Lisu Christian Hymnal
Hymn 44 ꓠꓵꓻ ꓠꓲ, ꓙ ꓖꓴ Lyrics
ꓥꓪ ꓠꓬ ꓞꓳ ꓤ ꓥꓳꓽ ꓫꓵꓽ ꓥꓳꓽ ꓙꓰꓽ ꓐꓰ ꓟꓴ ꓗꓪ ꓝꓲ ꓓꓴ ꓥꓳꓽ ꓫ ꓕꓱ ꓥˍ ꓟꓲ꓾ ꓠꓵ ꓠꓲ, ꓟꓽ ꓙꓳ ꓕꓯ ꓠꓽ꓾ ꓥꓪ ꓠꓬ ꓟꓶˍ ꓟ ꓙꓲꓽ ꓑꓬ, ꓥ ꓠꓬ ꓑꓬꓹ ꓑꓬꓹ ꓞꓪˍ ꓡꓰꓽ ꓥ ꓡꓳ꓿
ꓥꓪ ꓠꓬ ꓟꓷ ꓠꓷ ꓝ. ꓗꓴˍ ꓟ ꓡꓯꓼ ꓫꓴ ꓙꓳꓻ ꓢꓲ꓾ ꓚꓵꓺ ꓘꓶ ꓮ ꓙꓵ ꓐꓰ ꓢꓷꓸ ꓠꓲꓹ ꓮ ꓙꓵ ꓙꓽ ꓜꓲꓼˍ ꓟꓲ꓾ ꓝꓮꓲ ꓪ ꓚꓲ ꓙꓵ ꓙꓰ ꓝꓲ ꓠ ꓛꓲ ꓙꓵꓻ ꓠꓲ, ꓮ ꓙꓵ ꓙꓳˍ ꓥˍ ꓟꓲ꓾ ꓠꓵ ꓠꓲ, ꓟꓽ ꓙꓳ ꓕꓯ ꓠꓽ꓾ ꓥꓪ ꓮ ꓫꓵꓽ ꓟꓽ ꓥ꓿
ꓝꓮꓲ ꓠꓬ ꓥꓪ ꓙꓳˍ ꓟ ꓮ ꓙꓵ ꓡꓱꓸꓼ ꓞꓳ ꓫ ꓔꓯ ꓖꓶ ꓜꓽˍ ꓥˍ ꓟꓲ꓾ ꓥꓪ ꓖꓳ ꓓꓱ ꓔꓯ ꓛꓴ ꓠ ꓟ ꓖꓶ ꓗꓷˍ ꓥˍ ꓟꓲ꓾ ꓠꓵ ꓠꓲ, ꓟꓽ ꓙꓳ ꓕꓯ ꓠꓽ꓾ ꓥꓪ ꓔꓯ ꓮ ꓫꓵꓽ ꓙꓲ ꓖꓴ ꓟꓽ ꓙꓳ꓿
ꓠꓵ ꓠꓲ, ꓠꓬ ꓠꓲ, ꓟ ꓫꓵꓺ ꓢꓲ꓾ ꓠꓲ, ꓟ ꓙꓲˍ ꓡꓳ꓿ ꓠꓵ ꓠꓲ, ꓠꓬ ꓟꓽ ꓟꓬ ꓦꓯ.꓿ ꓟꓽ ꓘꓶꓽ ꓘꓹ꓿ ꓟꓬꓱ ꓓꓳˍ ꓟꓲ ꓟꓽ ꓧꓪ꓿
ꓡꓳ. ꓟꓽ ꓐꓲ ꓟ ꓟꓽ ꓬꓰ꓾ ꓚꓲ ꓛꓬ ꓐꓱ ꓶ ꓙꓲꓻ ꓖꓴ ꓟꓽ ꓧꓪ꓾ ꓟꓽ ꓠꓲ, ꓜꓲ꓾ ꓠꓲ, ꓟ ꓗꓪ ꓟꓽ ꓙꓲ ꓟ ꓟꓽ ꓗꓶ ꓔ꓿
ꓟꓽ ꓙꓲ ꓫꓬ ꓟ ꓔꓯ ꓟꓽ ꓗ ꓛꓲ꓾ ꓔꓱˍ ꓟ ꓔꓯˍ ꓡꓰꓼ ꓗ ꓛꓲˍ ꓡꓳ꓿
ꓮ ꓫꓵꓽ ꓔꓯˍ ꓟꓲ ꓠꓲ, ꓟ ꓫꓵˍ ꓡꓳ꓾ ꓮ ꓡꓲ ꓗꓷ ꓡꓰˍ ꓟꓲ ꓙꓵˍ ꓡꓳ꓾ ꓮ ꓫꓵꓽ ꓗꓪˍ ꓟꓲ ꓥꓳ ꓡꓳ.ˍ ꓡꓳ꓾ ꓮ ꓫꓵꓽ ꓔꓯˍ ꓟꓲ ꓜꓲꓽˍ ꓡꓳ꓿
