Lisu Christian Hymnal
Hymn 60 ꓚꓰꓼ ꓢꓴ ꓪꓴ-ꓢ Lyrics
ꓬꓲ ꓚꓰ ꓬꓲ ꓪꓴ. ꓗꓪ ꓪꓴ-ꓢ ꓡꓰ ꓟꓴ ꓗꓪ ꓐꓰ ꓟꓲ ꓠꓯ ꓔꓯ ꓚꓰꓼˍ ꓡꓳ꓿
ꓪꓴ-ꓢ ꓡꓰ ꓣꓳ ꓠꓬ ꓣꓳ ꓐꓬꓱꓽˍ ꓐꓰ ꓣꓳ ꓒꓬꓱꓽ ꓔꓯ ꓛꓳ ꓢꓲ ꓞꓳ ꓤ ꓚꓰꓼˍ ꓡꓳ꓿ ꓖꓳ ꓡꓱ ꓢꓲ ꓬꓲꓻ ꓡꓴ ꓐꓱ ꓗꓪˍ ꓟ ꓥꓪꓸˍ ꓐꓰ꓾ ꓟꓵ ꓪꓴ ꓗꓪ ꓟ ꓠꓬ ꓤ ꓙꓱ ꓤˍ ꓐꓰ ꓦꓵ ꓙꓱ ꓾ ꓙꓱ ꓐꓰ ꓟꓲ ꓠꓯ ꓮ ꓙꓵ ꓐꓰ ꓟꓲ ꓠꓯ ꓕꓯ ꓢꓲ ꓗꓪ ꓚ ꓔꓬ ꓡꓳ ꓫꓵ ꓐꓶ ꓓꓲ ꓡꓯ ꓓꓲ ꓥ ꓕ ꓑ ꓕꓯ ꓢꓲ ꓗꓪ ꓬꓲ ꓪ ꓔꓯ ꓙꓵ ꓪ ꓙꓳ ꓝꓲ꓾ ꓐꓯ ꓡꓳ꓿
ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓬꓲ ꓚꓲ ꓛꓬ ꓐꓬꓱꓽ ꓔꓯ ꓛꓳ ꓢꓲ꓾ ꓞꓳ ꓤ ꓔꓯ ꓚꓰꓼˍ ꓡꓳ꓿ ꓪꓴ-ꓢ ꓐꓬꓱꓽ ꓔꓯ ꓛꓳ ꓢꓲ꓾ ꓬꓲ ꓡꓰ ꓬꓲ ꓔꓯ ꓚꓰꓼ ꓔ ꓡꓳ꓿ ꓬꓲ ꓡꓰ ꓞꓳ ꓑ ꓤˍ ꓐꓰ ꓤ ꓟꓶ ꓤ ꓚꓰꓼˍꓡꓳ꓿
ꓬꓰ-ꓧꓳ-ꓧꓪ ꓬꓲ ꓐꓯ ꓘꓶ ꓡꓰ ꓟꓴ ꓗꓪ ꓔꓯ ꓚꓰꓼ ꓔ ꓡꓳ꓿ ꓟꓴ ꓗꓪ ꓗꓪ ꓟ ꓬꓲ ꓜꓴ ꓬꓲ ꓟꓯꓼ ꓠꓬ ꓬꓲ ꓟꓷ ꓠꓷ ꓗꓪ ꓟ ꓦ ꓢꓯꓼ ꓡꓰ ꓚꓰꓼ ꓔˍ ꓡꓳ꓿
ꓬꓲ ꓡꓰ ꓬꓲꓻ ꓡꓴ ꓐꓱ ꓗꓪ ꓟ ꓬꓲꓻ ꓙꓬ ꓔꓯ ꓕꓲ ꓒꓵ,ˍ ꓟˍ ꓡꓰ ꓐꓰ ꓜꓲꓼ ꓡ ꓝꓲˍ ꓡꓳ꓿ ꓠꓯ. ꓓꓴꓽ ꓬꓲ ꓙꓬ ꓔꓯ ꓠꓬ ꓗꓹ ꓗꓪ ꓫ ꓗꓶ ꓔˍ ꓡꓳ꓿
