Lisu Christian Hymnal
Hymn 31 ꓙꓵꓻ ꓠꓲ ꓗꓪ ꓐꓰ ꓧꓪ. ꓡꓰˍ ꓟ Lyrics
ꓙꓵꓻ ꓠꓲ ꓠꓬ ꓥꓳ ꓡꓳ. ꓓꓴ ꓬꓲ ꓑꓰꓹ ꓒꓬꓱꓼ ꓡˍ ꓟ ꓥ ꓢꓲ꓾ ꓟꓽ ꓟꓳ ꓗꓷ ꓢꓰ ꓟ ꓬꓲ ꓗ. ꓚꓵ ꓥ ꓡꓳ꓿
ꓮ ꓡꓲꓳ ꓐꓯ ꓠꓬ ꓮ ꓠꓱ ꓟ ꓞꓳ ꓤ ꓟꓬꓱꓺ ꓓꓳ ꓟꓶˍ ꓟ ꓠꓬ ꓙꓵꓻ ꓠꓲ, ꓕꓱ ꓟ ꓗꓪ ꓐꓰ ꓥ ꓡꓳ꓿
ꓣꓳ ꓠꓬ ꓙꓵꓻ ꓠꓲ ꓗꓪ ꓐꓰ ꓟꓲ ꓠꓯ ꓕꓱ ꓟꓬ ꓟ ꓮ ꓙꓵ ꓪꓴ-ꓢ ꓐꓯ ꓘꓶ ꓗꓪ ꓐꓰ ꓒꓬꓱꓼ ꓡˍ ꓟ ꓥ ꓡꓳ ꓐꓰ ꓙ ꓜꓲꓼ ꓡꓳ꓿ ꓖꓳ ꓡꓱ ꓢꓲ ꓡꓳ. ꓟꓳˍ ꓟ ꓠꓬ ꓟꓳ ꓓ ꓡꓳ ꓫꓵꓽ ꓣꓱ ꓢꓲ ꓚꓰꓼ ꓓꓳ ꓡˍ ꓟ ꓟꓽ ꓥ꓿
ꓮ-ꓐꓱ ꓠꓬ ꓙꓵꓻ ꓠꓲ ꓗꓪ ꓐꓰ ꓗꓷ-ꓬꓲ ꓔꓲ ꓖꓶˍ ꓟ ꓕꓯ ꓢꓲ ꓙꓲˍ ꓟ ꓔꓲ ꓓꓴ ꓪꓴ-ꓢ ꓔꓯ ꓔꓲ ꓖꓶ ꓡꓳ꓿ ꓕꓱ ꓟ ꓗꓪ ꓐꓰ ꓬꓲ ꓠꓬ ꓙꓲ ꓫꓬˍ ꓟ ꓥˍ ꓟ ꓢꓷ ꓙ ꓟꓳ ꓙ ꓓꓴ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓡꓯ ꓫꓴ ꓔꓯ ꓖꓴ ꓢꓲ꓾ ꓢꓷ ꓙ ꓟꓳ ꓙ ꓓꓴ ꓟꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓡꓰ ꓬꓲ ꓡꓯ ꓫꓴ ꓔꓯ ꓖꓴ ꓢꓲ꓾ ꓢꓷ. ꓙ ꓟꓳ ꓙ ꓡꓳ꓿ ꓬꓲ ꓠꓬ ꓙꓵꓻ ꓠꓲ, ꓕꓱ ꓟ ꓗꓪ ꓐꓰ ꓫꓵꓻ ꓗꓷ ꓥˍ ꓟꓲ ꓫ ꓕꓱ ꓔꓬ ꓢꓰꓽ ꓡꓳ꓿
