ख्रिश्चन गाणी
गाणे 66 तव सहवास घडावा, प्रभु रे गाण्याचे बोल
तव सहवास घडावा, प्रभु रे,
क्षणभर विरह नसावा -ध्रु.
राहो सुंदर सदनीं नगरीं,
किंवा रानीं पर्वतकुहरीं
देह विभो हा माझा,
कोठेंहि मग स्वर्गच जीवा -१
मिळोत षड्रस अन्नें खाया,
कंदमुळें वा, मज प्रभुराया,
तूं जवळी मम असतां,
अमृतानुभवच मज तो व्हावा -२
मृदुल फुलांची सुखकर शय्या,
किंवा प्रस्तरखंड निजाया
हृदया तव टेंकोनी,
असतां कष्ट न शब्दहि ठावा -३
हे प्रिय कंदा सर्व सुखाच्या,
घे घे माझें तन, मन, वाचा
ख्रिस्ता ! मत्प्रिय ख्रिस्ता,
अविनाशी तूं मात्र विसांवा -४