ꓟꓲ ꓠꓯ ꓗꓪ ꓙꓳ ꓟ ꓮ ꓙꓵ ꓔꓯ ꓠꓬ꓾ ꓬꓰ-ꓧꓳ-ꓧꓪ ꓔꓯ ꓙꓳ ꓒꓵ ꓝꓲ꓿ ꓟꓲ ꓠꓯ ꓗꓪ ꓔꓬ ꓢꓴ ꓥ ꓕ ꓑꓳˍ ꓟꓲ ꓬꓲ ꓔꓯ ꓙꓳꓺ ꓛꓱ ꓔꓬ ꓝꓲ꓿
ꓮ ꓡꓲꓳ ꓐꓯ ꓠꓬ ꓬꓲ ꓫ ꓕꓱ ꓗꓷ ꓠꓬ ꓬꓲ ꓖꓳ ꓡꓱ ꓒꓬꓱꓼ ꓡꓻꓳ꓿ ꓬꓲ ꓕꓵꓼ ꓪ ꓖꓶ ꓗꓷ ꓠꓬ ꓕꓶꓻ ꓡꓰꓳ꓿
ꓬꓰ-ꓧꓳ-ꓧꓪ ꓠꓬ ꓞꓳ ꓫꓵꓽ ꓐꓴ ꓖꓪ ꓙꓱ ꓡꓯ ꓘꓳ ꓟ ꓔꓯ ꓬꓲ ꓖꓳꓽ ꓗꓷ ꓡꓰ ꓝꓲˍ ꓡꓳ꓿ ꓑ ꓫꓬ ꓐꓴ ꓓꓵ ꓙ ꓞꓷ ꓔ ꓟ ꓔꓯ ꓬꓰ ꓟꓽ ꓒꓬꓱꓼ ꓡ ꓟ ꓗꓷ ꓡꓰ ꓝꓲˍ ꓡꓳ꓿
ꓬꓰ-ꓧꓳ-ꓧꓪ ꓞꓷ ꓔˍ ꓟ ꓚꓴ ꓬꓲ, ꓠꓬ ꓕꓲ ꓞꓲꓼ ꓡꓱꓸꓼ ꓕꓶ ꓞˍ ꓡꓳ꓿ ꓬꓲ ꓠꓲ, ꓟ ꓗꓪ ꓓꓵ ꓙ ꓟ ꓠꓬ꓾ ꓤꓶ ꓮ ꓙꓵ ꓟ ꓗꓪ ꓛꓲ ꓓ, ꓞˍ ꓡꓳ꓿
ꓬꓰ-ꓧꓳ-ꓧꓪ ꓠꓬ ꓬꓲ ꓪꓴ-ꓢ ꓥ ꓟ ꓞꓳ ꓫꓵ ꓖꓳ ꓟ ꓠꓬ ꓶꓼ ꓙꓳ ꓫꓱ, ꓙꓳ ꓡꓳ꓿ ꓬꓲ ꓪ ꓠꓬ ꓬꓲ ꓚꓲ ꓛꓬ ꓡꓯ ꓪ ꓬꓰ ꓠ ꓟ ꓬꓲ ꓡꓰ ꓢꓲꓺ ꓔ ꓟ ꓑ ꓫꓬ ꓥ ꓡꓳ꓿
ꓬꓰ-ꓧꓳ-ꓧꓪ ꓠꓬ ꓟꓴ ꓗꓪ ꓕꓯ ꓢꓲ ꓗꓪ ꓐꓰ ꓡꓳꓸ ꓡˍ ꓡꓳ꓿ ꓞꓳ ꓤ ꓮ ꓙꓵ ꓔꓯ ꓬꓲ ꓡꓳꓸ ꓟꓳˍ ꓡꓳ꓿
ꓬꓲ ꓙ ꓗꓪ ꓐꓰ ꓟꓲ ꓠꓯ ꓗꓪ ꓔꓬ ꓢꓴ ꓮ ꓙꓵ ꓔꓯ ꓬꓲ ꓡꓳ. ꓬꓯꓼ ꓩꓴ ꓡˍ ꓡꓳ꓿
ꓬꓲ ꓠꓬ ꓬꓲ ꓮ ꓙꓵꓽ ꓟ ꓠꓲ, ꓟ ꓔꓯ ꓚꓰꓼ ꓢꓴ ꓥ ꓢꓲ꓾ ꓬꓲ ꓪ ꓟꓬꓱꓽ ꓮ ꓙꓵꓽ ꓔꓯ ꓓꓵ ꓙ ꓠꓬꓲ ꓔꓬ ꓢꓴ ꓥ ꓡꓳ꓿