Lisu Christian Hymnal
Hymn 43 ꓬꓰ-ꓢꓴ ꓠꓬ ꓛꓱꓼ ꓡꓱꓼ ꓚ ꓥˍ ꓟ Lyrics
ꓥꓪ ꓠꓽ ꓚꓵ ꓚꓵ ꓟ ꓛꓱꓼ ꓡꓱꓼ ꓚ ꓥ ꓡꓳ꓿ ꓥꓪ ꓐ, ꓐ ꓠꓬ ꓐꓱ ꓫꓬ, ꓡꓲꓸ ꓢꓴ ꓥ ꓡꓳ꓿
ꓥꓪ ꓔꓯ ꓠꓳꓽ ꓞ ꓢꓲ ꓬꓲ ꓢꓶꓽ ꓟꓽ ꓓꓱꓼ ꓟ ꓡꓯꓼ ꓗ. ꓥ ꓕ ꓑꓳ. ꓬꓲ ꓧꓳꓽ ꓩꓴ ꓗꓷˍ ꓡꓳ꓿ ꓬꓲ ꓢꓶꓽ ꓓꓱꓼˍ ꓟ ꓥ ꓕ ꓑꓳ. ꓔꓯ ꓠꓬ꓾ ꓬꓲ. ꓢꓶꓽ ꓟꓬꓽ ꓠꓬꓲ ꓓꓱꓼ ꓡ ꓠ ꓟ ꓬꓲ ꓫꓬ, ꓡꓲ. ꓗꓷˍ ꓥꓳ꓿
ꓥꓪ ꓠꓴ ꓪ ꓔꓯ ꓐꓯ ꓖꓶˍ ꓟ ꓐꓯ ꓘꓶ ꓗꓪ ꓐꓰ꓾ ꓮ ꓟꓶˍ ꓟꓲ ꓠꓴ ꓪ ꓢꓲꓽ ꓫꓬ ꓡꓰꓳ꓿
ꓥꓪ ꓠꓯꓸꓼ ꓗꓪ ꓔꓬ꓾ ꓥꓪˍ ꓟꓲ ꓠꓴ ꓪ ꓠꓯꓸꓼ ꓗꓪ ꓔꓬ ꓥꓳ꓿ ꓬꓲ ꓚ ꓗꓪ ꓟꓽ ꓠꓳꓽ ꓞ ꓟ ꓡꓯꓼ ꓗ. ꓠꓬ꓾ ꓬꓲ ꓚꓲ ꓛꓬ ꓬꓲ ꓢꓶꓽ ꓓꓱꓼ ꓡ ꓟꓽ ꓗꓴ ꓟˍ ꓡꓰ ꓐꓰ ꓠꓴ ꓪˍ ꓟꓲ ꓥꓪ ꓠꓯꓸꓼ ꓗꓪ ꓟꓽ ꓔꓬ ꓠꓬ꓾ ꓬꓲ ꓢꓶꓽ ꓓꓱꓼ ꓡ ꓟꓽ ꓗꓴ꓿
ꓥꓪ ꓠꓬ ꓛꓱꓼ ꓡꓱꓼ ꓚ ꓥ ꓡꓳ꓿ ꓠꓴ ꓪ ꓠꓽ ꓬꓲ ꓡꓯꓼ ꓗ ꓥ ꓡꓳ꓿ ꓥꓪ ꓠꓯꓸꓼ ꓗꓪ ꓔꓬ ꓢꓲ꓾ ꓥꓪ ꓠꓬ ꓬꓲ ꓠꓯꓸꓼ ꓗꓪ ꓔꓬ ꓟ ꓕꓱ ꓕꓲ ꓣꓳ ꓠꓬ꓾ ꓬꓲ ꓢꓶꓽ ꓮꓽ ꓟꓬ ꓓꓱꓼˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓟꓽ ꓠꓳꓽ ꓞ ꓠꓬ ꓠꓴ ꓪ ꓮ ꓫꓵꓽ ꓟꓲ ꓬꓰ ꓟꓽ ꓐ ꓡ꓿
ꓮ ꓟ ꓥˍ ꓟꓲ ꓥꓪ ꓠꓯꓸꓼ ꓗꓪ ꓟꓽ ꓔꓬ ꓕꓯ ꓠꓽ꓾ ꓢꓲ, ꓡꓯꓼ ꓗ. ꓔꓯˍ ꓡꓰ ꓐꓰ꓾ ꓬꓲ ꓔꓯ ꓡꓳ ꓗꓷ ꓢꓲ꓾ ꓙꓴ ꓬꓰꓳ꓿ ꓖꓳ ꓡꓱ ꓢꓲ꓾ ꓢꓴ ꓡꓰ ꓖꓳ ꓟ ꓔꓯ ꓖꓳ ꓢꓲ ꓮ ꓔꓳ. ꓗꓪ ꓡꓳ ꓧꓳꓽ ꓗꓷ ꓠꓬ꓾ ꓛꓴ ꓗꓷ ꓥꓳ꓿
