Lisu Christian Hymnal
Hymn 42 ꓙꓲˍ ꓟ ꓢ-ꓟ-ꓡꓲ ꓡ ꓞꓳ ꓙ ꓖꓴ Lyrics
ꓠꓬꓲ ꓠ꓾ ꓙꓵꓽ ꓗ ꓒꓽ ꓕꓲ ꓣꓳ ꓬꓰ-ꓢꓴ ꓔꓯ ꓤ, ꓠꓬꓲˍ ꓐꓰ ꓦꓰꓼ ꓔꓴ ꓡ ꓢꓲ꓾ ꓟ. ꓒꓽꓳ꓾ ꓕꓲ ꓞꓲꓼ ꓕꓲ ꓑ ꓢꓯ ꓟꓬ ꓟꓶ ꓠ ꓟ ꓥꓪ ꓮ ꓡꓲ ꓬꓰ ꓠꓯˍ ꓡꓳꓺꓽ꓾ ꓐꓯˍ ꓡꓳ꓿
ꓬꓰ-ꓢꓴ ꓡꓰ ꓬꓲ ꓔꓯ꓾ ꓙꓵꓽ ꓗ ꓕꓳ ꓶ ꓗꓪ ꓮ ꓡꓲ ꓐꓳ ꓔ ꓡꓳꓺꓽ꓾ ꓠꓴ ꓵˍ ꓟ ꓠꓬ ꓮ ꓡꓲ ꓥꓳ ꓪꓺꓽ꓾ ꓐꓯˍ ꓡꓳ꓿
ꓬꓲ ꓠꓬ ꓕꓱ ꓡꓱ ꓒꓳꓹ ꓖꓶˍ ꓡꓳ꓿ ꓠꓴ ꓠꓬ ꓕꓲ ꓠꓲ, ꓟ ꓡꓱꓸꓼ ꓥˍ ꓟꓲ꓾ ꓕꓲ ꓶ ꓟꓬ ꓡꓱꓸꓼ ꓥˍ ꓟꓲ ꓕꓲ ꓢꓯꓼ ꓡꓱꓸꓼ ꓥˍ ꓟꓲ꓾ ꓕꓲ ꓙ ꓠꓲ, ꓡꓱꓸꓼ ꓥ ꓟꓲ꓾ ꓢꓲꓺ ꓒ ꓠꓴ ꓪꓴ-ꓢ ꓔꓯ ꓠꓲ, ꓠꓵ ꓠ ꓗˍ ꓡꓳ꓿ ꓝꓮꓲ ꓠꓴ ꓚꓲ ꓛꓬ ꓔꓯ ꓠꓲ, ꓠꓵˍ ꓟ ꓡꓰˍ ꓐꓰ ꓠꓴ ꓠꓶ ꓛꓳ ꓕꓲ ꓛꓳ ꓔꓯ ꓠꓲ, ꓠꓵ ꓠ ꓗˍ ꓡꓳ꓾ ꓐꓯˍ ꓡꓳ꓿
ꓬꓰ-ꓢꓴ ꓡꓰ ꓬꓲ ꓔꓯ ꓠꓴ ꓒꓳ, ꓖꓶ ꓬꓯꓼˍ ꓡꓳ꓿ ꓠꓴ ꓕꓱ ꓡꓱ ꓬꓰˍ ꓕꓯ ꓠꓽ꓾ ꓠꓴ ꓢꓯ. ꓔꓬ ꓪ ꓥꓳꓺ ꓐꓯˍ ꓡꓳ꓿
ꓬꓲ ꓚꓲ ꓛꓬ ꓠꓬ ꓙꓲ ꓫꓬ ꓢꓴ ꓥˍ ꓟ ꓟꓳ. ꓖꓶ ꓠꓲ, ꓫꓵˍ ꓠꓬꓲ꓾ ꓬꓰ-ꓢꓴ ꓔꓯ ꓥꓪ ꓠꓶ ꓛꓳ ꓕꓲ ꓛꓳ ꓮ ꓟ ꓥ ꓡꓳꓺꓽ꓾ ꓐꓯˍ ꓡꓳ꓿
ꓬꓰ-ꓢꓴ ꓕꓱ ꓡꓱ ꓒꓳ, ꓖꓶˍ ꓡꓳ꓿ ꓡ ꓞꓳ ꓕꓲ ꓣꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓙꓱ-ꓡꓲ‐ꓘꓳ ꓗꓪ ꓬꓯꓼ ꓙꓰˍ ꓕꓯ꓾ ꓬꓲ ꓠꓬ ꓒꓬ, ꓜ ꓢꓴ ꓕꓲ ꓣꓳ ꓔꓯ ꓔꓳ, ꓜꓳˍ ꓡꓳ꓿ ꓬꓲ ꓪ ꓠꓬ ꓬꓲ ꓐꓵ ꓞꓲꓽ ꓡꓵ. ꓗꓷ ꓢꓲ꓾ ꓬꓲ ꓔꓯ ꓔꓲꓸ ꓢꓲ ꓠꓬꓲ ꓟꓻ ꓫꓵꓻ ꓟꓻ ꓢꓯ. ꓡꓳ ꓔ ꓬꓰ ꓢꓲ ꓙꓰˍ ꓡꓳ꓿