ꓠꓵ ꓠꓲꓹ ꓠꓬ ꓕꓲ ꓞꓲꓼ ꓕꓲ ꓑ ꓟꓽ ꓡꓳ, ꓬꓰ꓿ ꓟꓷ ꓠꓷ ꓝ ꓟ ꓠꓽ ꓟꓽ ꓣꓱ ꓗꓷ ꓡꓰˍ ꓥꓳ꓿ ꓥꓳꓽ ꓫꓵꓽ ꓥꓳꓽ ꓙꓰˍ ꓟꓲ ꓠꓽ ꓡꓰˍ ꓥꓳ꓿ ꓢꓷ ꓠꓲꓹˍ ꓟꓲ ꓣꓱ ꓟꓽ ꓬꓯꓼ ꓗꓷ ꓡꓰˍ ꓥꓳ꓿
ꓮ ꓡꓲꓳ ꓐꓯ ꓠꓬ ꓣꓳ ꓢꓷˍ ꓟ ꓠꓬ꓾ ꓕꓲ ꓐꓱ ꓡꓰꓽ ꓥ ꓢꓲ꓾ ꓣꓳ ꓟꓷ ꓠꓷ ꓝ ꓟˍ ꓟꓲ ꓕꓲ ꓐꓱ ꓡꓰꓽ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓙꓵ ꓐꓲꓺ ꓡꓰˍ ꓕꓯ꓾ ꓕꓲ ꓐꓱ ꓡꓰꓽˍ ꓟ ꓠꓬ ꓟꓽ ꓣꓱꓽ ꓗꓷ ꓡꓰˍ ꓥꓳ꓿
ꓥꓪ ꓤ ꓠꓱ ꓤ ꓕꓯ꓾ ꓥꓪ ꓠꓽ ꓤ ꓠꓱ ꓤˍ ꓡꓰ ꓐꓰ ꓫ ꓕꓱˍ ꓡꓳ꓿ ꓥꓪ ꓠꓲꓹ ꓟ ꓠꓬ ꓤ ꓠꓱ ꓤ ꓠꓲꓹ ꓟˍ ꓡꓰ ꓐꓰ ꓗ ꓡꓳ꓿ ꓥꓪ ꓠꓬ ꓤ ꓠꓱ ꓤˍ ꓡꓰ ꓐꓰ ꓓꓵ ꓙˍ ꓡꓳ꓿ ꓮ ꓟꓶ ꓥꓪ ꓪꓴ ꓡ ꓗꓷ ꓠꓬ꓾ ꓤ ꓠꓱ ꓤ ꓚꓱ ꓔꓯ ꓥꓪ ꓡꓳꓺ ꓗꓷꓳ꓿
ꓮ ꓡꓲꓳ ꓐꓯ ꓠꓬ ꓮ ꓟꓶ ꓣꓳꓽ ꓠꓽ ꓒꓬꓱꓽ ꓠꓬꓲ ꓓꓴ ꓗꓪ ꓶ ꓶ ꓐꓰ ꓡꓳ ꓟꓳˍ ꓡꓳ꓿ ꓖꓳ ꓕꓯ ꓠꓽ ꓒꓬꓱꓽ ꓔꓳ, ꓟꓬ ꓔꓳ, ꓟꓳˍ ꓥꓳ꓿ ꓮ ꓟꓶ ꓥꓪ ꓠꓬ ꓕꓲ ꓐꓱˍ ꓡꓰꓽ ꓢꓷˍ ꓡꓳ꓿ ꓖꓳ ꓕꓯ ꓠꓽ꓾ ꓢꓲꓺ ꓒꓽ ꓥꓪ ꓔꓯ ꓢꓷꓸ ꓖꓴˍ ꓟˍ ꓡꓰ ꓐꓰ꓾ ꓥꓪ ꓟꓲ ꓢꓷ ꓖꓴ ꓡꓰˍ ꓥꓳ꓿
ꓮ ꓟꓶ ꓠꓬ ꓠꓵꓻ ꓠꓲˍ ꓐꓰ ꓥꓳ ꓡꓳ. ꓓꓴˍ ꓐꓰ ꓠꓵꓻ ꓠꓲ ꓕꓱ ꓢ ꓫꓵꓽ ꓙꓳꓻ ꓞˍ ꓡꓳ꓿ ꓕꓱ ꓟ ꓗꓪ ꓪ ꓜꓲ ꓪꓴꓽˍ ꓟ ꓠꓬ꓾ ꓠꓵꓻ ꓠꓲ, ꓥ ꓡꓳ꓿