Lisu Christian Hymnal
Hymn 40 ꓬꓰ-ꓢꓴ ꓝꓮꓲ ꓕꓲ ꓧꓪ, ꓬꓯꓼ ꓡꓰˍ ꓟ Lyrics
ꓡ ꓞꓳ ꓮ ꓐꓲ ꓠꓬ ꓐꓬꓱꓼ ꓡꓱ ꓡꓱ ꓐꓰ ꓡ ꓢꓲ꓾ ꓟꓴ ꓗꓪ ꓝꓲ ꓓꓴ ꓮ ꓙꓵ ꓬꓲˍ ꓐꓰ ꓬꓯꓼ ꓡˍ ꓕꓯ꓾ ꓬꓲ ꓠꓬ ꓬꓲ ꓐꓬꓱꓼ ꓡꓱ ꓡꓱˍ ꓟ ꓙꓵ ꓠꓬꓲꓸ ꓕꓲ ꓗꓪ ꓠꓬꓲ. ꓠꓸ ꓔꓬ ꓢꓲ꓾
ꓟꓵ ꓗꓳ ꓓꓵ ꓓꓵ ꓟ ꓞꓳ ꓫꓵꓽ ꓮ ꓙꓵꓽ ꓔꓯ ꓬꓲ ꓟꓲꓽ ꓙꓬ ꓗꓪ ꓘꓴ ꓜꓲ ꓔˍ ꓥꓳ꓿ ꓬꓲ ꓠꓬ ꓮ ꓣꓳ ꓡꓳ. ꓢꓴ ꓡꓰ ꓮ ꓣꓳ ꓐꓰ ꓮ ꓛꓵ ꓔꓯ ꓐꓱˍ ꓟ ꓡꓰ ꓐꓰ ꓬꓲ ꓪ ꓔꓯ ꓐꓱ ꓡˍ ꓥꓳ꓿
ꓖꓳ ꓡꓱ ꓢꓲ꓾ ꓮ ꓣꓳ ꓠꓬ ꓬꓲ ꓡꓯꓼ ꓙ ꓕꓲ ꓛꓱ ꓗꓪ꓾ ꓮ ꓛꓵ ꓠꓬ ꓬꓲ ꓡꓯ ꓶ. ꓕꓲ ꓛꓱ ꓗꓪ ꓔꓬ ꓝꓲˍ ꓡꓳ꓿
ꓖꓳ ꓕꓯ ꓪ ꓔꓲ ꓠꓬ ꓬꓲ ꓡꓯ ꓙ ꓕꓲ ꓛꓱ ꓗꓪ ꓔꓬ ꓢꓴ ꓔꓯ ꓕꓱ ꓡꓱ ꓐꓯˍ ꓥꓳ꓿ ꓥꓪ ꓐ, ꓐ ꓡꓰ ꓖꓶ ꓡ ꓟ ꓶꓼ ꓤ ꓫꓱ, ꓤ ꓟꓶ ꓢꓴ ꓠꓴ ꓪ ꓠꓬ ꓟꓵ ꓚꓰꓼ ꓟꓲ ꓚꓰꓼ ꓕ ꓑꓳ. ꓠꓴ ꓪ ꓐꓱ ꓶ ꓙ ꓖꓶ ꓔˍ ꓟ ꓗꓴꓷꓼ ꓘꓳ ꓣꓴ ꓡꓯ꓿
ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷˍ ꓕꓯ ꓠꓴ ꓪ ꓥꓪ ꓔꓯ ꓖꓶꓽ ꓜꓽˍ ꓡꓳ꓿ ꓥꓪ ꓢꓲꓼˍ ꓕꓯ ꓠꓴ ꓪ ꓥꓪ ꓔꓯ ꓖꓶ ꓓꓳˍ ꓡꓳ꓿ ꓥꓪ ꓞꓳ ꓬꓯꓼ ꓟꓴˍ ꓕꓯ ꓠꓴ ꓪ ꓥꓪ ꓔꓯ ꓘꓳ ꓣꓴˍ ꓡꓳ꓿
