺ ꓢꓴ ꓠꓬ ꓠꓵ ꓠꓲ, ꓗꓪ ꓜꓲꓼ ꓓꓰ ꓡꓰ ꓟꓽ ꓖꓴ ꓢꓰꓼ꓿
ꓬꓲ ꓧꓶ. ꓕꓯ ꓣꓳ ꓔꓯ ꓠꓲ, ꓠꓵˍ ꓠꓬꓲ ꓣꓳ ꓠꓲ, ꓠꓵˍ ꓡꓳ꓿
ꓮ ꓟˍ ꓟꓲ ꓥꓪ ꓠꓬ ꓪꓴ-ꓢ ꓔꓯ ꓠꓲ, ꓠꓵ ꓡꓳ ꓐꓰ ꓐꓯ ꓢꓲ ꓬꓲ ꓬꓲꓼ ꓬꓲ ꓠꓬꓲ ꓔꓯ ꓠꓲ, ꓜꓳ ꓕꓯ ꓠꓽ ꓬꓲ ꓠꓬ ꓞꓳ ꓗꓶ. ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓳꓻ ꓠꓬꓲ ꓟ ꓬꓲ ꓤ ꓠꓬꓲ ꓤ ꓔꓯ ꓟꓽ ꓠꓲ, ꓠꓵ ꓢꓴ ꓠꓬ ꓟꓽ ꓟꓳꓻ ꓠꓬꓲ ꓟ ꓪꓴ-ꓢ ꓔꓯ ꓠꓲ, ꓠꓵ ꓟꓽ ꓐ ꓡ꓿
ꓝꓮꓲ ꓠꓬ ꓪꓴ-ꓢ ꓔꓯ ꓠꓲ, ꓠꓵ ꓢꓴ ꓠꓬ ꓬꓲ ꓬꓲꓼ ꓬꓲ ꓠꓬꓲ ꓔꓯˍ ꓟꓲ ꓠꓲ, ꓠꓵ ꓠ, ꓟ ꓕꓵꓼ ꓪ ꓕꓱ ꓟ ꓣꓳ ꓬꓲ ꓔꓯ ꓐꓰ ꓟꓶ ꓗꓷꓳ꓿