Lisu Christian Hymnal

Hymn 36 ꓒꓴ ꓤ ꓫꓵ ꓤ ꓮ ꓡꓲ ꓗꓪ ꓗꓶꓺ ꓔ ꓠꓯˍ ꓟ Lyrics

ꓟꓲ ꓠꓯ ꓕꓯ ꓢꓲ꓾ ꓧꓪꓽ ꓟꓵ ꓐꓵꓽ ꓡꓴ,ˍ ꓐꓰ ꓙꓲꓽ ꓜꓽ ꓡˍ ꓟ ꓗꓪ ꓞꓳ ꓘꓴꓽˍ ꓟꓲ ꓦꓲ ꓓꓵꓽ ꓢꓲ ꓘꓴꓽ ꓡˍ ꓟ ꓗꓪ ꓠꓴ ꓪ ꓚꓲ ꓛꓬ ꓐꓱ ꓶꓽ ꓒꓵꓽ ꓶꓽ ꓕꓽ ꓝꓰꓺ ꓔ꓿
ꓟꓴ ꓗꓪ ꓕꓯ ꓢꓲ ꓧꓪꓽ ꓟꓵ ꓐꓵꓽ ꓡꓴ,_ ꓐꓰ ꓙꓲ ꓟꓽ ꓜꓽ ꓡ ꓟ ꓗꓪ ꓞꓳ ꓘꓴꓽ ꓡꓰ ꓦꓲ ꓓꓵ ꓢꓲ ꓘꓴꓽ ꓡˍ ꓟ ꓟꓽ ꓙꓳ ꓟ ꓗꓪ ꓠꓴ ꓪ ꓚꓲ ꓛꓬ ꓐꓱ ꓶꓽ ꓒꓵꓽ ꓶꓽ ꓝꓰꓺ ꓔ꓿
ꓮ ꓡꓲꓳ ꓐꓯ ꓠꓬ ꓠꓴ ꓪ ꓒꓵ ꓶꓽ ꓮ ꓡꓲ ꓗꓪ ꓓ,ˍ ꓠꓬ ꓠꓴ ꓪ ꓠꓲ, ꓟˍ ꓟꓲ ꓖꓳ ꓗꓪ ꓓ,ˍ ꓡꓳ꓿
ꓖꓳ ꓓꓱ ꓗꓪ ꓟ ꓟꓬ ꓡꓴ ꓠꓬ ꓟꓬ ꓢꓶꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓴ ꓟꓬ ꓢꓶ ꓢꓲꓽ ꓢꓲꓽˍ ꓡꓰ ꓗˍ ꓕꓯ ꓠꓽ ꓕꓲ ꓖꓳ ꓓꓱ ꓡꓱꓸꓼ ꓠꓬꓲ ꓟꓳꓻ ꓓꓴ ꓐꓲꓺ ꓞ, ꓥꓳ꓿
ꓠꓴ ꓟꓬ ꓢꓶ ꓐꓬ ꓡꓰˍ ꓕꓯ ꓠꓽ ꓠꓴ ꓕꓲ ꓖꓳ ꓓꓱ ꓡꓱꓸꓼ ꓠꓯꓺ ꓞꓲ, ꓠꓯꓺ ꓕꓳꓽ ꓗꓷ ꓡꓰ ꓥꓳ꓿ ꓖꓳ ꓡꓱ ꓠꓬꓲ ꓠꓴ ꓠꓯꓸꓼ ꓗꓪ ꓟ ꓠꓬꓲ ꓟꓳ ꓓꓴ ꓠꓯꓺ ꓞꓲ ꓡꓰˍ ꓠꓬ ꓠꓯꓺ ꓞꓲ,ˍ ꓟ ꓖꓳ ꓟ ꓮ ꓘꓶ. ꓪꓴˍ ꓡꓳ ꓟ꓿