ꓠꓴ ꓪ ꓥꓪ ꓠꓯꓸꓼ ꓗꓪ ꓔꓬ ꓢꓲ꓾ ꓥꓪ ꓐꓯ ꓘꓶ ꓠꓴ ꓪ ꓠꓯꓸꓼ ꓗꓪ ꓓꓯˍ ꓠꓬ꓾ ꓠꓴ ꓪ ꓠꓵˍ ꓟ ꓮ ꓫꓵꓽ ꓓꓰˍ ꓥˍ ꓟꓲ ꓠꓴ ꓪ ꓔꓯ ꓖꓶ ꓡˍ ꓥꓳ꓿
ꓠꓴ ꓪ ꓠꓬ ꓮꓽ ꓟꓬ ꓓꓱꓼˍ ꓟ ꓗꓪ ꓐꓰ꓾ ꓥꓪ ꓐ, ꓐ ꓟꓬꓱ ꓓꓳꓽ ꓟꓶˍ ꓥꓳ꓿ ꓖꓳ ꓡꓱ ꓢꓲ꓾ ꓠꓴ ꓪˍ ꓟꓲ ꓥꓪ ꓛꓳ ꓒꓯ, ꓒꓬꓱꓼ ꓡˍ ꓥꓳ꓿
ꓐꓹ ꓐ ꓥꓪ ꓔꓯ ꓠꓲ, ꓠꓵˍ ꓟ ꓡꓰ ꓐꓰ꓾ ꓥꓪˍ ꓟꓲ ꓠꓴ ꓪ ꓔꓯ ꓠꓲ, ꓠꓵˍ ꓡꓳ꓿ ꓥꓪ ꓠꓵ ꓠꓲ, ꓠꓯꓸꓼ ꓗꓪ ꓠꓴ ꓪ ꓔꓬ꓿
ꓥꓪ ꓐꓹ ꓐ ꓕꓵꓼ ꓪ ꓔꓯ ꓥꓪ ꓒꓵꓽ ꓛꓳꓻ ꓢꓲ꓾ ꓬꓲ ꓠꓵ ꓠꓲ, ꓗꓪ ꓔꓬ ꓟˍ ꓡꓰ ꓐꓰ꓾ ꓥꓪ ꓕꓵꓼ ꓪ ꓔꓯ ꓠꓴ ꓪ ꓒꓵ ꓛꓳˍ ꓠꓬ꓾ ꓥꓪ ꓠꓵ ꓠꓲ, ꓠꓯꓸꓼ ꓗꓪ ꓠꓴ ꓪ ꓔꓬ ꓟꓶˍ ꓥꓳ꓿
ꓥꓪ ꓗꓹ ꓛꓲꓽ ꓠꓲ, ꓠꓴ ꓪ ꓠꓯꓸꓼ ꓗꓪ ꓓꓯ ꓢꓲ꓾ ꓠꓴ ꓪ ꓗꓹ ꓛꓲꓽ ꓠꓲ, ꓐꓲꓺ ꓡ ꓝꓲ ꓠꓹ ꓟ ꓕꓱ ꓟꓬ ꓙꓰ ꓟ ꓥꓪ ꓠꓴ ꓪ ꓔꓯ ꓐꓯ ꓖꓶˍ ꓡꓳ꓿
ꓥꓪ ꓠꓴ ꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ꓾ ꓠꓴ ꓪ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ꓿ ꓕꓱ ꓟ ꓠꓬ ꓥꓪ ꓕꓵꓼ ꓪ ꓥ ꓡꓳ꓿
ꓡ ꓞꓳ ꓕꓲ ꓣꓳ ꓡꓰ ꓬꓲ ꓗꓪ ꓛꓳ ꓐꓱ ꓶ ꓢꓯꓼ ꓟꓬ ꓖꓶ ꓗꓷˍ ꓟ ꓠꓬ꓾ ꓕꓱ ꓟ ꓕꓯꓽ ꓢꓲ ꓪꓴꓽˍ ꓟ ꓠꓵ ꓠꓲ, ꓮ ꓟ ꓟꓲ ꓟꓽ ꓙꓳ꓿
ꓥꓪ ꓠꓴ ꓪ ꓔꓯ ꓕꓵꓼ ꓪ ꓖꓶ ꓟ ꓠꓴ ꓪ ꓒꓵ ꓛꓳˍ ꓠꓬ ꓠꓴ ꓪ ꓠꓽ ꓥꓪ ꓗꓪ ꓛꓳ ꓥ ꓡꓳ꓿