Lisu Christian Hymnal
Hymn 57 ꓪꓴ-ꓢ ꓔꓯ ꓙꓳ ꓒꓵꓽ ꓢꓴ ꓶꓼ ꓙꓳ ꓫꓱ, ꓙꓳˍ ꓟ (ꓐ, ꓐꓽ ꓦꓬꓼ ꓠꓬꓲ ) Lyrics
ꓥꓪ ꓡꓰ ꓠꓴ ꓔꓯ ꓞꓳ ꓫꓵꓽ ꓓꓽ ꓟ ꓕꓲ ꓫꓵꓽ ꓒꓬꓱ ꓡ ꓝꓲˍ ꓢꓲ꓾ ꓠꓴ ꓔꓯ ꓶꓼ ꓙꓳ ꓫꓱ, ꓙꓳ ꓝꓲ ꓢꓲ ꓠꓬꓲ꓾ ꓠꓴ ꓟꓬꓱꓺ ꓔꓯ ꓪꓴꓽˍ ꓟ ꓒꓬꓱꓼ ꓡ ꓝꓲˍ ꓥꓳ꓿ ꓠꓴˍ ꓟꓲ ꓢꓴ ꓔꓯ ꓶꓼ ꓙꓳ ꓫꓱ, ꓙꓳ ꓝꓲˍ ꓥꓳ꓿
ꓠꓴ ꓔꓯ ꓶꓼ ꓥꓳ ꓙꓱ ꓖꓶ ꓢꓴ ꓔꓯ ꓠꓬ ꓥꓪ ꓡꓰ ꓬꓲ ꓪ ꓔꓯˍ ꓟꓲ ꓶꓼ ꓙꓳ ꓫꓱ, ꓙꓳ ꓝꓲˍ ꓥꓳ꓿ ꓠꓴ ꓔꓯ ꓙꓱ ꓢꓴ ꓔꓯ ꓠꓬ ꓥꓪ ꓡꓰ ꓬꓲ ꓔꓯ ꓙꓱ ꓥꓳ꓿ ꓖꓳ ꓡꓱ ꓢꓲ ꓟꓲ ꓠꓯ ꓗꓪ ꓟ ꓞꓳ ꓫꓵꓽ ꓐꓴ ꓮ ꓙꓵ ꓠꓬ ꓠꓴ ꓗꓪ ꓐꓰ ꓶꓼ ꓙꓳ ꓫꓱ, ꓙꓳ ꓥꓳ꓾ ꓐꓯˍ ꓡꓳ꓿
ꓧ-ꓡꓲ-ꓡꓴ-ꓬ꓿ ꓬꓰ-ꓧꓳ-ꓧꓪ ꓔꓯ ꓙꓳ ꓒꓵ ꓢꓴ ꓬꓲ ꓕꓵꓼ ꓪ ꓠꓯꓸꓼ ꓗꓪ ꓮ ꓘꓶ ꓗ ꓛꓲ ꓢꓴ ꓖꓳ ꓕꓲ ꓣꓳ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓿
ꓬꓲ ꓞꓲꓼ ꓤ ꓡꓯ, ꓤ ꓐꓴ ꓠꓬ ꓟꓲ ꓠꓯ ꓗꓪ ꓪ ꓠꓬꓲˍ ꓟ ꓒꓬꓱꓼ ꓡ ꓥꓳ꓿ ꓞꓳ ꓔꓱ, ꓬꓲ ꓡꓯ. ꓤ ꓐꓬ ꓠꓬ ꓶꓼ ꓥꓳ ꓙꓱˍ ꓟ ꓟꓶˍ ꓥꓳ꓿
ꓐꓳ ꓶꓼˍ ꓐꓰ ꓒꓴ ꓤ ꓫꓵ ꓤ ꓠꓬ ꓬꓲ ꓦꓲ ꓗꓪ ꓙꓳˍ ꓡꓳ꓿ ꓬꓲ ꓙꓲ ꓫꓬˍ ꓟ ꓠꓬ ꓕꓲ ꓞꓲꓼ ꓕꓲ ꓑ ꓟꓽ ꓡꓳ, ꓬꓰ꓿
ꓠꓴ ꓡꓯ ꓒꓯ, ꓡꓰ ꓢꓯꓼ ꓕꓵꓼ ꓪꓴꓽ ꓧꓶ ꓔ ꓟ ꓔꓯ ꓠꓴ ꓟꓶ ꓜˍ ꓥꓳ꓿ ꓠꓴ ꓠꓬ ꓶꓼ ꓙꓳ ꓫꓱ, ꓙꓳ ꓢꓲ꓾ ꓠꓴ ꓫꓵꓽ ꓪꓴ ꓒꓬꓱꓼ ꓡ ꓥꓳ꓿
ꓠꓴ ꓤ ꓟꓶ ꓠꓬ ꓠꓴ ꓦꓲ ꓠꓯꓸꓼ ꓗꓪ ꓬꓲ ꓢꓶꓽ ꓮ ꓟꓬ, ꓓꓱˍ ꓟ ꓛꓱꓼ ꓡꓱꓼ ꓚ ꓡꓰˍ ꓐꓰ ꓒꓬꓱꓼ ꓡ ꓥꓳ꓿ ꓠꓴ ꓤ ꓠꓱ ꓐꓴ ꓠꓬ ꓔꓶ ꓔˍ ꓟ ꓮ ꓛꓬ ꓜꓲˍ ꓡꓰˍ ꓐꓰ ꓠꓴ ꓢ ꓡ ꓗꓪ ꓚꓳ ꓞˍ ꓥꓳ꓿
ꓠꓬꓲ ꓠ꓾ ꓬꓰ-ꓧꓳ-ꓧꓪ ꓔꓯ ꓙꓳ ꓒꓵˍ ꓟ ꓞꓳ ꓤ ꓠꓬ ꓬꓲ ꓕꓱ ꓡꓱ ꓶꓼ ꓤ ꓫꓱ, ꓤ ꓟꓶˍ ꓥꓳ꓿
ꓜꓲ-ꓬꓴ ꓗꓪ ꓐꓰ ꓬꓰ-ꓧꓳ-ꓧꓪ ꓡꓰ ꓠꓴ ꓔꓯ ꓶꓼ ꓥꓳ ꓙꓱ ꓖꓶ ꓝꓲ꓿ ꓠꓴ ꓕꓲ ꓤꓶ ꓡꓱꓸꓼ ꓗꓪ ꓙꓱ-ꓣꓴ-ꓢ-ꓡꓱ ꓶꓼ ꓛꓳ ꓫꓱ, ꓛꓳˍ ꓟ ꓠꓴ ꓔꓯ ꓡꓳ. ꓟꓳ ꓝꓲ꓿
ꓥ ꓡꓳ꓾ ꓠꓴ ꓡꓲ. ꓑ ꓡꓲ. ꓟ ꓐꓴ ꓔꓯ ꓠꓴ ꓟꓳ ꓪ ꓝꓲ꓿ ꓬꓲ-ꓢꓷ-ꓡꓰ ꓐꓴ ꓕꓯ ꓢꓲ ꓗꓪ ꓢꓲ ꓡꓲˍ ꓟ ꓓꓹ ꓝꓲ꓿