ꓮ ꓟ ꓥˍ ꓟꓲ ꓢꓲꓺ ꓒ ꓠꓬꓲꓽ ꓣꓳ ꓔꓯ ꓣꓱ ꓙ ꓟꓽ ꓐ ꓡ꓿ ꓮ ꓡꓲꓳ ꓐꓯ ꓠꓬ ꓕꓱ ꓕꓲ ꓣꓳ ꓔꓯ ꓠꓲ, ꓜꓳ ꓢꓲ꓾ ꓖꓳ ꓕꓲ ꓣꓳ ꓔꓯ ꓠꓲ, ꓠꓵˍ ꓥꓳ꓿ ꓥ ꓠꓬ ꓕꓱ ꓕꓲ ꓣꓳ ꓔꓯ ꓟꓳꓻ ꓟꓵ ꓢꓲ꓾ ꓖꓳ ꓕꓲ ꓣꓳ ꓔꓯ ꓟꓳꓻ ꓟꓽ ꓟꓵ ꓐꓰ ꓗˍ ꓥꓳ꓿ ꓠꓴ ꓪ ꓠꓬ ꓪꓴ-ꓢ ꓔꓯ ꓟꓽ ꓣꓱ ꓙ ꓒꓴ ꓤ ꓫꓵ ꓤ ꓔꓯˍ ꓟꓲ ꓣꓱ ꓙ ꓐꓰ ꓬꓰ ꓟꓽ ꓒꓬꓱꓼ ꓡ꓿
ꓖꓳ ꓡꓱ ꓠꓬꓲ ꓥꓪ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ ꓒꓵ ꓪ ꓢꓯꓼ ꓟꓬ ꓪꓴ. ꓠꓬꓲ ꓮ ꓫꓵꓽ ꓜꓽ ꓮ ꓫꓵꓽ ꓓꓳ ꓠꓯˍ ꓟ ꓐꓰ ꓖꓳ ꓓꓱ ꓪꓴ. ꓠꓬꓲ ꓮ ꓫꓵꓽ ꓖꓪ ꓠꓯˍ ꓟ ꓕꓽ ꓙ ꓫ꓿ ꓢꓯꓼ ꓟꓬ ꓠꓬ ꓜꓽ ꓓꓴ ꓢꓲ ꓟꓽ ꓞꓲ ꓒꓵ ꓡꓳ ꓟꓽ ꓥ ꓡ? ꓖꓳ ꓓꓱˍ ꓟꓲ ꓖꓪ ꓓꓴ ꓢꓲ ꓟꓽ ꓞꓲ ꓒꓵˍ ꓡꓳ ꓟꓽ ꓥ ꓡ?
ꓟꓴ ꓪꓴ ꓗꓪ ꓟ ꓠꓬ, ꓤ ꓔꓯ ꓡꓳ. ꓠꓬꓲ꓾ ꓬꓲ ꓪ ꓠꓬ ꓫꓵ.ˍ ꓟꓲ ꓟꓽ ꓫꓵ.꓾ ꓶꓼˍ ꓟꓲ ꓟꓽ ꓶꓼ꓾ ꓜꓻ ꓗ, ꓗꓪˍ ꓟꓲ ꓟꓽ ꓫ ꓓꓵ ꓡ꓿ ꓟꓴ ꓗꓪ ꓗꓪ ꓟ ꓠꓴ ꓪ ꓐ ꓐ ꓠꓽ ꓬꓲ ꓪ ꓔꓯ ꓦꓵ ꓔꓬ ꓡꓳ꓿ ꓠꓴ ꓪ ꓠꓬ ꓬꓲ ꓪ ꓕꓯ ꓢꓲ ꓮ ꓘꓶ ꓒꓵˍ ꓡꓳ ꓟꓽ ꓥ ꓡ?
