Lisu Christian Hymnal
Hymn 39 ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓧꓪ. ꓡꓰ ꓟ Lyrics
ꓖꓳ ꓡꓱ ꓠꓬꓲ ꓮ ꓟꓶ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓔꓬ ꓢꓴ ꓔꓯ ꓠꓬ ꓝꓴꓲ ꓓꓰꓺ ꓘꓶꓽ ꓟꓽ ꓙꓳ꓿
ꓮ ꓡꓲꓳ ꓐꓯˍ ꓠꓬ꓾ ꓙꓲ-ꓢꓴ ꓬꓰ-ꓢꓴ ꓠꓯꓸꓼ ꓗꓪ ꓢꓯꓼ ꓟꓬ ꓖꓶꓽ ꓢꓴ ꓦꓻ ꓬꓲ ꓙꓵꓻ ꓗ ꓡꓰ꓾ ꓝꓴꓲ ꓐꓰ ꓫꓵꓻ ꓬꓲ ꓙꓵ ꓗ ꓗꓪ ꓐꓰ ꓥꓪ ꓔꓯ ꓩꓴ ꓗꓷꓳ꓿
ꓮ ꓡꓲꓳ ꓐꓯ ꓠꓬ ꓧꓪ ꓖꓳ ꓓꓱ ꓗꓪ ꓢꓯꓼ ꓐ ꓠꓬꓲ ꓙꓵ ꓗ ꓬꓰ ꓟꓽ ꓐ ꓡ ꓟ ꓔꓯ꓾ ꓪꓴ-ꓢ ꓠꓬ ꓬꓲ ꓚꓲ ꓛꓬ ꓮ ꓐꓲ ꓔꓯ ꓝꓴꓲ ꓐꓱ ꓶ ꓝꓲ ꓩꓴ ꓡ ꓢꓲ꓾ ꓣꓳ ꓝꓴꓲ ꓙꓳˍ ꓟ ꓧꓪ ꓖꓳ ꓓꓱ ꓒꓬꓱꓽ ꓶ ꓡꓰ ꓝꓲ ꓢꓲ ꓠꓬꓲ꓾ ꓧꓪ ꓖꓳ ꓓꓱ ꓠꓯꓸꓼ ꓗꓪ ꓟ ꓝꓴꓲ ꓓꓰ ꓘꓶ ꓐꓯ ꓞꓷˍ ꓡꓳ꓿
ꓕꓱ ꓟ ꓠꓬ ꓧꓪꓽ ꓠꓲ, ꓡꓶ ꓔꓯ ꓟꓽ ꓛꓳ ꓢꓲ꓾ ꓦ ꓗꓪ ꓫꓱ ꓢꓴ ꓣꓳ ꓠꓯꓸꓼ ꓗꓪ ꓙꓵ ꓗ ꓗꓪ ꓟ ꓕꓵꓼ ꓪ ꓬꓰ ꓐꓲ ꓡ ꓝꓲ ꓠ ꓟ ꓥ ꓡꓳ꓿
ꓮ ꓡꓲꓳ ꓐꓯˍ ꓠꓬ ꓧꓪꓽ ꓠꓲ ꓡꓶꓼ ꓛꓳ ꓢꓴ ꓠꓬ ꓧꓪꓽ ꓗꓪ ꓟ ꓔꓯ ꓥꓳꓺˍ ꓡꓳ꓿ ꓦ ꓔꓯ ꓛꓳ ꓢꓴ ꓠ ꓦ ꓗꓪ ꓟ ꓔꓯ ꓥꓳꓺˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓧꓪꓽ ꓠꓲ, ꓡꓶ ꓔꓯ ꓥꓳꓺˍ ꓟ ꓠꓬ ꓫꓵꓻˍ ꓟ ꓥ ꓡꓳ꓿ ꓦ ꓥꓳꓺˍ ꓟ ꓠꓽ ꓢꓯꓼ ꓟꓬˍ ꓐꓰ ꓢꓲ ꓡꓲˍ ꓟ ꓥ ꓡꓳ꓿
ꓧꓪꓽ ꓠꓲ, ꓡꓶ ꓔꓯ ꓥꓳꓺˍ ꓟ ꓠꓬ ꓪꓴ-ꓢ ꓔꓯ ꓛꓴ ꓙꓳˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓧꓪꓽ ꓠꓲ, ꓡꓶ ꓠꓽ ꓪꓴ-ꓢ ꓙꓵꓽ ꓗ ꓔꓯ ꓟꓽ ꓛꓳ꓾ ꓐ ꓟꓲ ꓟꓽ ꓐ ꓡ꓿