ꓥꓪ ꓖꓳ ꓓꓱ ꓙꓬ ꓡꓯˍ ꓟ ꓗꓪ꓾ ꓠꓴ ꓪ ꓥꓪ ꓔꓯ ꓖꓶ ꓖꓪ ꓡˍ ꓡꓳ꓿ ꓥꓪ ꓠꓻ ꓕꓯ꓾ ꓠꓴ ꓪ ꓥꓪ ꓔꓯ ꓠꓬꓲ ꓙˍ ꓡꓳ꓿ ꓐꓱ ꓓꓴꓽ ꓗꓪ ꓔꓬˍ ꓕꓯ ꓠꓴ ꓪ ꓥꓪ ꓔꓯ ꓔꓱ, ꓠꓬꓲ ꓡˍ ꓡꓳ꓾ ꓐꓯˍ ꓡꓳ꓿
ꓖꓳ ꓕꓯ ꓙꓲ ꓫꓬ ꓢꓴ ꓡꓰ꓾ ꓢꓲꓺ ꓒꓽꓳ ꓥꓪ ꓠꓴꓽ ꓮ ꓕꓯ ꓕꓲ ꓝꓲ. ꓗꓪ ꓠꓴ ꓦꓰꓼ ꓟꓷˍ ꓟ ꓟꓳ ꓢꓲ꓾ ꓠꓴ ꓔꓯ ꓖꓶ ꓜꓽ꓾ ꓠꓴ ꓢꓲꓼˍ ꓟ ꓗꓪ ꓠꓴ ꓔꓯ ꓖꓶ ꓓꓳˍ ꓡꓺꓽ꓿
ꓮ ꓕꓯ ꓕꓲ ꓝꓲ. ꓗꓪ ꓠꓴ ꓞꓳ ꓬꓯ ꓟꓴˍ ꓟ ꓟꓳ ꓢꓲ꓾ ꓠꓴ ꓔꓯ ꓘꓳ ꓣꓴ ꓡꓳꓺꓽ꓿ ꓠꓴ ꓖꓳ ꓓꓱ ꓙꓬ ꓡꓯ ꓟ ꓗꓪ ꓠꓴ ꓔꓯ ꓖꓶ ꓖꓪ ꓡꓳꓺꓽ꓿
ꓮ ꓕꓯ ꓕꓲ ꓝꓲ ꓗꓪ ꓠꓴ ꓠꓻ ꓔꓬ꓾ ꓥ ꓠꓬ ꓐꓱ ꓓꓴ ꓗꓪ ꓔꓬˍ ꓕꓯ꓾ ꓠꓴ ꓔꓯ ꓔꓱ, ꓠꓬꓲ ꓡˍ ꓡꓳꓺꓽ꓾ ꓐꓯˍ ꓡꓳ꓿
ꓪ ꓔꓲ ꓠꓬ ꓬꓲ ꓪ ꓔꓯ ꓕꓱ ꓡꓱ ꓒꓳ ꓖꓶˍ ꓥꓳ꓿ ꓥꓪ ꓠꓴ ꓪ ꓔꓯ ꓔꓱ ꓔꓱˍ ꓐꓰ ꓐꓯ ꓖꓶ ꓠꓬꓲ꓾ ꓠꓴ ꓪ ꓥꓪ ꓬꓲꓼ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓣꓳ ꓓꓰˍ ꓟ ꓕꓲ ꓣꓳ ꓔꓯ ꓬꓰ ꓙˍ ꓟ ꓠꓬ ꓥꓪ ꓔꓯ ꓬꓰ ꓙˍ ꓟ ꓥ ꓡꓳ꓾ ꓐꓯ ꓡꓳ꓿
ꓖꓳ ꓕꓯ ꓬꓲ ꓠꓬ ꓡꓯ ꓶ. ꓕꓲ ꓛꓱꓽ ꓗꓪ ꓔꓬ ꓢꓴ ꓔꓯ ꓐꓯˍ ꓥꓳ꓿ ꓙꓱꓽ ꓔ ꓢꓴ ꓠꓴ ꓪꓼꓳ ꓥꓪ ꓔꓯ ꓐꓰ ꓧ, ꓙꓰ ꓢꓲ꓾ ꓠꓲꓽ ꓪ ꓔꓲˍ ꓐꓰ ꓬꓲ ꓝꓲ ꓓꓴ ꓐꓴ ꓐꓱ ꓶ ꓙ ꓖꓶ ꓔ ꓟ ꓕꓲ ꓞꓲꓼ ꓕꓲ ꓑ ꓟ ꓮ. ꓔꓳ. ꓗꓪ ꓓꓵ ꓙꓰ꓿
ꓮ ꓡꓲꓳ ꓐꓯ ꓠꓬ ꓥꓪ ꓦꓰꓼ ꓟꓷꓼˍ ꓕꓯ ꓠꓴ ꓪ ꓥꓪ ꓔꓯ ꓟꓽ ꓖꓶ ꓜꓽ ꓡ꓿ ꓥꓪ ꓢꓲꓼ ꓕꓯ ꓥꓪ ꓔꓯ ꓟ ꓖꓶꓽ ꓓꓳ ꓡ꓿
ꓥꓪ ꓞꓳ ꓬꓯ ꓟꓴˍ ꓕꓯ꓾ ꓠꓴ ꓪ ꓥꓪ ꓔꓯ ꓟꓽ ꓘꓳˍ ꓣꓴ꓿ ꓙꓬ ꓡꓯˍ ꓟ ꓗꓪ꓾ ꓠꓴ ꓪ ꓥꓪ ꓔꓯ ꓟꓽ ꓖꓶ ꓖꓪ ꓡ꓿ ꓠꓻ ꓢꓲ꓾ ꓐꓱ ꓓꓴ ꓗꓪ ꓔꓬˍ ꓕꓯ ꓠꓴ ꓪ ꓥꓪ ꓔꓯ ꓟꓽ ꓠꓬꓲ ꓙ ꓡ ꓐꓯˍ ꓡꓳ꓿
ꓖꓳ ꓕꓯ ꓬꓲ ꓪ ꓟꓲ ꓕꓱ ꓡꓱ ꓒꓳ ꓖꓶ ꓥꓳ꓿ ꓢꓲꓺ ꓒꓽꓳ ꓥꓪ ꓠꓴ ꓠꓬ ꓮ ꓕꓯ ꓕꓲ ꓝꓲ ꓗꓪ ꓠꓴ ꓦꓰꓼ ꓟꓷꓼˍ ꓟ꓾ ꓥˍ ꓠꓬ꓾ ꓢꓲꓼˍ ꓟ꓾ ꓥˍ ꓠꓬ꓾ ꓞꓳ ꓬꓯꓼ ꓟꓴˍ ꓟ꓾ ꓥˍ ꓠꓬ꓾ ꓖꓳ ꓓꓱ ꓙꓬ ꓡꓯˍ ꓟ꓾ ꓥ ꓠꓬ ꓠꓻˍ ꓟ꓾ ꓥ ꓠꓬ ꓐꓱ ꓓꓴꓽ ꓗꓪ ꓔꓬˍ ꓟ ꓔꓯ ꓟꓳꓻ ꓢꓲ꓾ ꓠꓴ ꓔꓯ ꓟꓽ ꓣꓱ ꓙ ꓡꓳ? ꓐꓯˍ ꓡꓳ꓿
ꓬꓲ ꓠꓬ ꓬꓲ ꓪ ꓔꓯ ꓕꓱ ꓡꓱ ꓒꓳ ꓖꓶ ꓥꓳ꓾ ꓥꓪ ꓠꓴ ꓪ ꓔꓯ ꓔꓱ ꓔꓱˍ ꓐꓰ ꓐꓯ ꓖꓶˍ ꓠꓬꓲ꓾ ꓠꓴ ꓪ ꓥꓪ ꓬꓲ ꓥꓪ ꓠꓬꓲ ꓐꓴ ꓗꓳ ꓡꓳ ꓗꓪ ꓣꓳ ꓓꓰˍ ꓟ ꓕꓲ ꓣꓳ ꓔꓯ ꓟꓽ ꓬꓰ ꓙ ꓟ ꓠꓬ ꓥꓪ ꓔꓯ ꓟꓽ ꓬꓰ ꓙ ꓟ ꓥ ꓡꓳ꓾ ꓐꓯˍ ꓡꓳ꓿
ꓖꓳ ꓡꓱ ꓠꓬ ꓕꓱ ꓕꓲ ꓧꓳꓽ ꓠꓽ꓾ ꓕꓲ ꓞꓲꓼ ꓕꓲ ꓑ ꓛꓬ ꓒꓵ ꓟꓶˍ ꓟ ꓗꓪ ꓙꓰˍ ꓥꓳ꓿ ꓙꓲ ꓫꓬ ꓟ ꓖꓳ ꓕꓲ ꓧꓳꓽ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓗꓪ ꓙꓰˍ ꓥꓳ ꓐꓰ꓾ ꓐꓯ ꓖꓶˍ ꓡꓳ꓿