ꓠꓴ ꓪ ꓮ ꓡꓲ ꓕꓲ ꓣꓳ ꓠꓬ ꓙ ꓫ ꓟ ꓗꓪ ꓐꓰ ꓚꓲ ꓛꓬ ꓤꓶ ꓔꓯ ꓕꓲ ꓛꓬ, ꓫꓵꓺ ꓡ ꓝꓲ ꓗꓴˍ ꓡꓺꓽ꓿
ꓮ ꓫꓵꓽ ꓪꓴ ꓠꓬꓲ꓾ ꓶꓼ ꓓꓴ ꓖꓪ ꓓꓴ ꓐꓱ ꓶ ꓙ ꓫ ꓡꓳꓺꓽ꓿ ꓡꓲ ꓛꓲ ꓗꓪ ꓟ ꓬꓲ, ꓫꓵꓺ ꓪꓰꓺ ꓮ ꓡꓲ ꓐꓰ ꓪꓴꓽ ꓡˍ ꓟ ꓔꓯ ꓓꓵ ꓙ ꓠꓬꓲ꓾ ꓢꓲ, ꓪꓰ ꓖꓳ ꓟ ꓠꓽ ꓢꓯꓼˍ ꓟꓲ ꓟꓽ ꓢꓯꓼ ꓕꓵꓼ꓾ ꓛꓲ ꓤ ꓟꓲ ꓟ ꓑꓴ꓿
ꓖꓳ ꓡꓱ ꓥˍ ꓟꓲ ꓥꓪ ꓠꓴ ꓪ ꓔꓯ ꓐꓯ ꓖꓶ ꓠꓬꓲ꓾ ꓢꓳ-ꓡꓳ-ꓟꓳ ꓟꓬꓱ ꓓꓳꓽ ꓮ ꓘꓶ. ꓙꓳˍ ꓕꓯ ꓥˍ ꓟꓲ꓾ ꓬꓲ ꓠꓬ ꓕꓱ ꓡꓱ ꓫꓵꓽ ꓢꓲ, ꓪꓰ ꓕꓲ ꓛꓵˍ ꓡꓰ ꓐꓰ ꓟꓽ ꓪ ꓖꓪ꓿
ꓙꓵꓻ ꓠꓲ, ꓣꓳ ꓢꓴꓳ꓾ ꓡꓲ ꓛꓲ ꓗꓪ ꓟ ꓟꓳꓼ ꓤ ꓫꓵ. ꓤ ꓠꓬꓲ. ꓠꓬꓲ ꓕꓲꓽ ꓠꓬꓲ ꓓ, ꓢꓲ꓾ ꓢ, ꓖꓶ ꓕꓲ ꓠꓬꓲ ꓠꓬ ꓡꓴ, ꓝꓳ ꓗꓪ ꓡꓳ. ꓧꓳꓽ ꓓꓴ ꓥˍ ꓟꓲ ꓪꓴ-ꓢ ꓡꓰ ꓖꓳ ꓡꓱ ꓫꓵ ꓔꓯ ꓬꓲ ꓕꓱ ꓡꓱ ꓖꓶꓽ ꓖꓪˍ ꓠꓬ ꓠꓴ ꓪ ꓔꓯ ꓪ ꓜꓲ ꓖꓶꓽ ꓖꓪ ꓡˍ ꓥꓳ ꓟꓽ ꓥ ꓡꓺꓽ꓿
ꓖꓳ ꓡꓱ ꓠꓬꓲ ꓙ ꓫ ꓢꓲ ꓣꓳ ꓮ ꓫꓵ ꓜꓽ ꓠꓯˍ ꓡꓳꓺꓽ꓿ ꓥ ꓠꓬ ꓣꓳ ꓮ ꓫꓵꓽ ꓓꓳꓻ ꓠꓯ ꓡꓳꓺꓽ꓿ ꓥ ꓠꓬ ꓣꓳ ꓮ ꓫꓵ ꓖꓪꓽ ꓠꓯˍ ꓡꓳꓺꓽ꓿ ꓐꓰ ꓕꓽ ꓐꓯ꓿
ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓟ ꓔꓯ ꓠꓬ ꓐꓶ ꓞꓳ ꓡꓰ ꓧꓪˍ ꓡꓳ꓿ ꓖꓴ ꓙꓴ ꓕꓱ ꓟꓬ ꓟ ꓮ ꓙꓵ ꓠꓬ ꓠꓴ ꓪ ꓣꓱ ꓬꓯꓼˍ ꓟ ꓥ ꓡꓳ ꓐꓰ꓾ ꓟꓴ ꓗꓪ ꓗꓪ ꓟ ꓠꓴ ꓪ ꓐ ꓐ ꓢꓷ ꓡꓳ꓿
ꓠꓴ ꓪ ꓠꓽ ꓬꓲ ꓗꓴꓷ ꓐꓰ ꓬꓲ ꓙꓲ ꓫꓬˍ ꓟ ꓔꓯ ꓧꓶ. ꓕꓯ ꓧꓪ꓿ ꓖꓳ ꓡꓱ ꓠꓬ ꓖꓴꓽ ꓙꓴꓽ ꓕꓱ ꓟꓬ ꓟ ꓮ ꓙꓵ ꓠꓴ ꓪ ꓔꓯ ꓡꓴꓽ ꓖꓶ ꓡˍ ꓥꓳ꓿