ꓖꓳ ꓕꓯ ꓙ ꓖꓴ ꓖꓳ ꓕꓲ ꓚꓱ, ꓗꓪ ꓔꓲ ꓒ ꓕꓲ ꓣꓳ ꓬꓯꓼ ꓡ ꓢꓲ꓾ ꓬꓲ ꓔꓯ ꓟꓳ ꓗꓷ ꓠꓬ꓾ ꓖꓳꓻ ꓫꓬ ꓗꓪ ꓐꓰ ꓗꓳ ꓙꓰˍ ꓡꓳ꓿
ꓝꓮꓲ ꓡꓱ-ꓬꓲ ꓡ ꓞꓳ ꓕꓲ ꓣꓳ ꓠꓬ꓾ ꓖꓳ ꓕꓲ ꓔꓳ. ꓗꓪ ꓛꓲ ꓡ ꓢꓲ ꓬꓲ ꓔꓯ ꓡꓳ ꓟꓳ ꓠꓬ꓾ ꓬꓲˍ ꓟꓲ ꓖꓳ ꓟˍ ꓡꓰ ꓐꓰ ꓖꓳ ꓫꓬ ꓗꓪ ꓐꓰ ꓗꓳ ꓙꓰˍ ꓡꓳ꓿
ꓓꓴ ꓓꓳ ꓢꓴ ꓢ-ꓟ-ꓡꓲ ꓡ ꓞꓳ ꓕꓲ ꓣꓳ ꓠꓽ꓾ ꓬꓲ ꓔꓬ ꓗꓪ ꓛꓲ ꓡ ꓢꓲ ꓬꓲ ꓔꓯ ꓟꓳ ꓗꓷ ꓠꓬ꓾ ꓫꓱ. ꓤ ꓔꓴ ꓡˍ ꓡꓳ꓿
ꓬꓲ ꓔꓯ ꓙꓰ ꓢꓲ꓾ ꓬꓲ ꓠꓻ ꓓꓴ ꓗꓪ ꓮ ꓛꓬ ꓞꓶˍ ꓐꓰ꓾ ꓛꓱ ꓡꓱ ꓙꓵ ꓧꓳꓽ ꓢꓲ ꓠꓬꓲ꓾ ꓬꓲ ꓜꓶ ꓐꓰ ꓕꓱ ꓖꓶˍ ꓡꓳ꓿ ꓝꓮꓲ ꓠꓬ ꓬꓲ ꓚꓲ ꓛꓬ ꓙꓱ ꓤ ꓗꓪ ꓜꓶ ꓝꓲ ꓢꓲ꓾ ꓪꓰ ꓤ ꓦꓲ ꓗꓪ ꓧꓳꓽ ꓔꓯ, ꓙꓰ ꓢꓲ꓾ ꓬꓲ ꓔꓯ ꓠꓬꓲ ꓙˍ ꓡꓳ꓿
ꓗ ꓠꓯ. ꓕꓲ ꓠꓬꓲ ꓠꓬ꓾ ꓬꓲ ꓒꓴ ꓠꓬꓲꓽ ꓒꓯ ꓣꓴ ꓓꓳ ꓡ ꓢꓲ ꓪꓰ ꓠꓽ ꓦꓲ ꓢꓲꓺ ꓒ ꓔꓯ ꓖꓶ ꓢꓲ ꓠꓬꓲ꓾ ꓠꓴ ꓬꓲ ꓔꓯ ꓠꓬꓲ ꓙ꓾ ꓕꓱ ꓟ ꓕꓯ ꓢꓲ ꓠꓴ ꓮ ꓫꓵ ꓣꓱ ꓗꓷ ꓥˍ ꓟꓲ꓾ ꓥꓪ ꓬꓲꓼ ꓡˍ ꓕꓯ ꓥꓪ ꓠꓴ ꓔꓯ ꓡꓲ. ꓖꓶˍ ꓥꓳ ꓐꓯˍ ꓡꓳ꓿
ꓠꓴ ꓓꓵ ꓙ ꓠꓬꓲ꓾ ꓡ ꓞꓳ ꓕꓱ ꓢ ꓣꓳ ꓠꓬ ꓒꓬ, ꓜ ꓢꓴ ꓔꓯ ꓔꓳ, ꓜꓳ ꓢꓴ ꓬꓲ ꓠꓶꓽ ꓛꓳ ꓕꓲ ꓛꓳ ꓒꓬꓱꓼ ꓡˍ ꓟ ꓠꓬ꓾ ꓮ ꓡꓲ ꓕꓲ ꓣꓳ ꓥ ꓡꓳꓺꓽ꓾ ꓐꓯˍ ꓡꓳ꓿
ꓬꓲ ꓠꓬ ꓬꓲ ꓔꓯ ꓫꓱ. ꓤ ꓢꓴ ꓖꓳ ꓕꓲ ꓣꓳ ꓐꓯˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ ꓠꓴ ꓙꓰ ꓢꓲ ꓖꓳ ꓟ ꓡꓰ ꓐꓰ ꓬꓰ꓾ ꓐꓯˍ ꓡꓳ꓿