ꓖꓳ ꓡꓱ ꓠꓬ ꓥꓪ ꓝꓮꓲ ꓮ ꓫꓵꓽ ꓐꓯ ꓠꓯ ꓢꓰꓽ ꓡ꓿ ꓮ ꓡꓲꓳ ꓐꓯ ꓠꓬ ꓖꓷ-ꓓꓰ-ꓬꓴ ꓐꓰ ꓐ-ꓣ-ꓗꓷ ꓐꓰ ꓢ-ꓟꓷ-ꓢꓳ-ꓠ ꓐꓰ ꓬꓰ-ꓩꓴ-ꓕ ꓐꓰ ꓓ-ꓪꓵ ꓐꓰ ꓢ-ꓟꓴ-ꓬꓰ ꓐꓰ ꓟꓷ ꓠꓷ ꓝ ꓢꓴ ꓐꓴ ꓔꓯ ꓥꓪ ꓚ ꓕꓯ ꓠꓽ ꓦꓬ ꓠꓬꓲ ꓟꓽ ꓡꓳꓼ꓿
ꓬꓲ ꓪ ꓠꓬ ꓙꓵꓻ ꓠꓲ ꓗꓪ ꓐꓰ ꓗꓴꓷ ꓔꓯ ꓓꓶꓽ ꓧꓪ. ꓡꓰˍ ꓡꓳ꓿ ꓙꓲ ꓫꓬ ꓟ ꓟꓬꓱꓽ ꓬꓰˍ ꓡꓳ꓿ ꓙ ꓟꓳ ꓘꓶ ꓟꓶˍ ꓡꓳ꓿ ꓡꓽ ꓢꓯꓹ ꓟꓷꓽ ꓠꓷ ꓛꓵꓽ ꓗꓷˍ ꓡꓳ꓿
ꓮꓸ ꓔꓳ ꓪ ꓠꓬꓲ ꓟ ꓔꓯ ꓟꓶ ꓬꓰ ꓝꓲ ꓡꓳ꓿ ꓮ. ꓕ ꓢꓶꓽ ꓠꓬꓲꓽ ꓗꓪ ꓐꓰ ꓡꓲ, ꓗꓷ ꓪ ꓡꓳ꓿ ꓢꓯꓼ ꓐˍ ꓟ ꓗꓪ ꓐꓰ ꓢꓯꓼ ꓙꓳˍ ꓟ ꓒꓬꓱꓼ ꓡˍ ꓡꓳ꓿ ꓢꓰꓼ ꓡꓯ ꓘꓳˍ ꓟ ꓗꓪ ꓐꓰ ꓪ ꓠꓬꓲ ꓡꓳ꓿ ꓐꓶꓽ ꓒ ꓟꓯꓼ ꓜꓴ ꓔꓯ ꓖꓼ ꓩꓴ ꓗꓷ ꓡꓳ꓿
ꓤ ꓟꓶ ꓤ ꓕꓲ ꓐꓱ ꓠꓬ ꓬꓲ ꓪ ꓞꓳ ꓫꓵꓽ ꓔꓯ ꓢꓯ. ꓬꓲꓼ ꓡ ꓝꓲˍ ꓟ ꓗꓪ ꓐꓰ ꓟꓶ ꓢꓰ ꓡꓳ꓿ ꓝꓮꓲ ꓠꓱ. ꓐꓯꓼ ꓕꓲ ꓐꓱ ꓠꓬ ꓪ ꓜꓲ ꓙꓲˍ ꓟ ꓢꓯ. ꓬꓲꓼ ꓡˍ ꓟ ꓟꓶ ꓠ ꓟ ꓫ ꓟꓴ ꓫ ꓚꓬ ꓟ ꓜꓲꓽ ꓢꓲ ꓩꓴ ꓗꓷ ꓟ ꓔꓯ ꓬꓲ ꓪ ꓟꓽ ꓘꓳ ꓣꓴ꓿
ꓝꓮꓲ ꓠꓱ. ꓐꓯꓼ ꓕꓲ ꓐꓱ ꓠꓬ ꓤꓲˍ ꓟ ꓐꓰ ꓓꓶꓽˍ ꓟ ꓞꓳ, ꓟ ꓐꓰ ꓐꓱˍ ꓟ ꓐꓰ ꓤ ꓠꓬꓲˍ ꓟ ꓟꓶ ꓡꓳ꓿
ꓬꓲ ꓪ ꓔꓯ ꓭ ꓛꓲ ꓡꓳˍ ꓡꓳ꓿ ꓩꓵꓼ ꓡꓵꓼ ꓡꓰ ꓶꓼ ꓐꓶ ꓗꓷ ꓡꓳ꓿ ꓤ, ꓠꓬꓲˍ ꓡꓳ꓿ ꓮ. ꓕ ꓡꓰ ