Lisu Christian Hymnal
Hymn 6 ꓪꓴ-ꓢ ꓢꓲ ꓫꓬ ꓦꓲ ꓔꓯ ꓢꓲꓼ ꓙꓬ ꓟ Lyrics
ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪꓳ꓾ ꓠꓴ ꓔꓬ ꓖꓴ ꓦꓲ ꓔꓯ ꓠꓬ ꓮ ꓘꓶ ꓛꓲ ꓠꓲ ꓠꓵˍ ꓡꓳ ꓫꓵꓽ ꓥ ꓡꓳ ꓟ꓿
ꓥꓪ ꓶꓻ ꓟꓬ ꓠꓬ ꓬꓰ-ꓧꓳ-ꓧꓪ ꓬꓲ ꓡꓽ ꓙꓳ ꓓꓰ ꓔꓯ ꓢꓲꓼ ꓙꓬ ꓠꓬꓲ꓾ ꓧꓪ. ꓛꓲꓽ ꓧꓪꓸ ꓟꓽ ꓛꓲꓽ ꓗꓷ ꓡꓰˍ ꓡꓳ꓿ ꓥꓪ ꓠꓲ ꓟˍ ꓐꓰ ꓥꓪ ꓧꓪ ꓖꓳ ꓓꓱ ꓠꓬ ꓗ ꓛꓲ ꓠꓬꓲ ꓢꓯꓸ ꓔꓬˍ ꓟ ꓪꓴ-ꓢ ꓔꓯꓸ ꓟꓳꓸ ꓬꓰꓽ ꓔꓴ ꓡˍ ꓡꓳ꓿
ꓥ ꓡꓳ꓾ ꓠꓬꓹ ꓛꓬꓼ ꓡꓯ ꓠꓬ ꓬꓲ ꓐꓱ ꓶ ꓦꓲ ꓕꓲ ꓦꓲꓻ ꓧꓪ ꓟꓶꓳ꓿ ꓚꓬꓻ ꓟꓯ, ꓪꓳꓸꓸˍ ꓟꓲ ꓬꓲ ꓤꓽ ꓐꓴ ꓗꓶ ꓔ ꓖꓴ ꓬꓰ ꓠ ꓟ ꓬꓲ ꓘꓶꓻ ꓧꓪꓺ ꓟꓶꓳ꓿ ꓠꓴ ꓔꓲ ꓖꓴ ꓗꓪ ꓥ ꓡꓳ꓾ ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪꓳ꓾ ꓥꓪ ꓪ ꓔꓲˍ ꓐꓰ ꓥꓪ ꓪꓴ-ꓢꓻꓳ꓿
ꓠꓴꓻ ꓦꓲ ꓗꓪ ꓔꓬ ꓢꓴ ꓐꓴ ꓠꓬ ꓶ ꓙꓳ ꓫꓱ ꓙꓳˍ ꓡꓳ꓿ ꓬꓲ ꓪ ꓠꓬ ꓡꓯ ꓫꓵ ꓠꓴ ꓔꓯ ꓫꓱ. ꓖꓶˍ ꓢꓰ ꓥꓳ꓿
ꓠꓴꓻ ꓠꓯꓸꓼ ꓗꓪ ꓢꓯꓼ ꓙꓳˍ ꓟ ꓞꓳ ꓤ ꓠꓬ ꓶ ꓙꓳ ꓫꓱ ꓙꓳˍ ꓡꓳ꓿ ꓬꓲ ꓠꓲ ꓟ ꓠꓯꓸꓼ ꓗꓪ ꓜꓲ-ꓬꓴ ꓗꓪ ꓙꓰˍ ꓟ ꓚꓱꓹ ꓙꓳˍ ꓡꓳ꓿
ꓬꓲ ꓪ ꓠꓬ ꓥꓴꓻ ꓡꓳꓻ ꓘꓴ ꓗꓪ ꓐꓰ ꓗꓳꓸ ꓙꓰ ꓠꓬꓲ꓾ ꓬꓲꓻ ꓝꓳ, ꓟꓶ ꓙꓳˍ ꓟ ꓟꓵꓽ ꓑꓶꓸ ꓡꓰ ꓝꓲˍ ꓡꓳ꓿ ꓟꓶ ꓦ ꓠꓯꓼ ꓶꓼ ꓤ ꓫꓱ ꓤ ꓡꓰ ꓟꓵꓽ ꓖꓳ ꓟ ꓗꓪˍ ꓟ ꓬꓲꓻ ꓐꓱ ꓔꓯ ꓐꓲꓺ ꓡꓰ ꓝꓲˍ ꓡꓳ꓿
ꓬꓲ ꓪ ꓠꓬ ꓪ ꓠꓬꓲˍ ꓟ ꓕꓯ ꓢꓲ ꓪ ꓠꓬꓲ ꓔꓴ ꓡˍ ꓡꓳ꓿ ꓬꓲ ꓪ ꓕꓲ ꓣꓳˍ ꓡꓰ ꓕꓲꓽ ꓣꓳꓺ ꓠꓬ ꓜꓲ-ꓬꓴ ꓗꓪ ꓪꓴ-ꓢ ꓟꓲ ꓙꓬ ꓗꓪ ꓙꓵ ꓡꓯꓼ ꓘꓳ ꓪ ꓓˍ ꓡꓳ꓿
ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪ ꓪꓴ-ꓢꓻꓳꓸꓸ ꓥꓪ ꓪ ꓘꓴ ꓘꓶꓽ ꓠꓺ ꓡꓳ. ꓡꓯ꓿ ꓬ-ꓗꓴ ꓡ ꓞꓳ ꓥꓪ ꓠꓴ ꓪꓴ-ꓢꓻꓳꓸꓸ ꓠ ꓠ, ꓡꓯ꓿
ꓪꓴ-ꓢꓻꓳ꓾ ꓠꓴ ꓠꓬ ꓥꓪ ꓠꓴꓽ ꓚꓬ ꓠꓲꓹ ꓥ ꓡꓳ꓿ ꓠꓴꓻ ꓡꓰ ꓞꓶ ꓟꓰ ꓔ ꓢꓴ ꓒꓬꓱ ꓟꓬ ꓗꓪ ꓡꓳ. ꓠꓬꓲ ꓡꓯ꓿
ꓮ ꓡꓲꓳ ꓐꓯ ꓠꓬ ꓠꓴ ꓡꓽ ꓙꓳ ꓓꓰ ꓗꓪ ꓕꓲ ꓠꓬꓲ ꓔꓬ ꓟ ꓠꓬ꓾ ꓠꓱ ꓐꓯ ꓗꓪ ꓕꓲ ꓔꓴ ꓠꓬꓲ ꓔꓬ ꓟ ꓢꓶꓸ ꓟꓽ ꓞꓲ ꓙꓲˍ ꓡꓳ꓿ ꓥꓪ ꓠꓬ ꓞꓳꓻ ꓥꓶ ꓐꓴ ꓟꓶ ꓔꓶ. ꓦꓲ ꓗꓪ ꓔꓬ ꓟ ꓕꓯ ꓢꓲ ꓥꓪ ꓪꓴ-ꓢ ꓬꓲ ꓦꓲ ꓗꓪ ꓗ ꓘꓶ ꓦꓴ ꓠꓬ ꓢꓴ ꓬꓰ ꓟ ꓔꓯ ꓟꓬꓽ ꓠꓬꓲ ꓠꓲ, ꓫꓵˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓣꓳ ꓟꓲ ꓟꓲ ꓐꓰ ꓚꓬ ꓠꓲ ꓥ ꓡꓳ꓿ ꓬꓰ-ꓧꓳ-ꓧꓪ ꓠꓬ ꓣꓱ ꓛꓰ ꓐꓰ ꓟꓬꓱ ꓓꓳ ꓖꓶˍ ꓡꓳ꓿ ꓔꓱꓹ ꓔꓱꓹꓼ ꓐꓰ ꓫꓱ ꓢꓴ ꓔꓯ ꓙꓲˍ ꓟ ꓕꓲ ꓫꓵꓽˍ ꓟꓲ ꓟꓽ ꓖꓶ ꓐꓰ꓾ ꓬꓲ ꓟꓽ ꓬꓰ꓿
ꓟꓯꓼ ꓜꓴ ꓐꓴ ꓬꓰ-ꓧꓳ-ꓧꓪꓳ꓾ ꓠꓴ ꓔꓯ ꓦꓻ ꓡꓱ ꓔꓬ ꓢꓴ ꓖꓳ ꓕꓲ ꓣꓳ ꓠꓬ ꓶꓼ ꓙꓳ ꓫꓱ ꓙꓳˍ ꓡꓳ꓿