Lisu Christian Hymnal

Hymn 4 ꓫ ꓙꓵ ꓟ ꓗꓪ ꓬꓰ ꓙ ꓓꓴ ꓟꓶ ꓗꓷ ꓠꓬꓲ ꓫꓸ ꓟꓳˍ ꓟ Lyrics

ꓮ ꓡꓲ ꓕꓲ ꓝꓲꓸ ꓗꓪ ꓥ ꓟꓲ ꓥꓪ ꓠꓬ ꓬꓰ-ꓧꓳ-ꓧꓪ ꓔꓯ ꓫꓱ. ꓖꓶ ꓥꓳ꓿ ꓬꓲ ꓔꓯ ꓓꓳ ꓟꓴ ꓘꓶ ꓠꓬ ꓮ ꓕꓯˍ ꓟꓲ ꓥꓪ ꓟꓷ ꓠꓷ ꓗꓪ ꓓꓯ,ˍ ꓥꓳ꓿
ꓥꓪ ꓠꓲ ꓟ ꓠꓬ ꓬꓰ-ꓧꓳ-ꓧꓪ ꓗꓪ ꓐꓰ ꓘꓶꓽ ꓘˍ ꓥꓳ꓿ ꓙ ꓣꓳ ꓢꓴ ꓠꓬ ꓬꓲ ꓓꓳꓽ ꓑ ꓙ ꓢꓲ ꓠꓲ ꓒꓴˍ ꓥꓳ꓿
ꓳ꓾ ꓥꓪ ꓐꓰ ꓕꓲ ꓛꓳ ꓬꓰ-ꓧꓳ-ꓧꓪ ꓔꓯ ꓫꓱ. ꓖꓶ ꓡꓯ꓿ ꓣꓳ ꓠꓬ ꓕꓲ ꓪˍ ꓐꓰ ꓬꓲ ꓟꓬꓱꓸꓸ ꓔꓯ ꓓꓳ, ꓟꓴ ꓡꓯ꓿
ꓥꓪ ꓠꓬ ꓬꓰ-ꓧꓳ-ꓧꓪ ꓔꓯ ꓧꓪ ꓓꓰˍ ꓠꓬ꓾ ꓬꓲ ꓥꓪ ꓔꓯ ꓒꓳꓹ ꓖꓶ ꓡ ꓢꓲ ꓥꓪ ꓙꓳꓸꓸ ꓓꓴ ꓮ ꓙꓵ ꓟ ꓗꓪ ꓐꓰ ꓥꓪ ꓔꓯ ꓚꓬꓴ ꓓꓳ ꓡꓻꓳ꓿
ꓬꓲ ꓪ ꓬꓲ ꓔꓯ ꓡꓳꓸ ꓗꓷ ꓠꓬ ꓐꓬꓱꓼ ꓡꓱꓼ ꓡꓰˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓪ ꓮ ꓕꓯ ꓟꓲ ꓒꓬꓱꓽ ꓟꓬ ꓟꓽ ꓛꓴꓻ ꓞ ꓡꓰ꓿
ꓞꓳ ꓫꓸ ꓥꓪˍ ꓟꓲ ꓘꓴ ꓓꓰꓽ ꓗꓷ ꓠꓬ꓾ ꓬꓰ-ꓧꓳ-ꓧꓪ ꓓ ꓔꓳ, ꓖꓶ ꓢꓲ ꓫ ꓟ ꓮ ꓙꓵ ꓟ ꓗꓪ ꓐꓰ ꓥꓪ ꓔꓯ ꓚꓬꓴ ꓓꓳ ꓡꓻꓳ꓿
ꓬꓰ-ꓧꓳ-ꓧꓪ ꓬꓲ ꓝꓲ ꓓꓴ ꓠꓬ ꓬꓲ ꓔꓯ ꓙꓳꓸꓸ ꓒꓵ ꓢꓴ ꓚꓳ ꓡꓳ ꓡꓳ ꓗꓪ ꓟꓯꓼ ꓒꓱ ꓬꓰ ꓢꓲꓸ ꓬꓲ ꓪ ꓔꓯ ꓚꓬꓴ ꓙˍ ꓡꓳ꓿
ꓳ꓾ ꓬꓰ-ꓧꓳ-ꓧꓪ ꓠꓬ ꓙꓲˍ ꓡꓳ ꓐꓰ ꓢꓳꓽ ꓠꓬꓲ ꓢꓲ ꓤ, ꓟꓶ ꓡꓰ ꓝꓲ ꓡꓯ꓿ ꓬꓲ ꓠꓯꓸꓼ ꓗꓪ ꓫ ꓑꓬ ꓖꓴ ꓬꓰˍ ꓟ ꓡ ꓞꓳ ꓠꓬ ꓶ ꓙꓳ ꓫꓱ ꓙꓳˍ ꓡꓳ꓿
ꓬꓰ-ꓧꓳ-ꓧꓪ ꓬꓲ ꓢꓲ ꓫꓬ ꓢꓴ ꓠꓴ ꓪꓽꓳ꓾ ꓬꓲ ꓔꓯ ꓙꓳꓺ ꓒꓵ ꓠꓯˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓙꓳꓺ ꓒꓵ ꓢꓴ ꓬꓲ ꓪ ꓔꓯ ꓠꓽ ꓟꓽ ꓡꓳꓼ꓾ ꓐꓰ ꓟꓽ ꓗꓷ ꓡꓰ ꓝꓲ꓿
ꓡꓽ ꓢꓯꓹ ꓤ ꓠꓽ ꓜꓽ ꓓꓴ ꓟꓽ ꓡꓳꓼ ꓢꓲ ꓦꓰꓼ ꓟꓷꓼ ꓜꓲꓽˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓰ-ꓧꓳ-ꓧꓪ ꓔꓯ ꓧꓪꓸꓸ ꓓꓰꓽ ꓢꓴ ꓠꓽ ꓙꓲˍ ꓟ ꓕꓲ ꓫꓵꓽˍ ꓟꓲ ꓟꓽ ꓡꓳꓼ꓾ ꓐꓰ ꓟꓽ ꓗꓷ ꓡꓰ꓿
ꓬꓰ-ꓧꓳ-ꓧꓪ ꓠꓬ ꓬꓲ ꓚꓳ ꓑ ꓐꓴ ꓢꓯꓼ ꓟꓬ ꓔꓯ ꓫꓴ ꓣꓴˍ ꓡꓳ- ꓬꓲ ꓠꓯꓸꓼ ꓗꓪ ꓫꓸ ꓑꓬ ꓖꓴ ꓬꓰ ꓢꓴ ꓮ ꓟ ꓔꓯˍ ꓟꓲ ꓝꓴꓲ. ꓐꓯ ꓞꓷꓹ ꓓꓴ ꓟꓽ ꓙꓳ꓿