ꓖꓳ ꓡꓱ ꓠꓬꓲ ꓧꓪꓽ ꓠꓲ, ꓡꓶ ꓔꓯ ꓛꓳ ꓢꓴ ꓠꓬ ꓪꓴ-ꓢ ꓔꓯ ꓠꓲ, ꓒꓴ ꓡꓰ ꓝꓲ ꓟꓽ ꓐ ꓡ꓿
ꓖꓳ ꓡꓱ ꓥˍ ꓟꓲ ꓪꓴ-ꓢ ꓦ ꓠꓴ ꓪ ꓠꓯꓸꓼ ꓗꓪ ꓔꓬˍ ꓕꓯ ꓠꓽ ꓠꓴ ꓪ ꓠꓬ ꓧꓪꓽ ꓗꓪ ꓟ ꓟꓽ ꓥ꓾ ꓦ ꓗꓪ ꓟ ꓥꓳ꓿ ꓮ ꓡꓲ ꓕꓲ ꓣꓳˍ ꓟꓲ ꓙꓲ-ꓢꓴ ꓦꓻ ꓟ ꓙꓳ ꓕꓯ ꓠꓽ ꓖꓳ ꓕꓲ ꓣꓳ ꓠꓬ ꓬꓲ ꓔꓯˍ ꓟ ꓟꓽ ꓥ꓿
ꓙꓲ-ꓢꓴ ꓠꓬ ꓠꓴ ꓪ ꓠꓯꓸꓼ ꓗꓪ ꓔꓬ ꓕꓯ ꓠꓽ ꓖꓳ ꓓꓱ ꓠꓬ ꓝꓴꓲ ꓗꓪ ꓐꓰ ꓫꓵꓻ ꓞˍ ꓡꓳ꓿ ꓦ ꓠꓽ ꓙꓲ ꓫꓬ ꓟ ꓗꓪ ꓐꓰ ꓢꓯ. ꓞ ꓡꓳ꓿
ꓖꓳ ꓡꓱ ꓥ ꓟꓲ ꓬꓰ-ꓢꓴ ꓔꓯ ꓫꓵꓻˍ ꓟ ꓗꓪ ꓐꓰ ꓢꓯ. ꓬꓲꓼ ꓡ ꓝꓲ ꓢꓴ ꓬꓲ ꓦ ꓠꓴ ꓪ ꓠꓯꓸꓼ ꓗꓪ ꓔꓬ ꓕꓯ ꓠꓽ ꓙꓲ-ꓢꓴ ꓔꓯ ꓫꓵꓻˍ ꓟ ꓗꓪ ꓐꓰ ꓢꓯ. ꓬꓲꓼ ꓡ ꓝꓲ ꓢꓴ ꓡꓰ ꓠꓴ ꓪ ꓠꓯꓸꓼ ꓗꓪ ꓔꓬ ꓟ ꓬꓲ ꓦ ꓗꓪ ꓐꓰ ꓠꓴ ꓪ ꓫꓵꓻ ꓠꓯ, ꓟ ꓖꓳ ꓓꓱ ꓔꓯˍ ꓟꓲ ꓢꓯ. ꓡ ꓝꓲ ꓥꓳ꓿
ꓖꓳ ꓡꓱ ꓠꓬꓲ ꓬꓲ ꓤ ꓠꓬꓲ ꓐꓴꓳ꓾ ꓣꓳ ꓠꓬ ꓧꓪꓽ ꓠꓲ, ꓡꓶ ꓔꓯ ꓛꓳ ꓢꓲ꓾ ꓢꓯ. ꓔꓬ ꓠꓯˍ ꓟ ꓧꓪꓽ ꓠꓲ, ꓡꓶ ꓔꓯ ꓐꓵ ꓞˍ ꓢꓴ ꓟꓽ ꓥ꓿
ꓮ ꓡꓲꓳ ꓐꓯ ꓠꓬ ꓠꓴ ꓪ ꓧꓪꓽ ꓠꓲ, ꓡꓶ ꓔꓯ ꓛꓳ ꓢꓲ ꓢꓯ. ꓔꓬ ꓕꓯꓽ ꓠꓽ꓾ ꓠꓴ ꓪ ꓫꓵꓻ ꓠ ꓗˍ ꓡꓳ꓿ ꓖꓳ ꓡꓱ ꓥˍ ꓟꓲ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓖꓳ ꓓꓱ ꓬꓰˍ ꓟ ꓔꓯ ꓠꓴ ꓪ ꓫꓵ ꓝꓲˍ ꓕꓯ꓾ ꓠꓴ ꓪ ꓢꓯ ꓔꓬ ꓥꓳ꓿
ꓮ ꓡꓲꓳ ꓐꓯ ꓠꓬ ꓪꓴ-ꓢ ꓦ ꓡꓰ ꓧꓳ ꓙꓰˍ ꓟ ꓥ ꓕ ꓑꓳ ꓠꓬ ꓪꓴ-ꓢ ꓤ ꓥ ꓡꓳ꓿