Lisu Christian Hymnal
Hymn 7 ꓪꓴ-ꓢ ꓠꓯꓸꓼ ꓗꓪ ꓔꓬ ꓕꓶˍ ꓟ Lyrics
ꓟꓴ ꓡꓳꓹ ꓬꓰ ꓢꓴ ꓠꓯꓸꓼ ꓗꓪ ꓛꓺ ꓗꓴꓸ ꓙꓳꓻ ꓢꓴ ꓬꓲ ꓠꓬ꓾ ꓮ ꓫꓵˍ ꓟꓲ ꓬꓰ ꓐ ꓡ ꓢꓴ ꓬꓲꓸ ꓶ ꓥꓳ ꓠꓯꓸ ꓘꓪ ꓔꓬ ꓪˍ ꓥꓳ꓿
ꓥꓪ ꓠꓬ ꓬꓰ-ꓧꓳ-ꓧꓪ ꓔꓯ꓾ ꓠꓴ ꓠꓬ ꓥꓪꓻ ꓫꓸ ꓑꓬ ꓖꓴˍ ꓐꓰ ꓥꓪ ꓧꓪꓸ ꓒꓱ ꓥ ꓡꓳ꓿ ꓥꓪ ꓦ ꓡꓱ ꓔꓬ ꓟ ꓥꓪ ꓪꓴ-ꓢ ꓥ ꓡꓳ꓾ ꓐꓰ ꓐꓯˍ ꓥꓳ꓿
ꓮ ꓡꓲꓳ ꓐꓯ ꓠꓬ ꓬꓲ ꓠ ꓪꓺ ꓕꓴ ꓢꓴ ꓪꓺ ꓗꓪ ꓐꓰ꓾ ꓥꓶˍ ꓟ ꓠꓻ ꓓꓱ ꓠ ꓧꓶ ꓗꓪ ꓐꓰ ꓠꓴ ꓔꓯ ꓚꓬꓴ ꓓꓳ ꓡˍ ꓥꓳ꓿
ꓬꓲ ꓓꓴ ꓡꓯ ꓓꓴꓻ ꓡꓰ ꓠꓴ ꓔꓯ ꓑꓲꓸ ꓔꓸ ꓖꓶˍ ꓥꓳ꓿ ꓬꓲ ꓓꓴ ꓡꓯ ꓠꓯꓸ ꓘꓪ ꓗꓪ ꓠꓴ ꓫꓸ ꓑꓬ ꓖꓴ ꓬꓰˍ ꓥꓳ꓿ ꓬꓲ ꓦ ꓡꓱ ꓐꓳ ꓠꓲ ꓠꓬ ꓚꓬ ꓠꓲ ꓓˍ ꓟ ꓐꓰ ꓟꓯꓼ ꓶ ꓖꓪ ꓥ ꓡꓳ꓿
ꓢ ꓘꓪ ꓕꓯ ꓟ ꓙꓳꓺ ꓦꓲ. ꓓꓴˍ ꓐꓰ ꓟꓳ ꓡꓳꓻ ꓕꓯ ꓚꓬ ꓚꓱ, ꓐꓬꓱˍ ꓟ ꓗꓪ ꓐꓰ ꓥˍ ꓟꓲ ꓠꓴ ꓟꓽ ꓙꓳꓺ ꓡꓰ꓿
ꓠꓯ ꓞꓲ, ꓟ ꓗꓪ ꓠꓯꓺ ꓔꓬ ꓟ ꓠꓻ ꓓꓱ ꓠꓻ ꓧꓶ ꓗꓪ ꓐꓰ ꓥ ꓟꓲ꓾ ꓟꓳꓼ ꓡꓳ ꓗꓳ ꓕꓯ ꓐꓬ ꓡꓰ ꓟ ꓟꓶ ꓬꓰ ꓓꓴ ꓗꓪ ꓐꓰ ꓥ ꓟꓲ ꓠꓴ ꓟꓽ ꓙꓳꓺ ꓡꓰ꓿
ꓠꓴ ꓖꓼ ꓙꓬ ꓗꓪ ꓞꓳ ꓤ ꓕꓲ ꓔꓴ ꓐꓱꓽ ꓙꓰˍ ꓥꓳ꓿ ꓠꓴ ꓡꓯ ꓙ ꓕꓲ ꓛꓱꓽ ꓗꓪ ꓞꓳ ꓤ ꓕꓲ ꓟꓶꓼ ꓓꓳꓽ ꓡꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓔꓯ ꓟꓽ ꓕꓲꓺ ꓡ꓿
ꓠꓴ ꓮ ꓫꓵꓽ ꓟꓽ ꓬꓰˍ ꓟꓲ ꓞꓳ ꓥꓶꓺ ꓐꓴ ꓔꓯ ꓪ ꓛꓴ ꓚꓱꓹ ꓖꓶˍ ꓟ ꓠꓴ ꓟꓬ ꓢꓶꓽ ꓟꓳˍ ꓥꓳ꓿
ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓠꓬ ꓠꓴ ꓫ ꓑꓬ ꓖꓴ ꓬꓰ ꓗꓷ ꓢꓲ꓾ ꓟꓴ ꓡꓳꓹ ꓬꓰ ꓢꓴ ꓔꓯ ꓠꓬ ꓠꓴ ꓡꓰ ꓠꓴ ꓔꓬ ꓖꓴ ꓬꓰˍ ꓟ ꓑꓶꓸ ꓓꓴ꓾
ꓮ ꓫꓵ ꓥꓶˍ ꓟˍ ꓟꓲ ꓠꓴ ꓔꓯ ꓟꓽ ꓗꓷ ꓡꓰ꓾ ꓮ ꓫꓵꓽ ꓫꓸ ꓘꓶ ꓓꓴ ꓥ ꓟꓲ ꓠꓴ ꓟꓶ ꓔꓶ. ꓦꓲ ꓗꓪ ꓟꓽ ꓠꓶ ꓡ꓿
ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓠꓴ ꓙ ꓖꓴ ꓮ ꓙꓵ ꓟ ꓗꓪ ꓠꓴ ꓔꓯ ꓔ ꓙ ꓠ ꓟ꓾ ꓬꓲ ꓟꓴ ꓗꓪ ꓝꓲ ꓓꓴ ꓐꓴ ꓔꓯ ꓕꓵ ꓪ ꓖꓶˍ ꓥꓳ꓿
ꓠꓴ ꓛꓲ ꓒꓯ ꓠꓬ ꓭ ꓛꓲ ꓗꓪ ꓕꓯꓼ ꓗꓷ ꓟ ꓔꓯ ꓗꓳ ꓚꓱ ꓠꓬꓲ ꓬꓲ ꓪ ꓡꓯ ꓒꓯ ꓡꓰ ꓠꓴ ꓔꓯ ꓓꓽ ꓔ ꓖꓶ ꓥꓳ꓿
ꓠꓴ ꓠꓬ ꓡꓽ ꓢꓯꓹ ꓐꓰ ꓩꓴ ꓔꓯ ꓕꓳꓼˍ ꓥꓳ꓿ ꓡ ꓢꓯ ꓤꓽ ꓐꓰ ꓩꓴ ꓓꓽ ꓟ ꓔꓯˍ ꓟꓲ ꓠꓴ ꓛꓲ ꓒꓯ ꓠꓯꓸꓼ ꓘꓪ ꓕꓳꓼ ꓗꓷˍ ꓥꓳ꓿
ꓬꓲ ꓕꓲ ꓠꓲꓹ ꓟ ꓡꓱꓸꓼ ꓥꓪ ꓔꓯ ꓠꓲ ꓠꓵˍ ꓟ ꓑꓶꓸ ꓓꓴ ꓥꓪ ꓡꓰ ꓬꓲ ꓔꓯ ꓚꓬꓴ ꓙˍ ꓥꓳ꓿ ꓬꓲ ꓡꓰ ꓥꓪ ꓟꓬꓱ ꓔꓯ ꓢꓷꓸ ꓗꓷ ꓠꓬꓲ꓾ ꓥꓪ ꓡꓰ ꓬꓲ ꓔꓯ ꓮ ꓟꓴ ꓟꓴ ꓗꓪ ꓕꓶ ꓕꓶˍ ꓐꓰ ꓔꓬ ꓪ ꓝꓲˍ ꓥꓳ꓿
ꓬꓲ ꓥꓪ ꓔꓯ ꓘꓴ ꓕꓯ ꓥꓪ ꓬꓲ ꓔꓯ ꓒꓳꓹ ꓖꓶˍ ꓥꓳ꓿ ꓫꓸ ꓟ ꓗꓳ ꓡꓳ ꓗꓪ ꓥꓪ ꓬꓲˍ ꓐꓰ ꓔꓬˍ ꓥꓳ꓿ ꓥꓪ ꓬꓲ ꓔꓯ ꓚꓬꓴ ꓙ ꓢꓲ ꓬꓲ ꓔꓯ ꓟꓬꓱꓺ ꓓꓳꓽ ꓖꓶˍ ꓥꓳ꓿
ꓤꓶ ꓫꓵˍ ꓟ ꓡꓰ ꓥꓪ ꓬꓲ ꓔꓯ ꓠꓲꓹ ꓘꓪ ꓫꓵ ꓡꓰ ꓝꓲ ꓢꓲ꓾ ꓥꓪ ꓢꓯꓼ ꓟꓬ ꓝꓸ ꓟ ꓣꓱꓽ ꓛꓰ ꓬꓲꓸ ꓔꓯ ꓟꓳꓸ ꓖꓶˍ ꓥꓳ꓿