Lisu Christian Hymnal

Hymn 66 ꓢꓴ ꓔꓯ ꓓꓰꓽ ꓖꓶˍ ꓟ ꓗꓪ ꓐꓰ ꓶꓼ ꓤ ꓫꓱ, ꓤ ꓟꓶˍ ꓟ Lyrics

ꓖꓳ ꓡꓱ ꓥˍ ꓟꓲ ꓠꓲ. ꓠꓬꓲ ꓤ ꓫꓵ. ꓢꓴ ꓠꓬ꓾ ꓠꓲ. ꓠꓬꓲ ꓤ ꓫꓺ ꓟꓶˍ ꓢꓰ ꓥꓳ꓿ ꓟꓬ ꓠꓬꓲ ꓫꓵ. ꓢꓴ ꓠꓬ꓾ ꓟꓬ ꓠꓬꓲ ꓫꓺ ꓟꓶˍ ꓥꓳ꓿
ꓮ ꓟ ꓠꓲ, ꓟ ꓗꓪ ꓚꓴꓽ ꓬꓲ, ꓮ ꓡꓲ ꓓꓶꓽˍ ꓠꓬ ꓮ ꓡꓲ ꓖꓶ ꓠꓯˍ ꓡꓳ꓿ ꓠꓲ, ꓟ ꓫ. ꓫꓸꓼ ꓐꓰ ꓕꓽ ꓬꓰ꓾ ꓟꓽ ꓓꓻ ꓟꓽ ꓞꓽˍ ꓟꓲ ꓕꓽ ꓬꓰ꓿ ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓠꓽ ꓗ, ꓛꓲꓽ ꓛꓲꓽˍ ꓐꓰ ꓖꓶˍ ꓡ ꓢꓴ ꓔꓯ ꓠꓲ, ꓠꓵˍ ꓡꓳ꓿
ꓠꓴ ꓪ ꓠꓬ ꓮ ꓙꓵ ꓟ ꓗꓪ꓾ ꓮ ꓕꓯˍ ꓟꓲ꓾ ꓮ ꓡꓲ ꓗꓪˍ ꓟꓲ ꓡꓳꓼ ꓡꓰ ꓢꓲ꓾ ꓙꓲˍ ꓟ ꓟꓬꓱꓽ ꓥ ꓕ ꓑꓳ ꓗꓪ ꓐꓲꓺ ꓡꓶꓽ ꓡꓰ ꓠ, ꓟ꓾ ꓪꓴ‐ꓢ ꓠꓬ ꓣꓱ ꓛꓰ ꓥ ꓕ ꓑꓳ. ꓠꓴ ꓪ ꓔꓯ ꓐꓲꓺ ꓡꓶꓽ ꓡꓰ ꓝꓲ ꓐ ꓡ ꓡꓳ꓿
ꓜꓻ ꓫꓵ. ꓫꓵ. ꓢꓴ ꓔꓯ ꓜꓻ ꓫꓵ. ꓡꓳꓻ ꓫꓵ. ꓖꓶ ꓢꓲ꓾ ꓜꓽ ꓢꓴ ꓔꓯ ꓜ ꓓꓴˍ ꓟꓲ ꓖꓶ ꓜꓽ ꓢꓴ ꓠꓬ꓾ ꓠꓴ ꓪ ꓫꓵ. ꓠ, ꓟ ꓜꓻ ꓫꓵ. ꓖꓶ ꓡ ꓢꓲ ꓟꓬꓽ ꓡ ꓝꓲˍ ꓥꓳ꓿ ꓝꓮꓲ ꓠꓬ ꓠꓴ ꓪ ꓙꓲ ꓫꓬˍ ꓟ ꓢꓶ ꓢꓶꓽ ꓟꓬꓽ ꓡ ꓝꓲ ꓢꓲ꓾
ꓠꓴ ꓪ ꓮ ꓫꓵꓽ ꓗꓪˍ ꓟꓲ ꓐꓳ ꓡ ꓢꓲ꓾ ꓓꓰꓽ ꓖꓶ ꓠꓲ, ꓒꓴˍ ꓟ ꓠꓲ, ꓟ ꓐꓲꓺ ꓡꓰ ꓠꓬꓲ꓾ ꓥꓪ ꓠꓴꓽ ꓗꓪ ꓐꓰ ꓪꓴ‐ꓢ ꓔꓯ ꓫ. ꓟꓳ ꓓꓴ ꓬꓰ ꓓꓳ ꓡˍ ꓥꓳ꓿
ꓖꓳ ꓡꓱ ꓢꓲ ꓠꓴ ꓪ ꓠꓯꓸꓼ ꓗꓪ ꓪꓴ‐ꓢ ꓣꓱ ꓛꓰ ꓮ. ꓓꓲꓽ ꓪꓴꓽˍ ꓟ ꓑꓶ. ꓓꓴ꓾ ꓬꓲ ꓪˍ ꓟꓲ ꓠꓴ ꓪꓽ ꓔꓯ ꓢꓲꓼ ꓙꓬ ꓢꓲ ꓠꓴ ꓪ ꓐꓱ ꓶ ꓶꓼ ꓓꓰꓽˍ ꓥꓳ꓿
ꓪꓴ‐ꓢ ꓡꓯꓼ ꓫꓴ ꓐꓯ ꓖꓴ ꓟꓽ ꓓ ꓟ ꓑꓶ. ꓓꓴ ꓬꓲ ꓔꓯ ꓫ. ꓟꓳ꓿
ꓕꓲ ꓣꓳ ꓠꓬ ꓠꓲ, ꓡꓳ ꓡꓳˍ ꓡꓰ ꓖꓶˍ ꓟꓲ꓾ ꓪ ꓜꓲ ꓞꓳ ꓐꓳ ꓒꓬꓱ ꓡˍ ꓡꓳ꓿ ꓠꓱ ꓐꓯ ꓕꓲ ꓣꓳ ꓠꓬ ꓖꓶ ꓙꓲ ꓙꓳˍ ꓟ ꓔꓯ ꓔꓵ, ꓔˍ ꓟꓲ꓾ ꓪ ꓜꓲ ꓣꓱꓽ ꓟꓽ ꓡꓳ ꓢꓴ ꓗꓷ ꓡꓰˍ ꓡꓳ꓿
ꓠꓲ, ꓡꓳ ꓡꓳˍ ꓡꓰ ꓖꓶ ꓢꓴ ꓠꓬ ꓪ ꓜꓲ ꓐꓳ ꓡꓰˍ ꓥꓳ꓿ ꓬꓲ ꓙꓬ ꓧꓳꓽ ꓖꓶ ꓢꓴ ꓠꓽ ꓬꓲ ꓚꓲ. ꓛꓬˍ ꓟꓲ ꓬꓲ ꓙꓬ ꓧꓳꓽ ꓟꓶˍ ꓥꓳ꓿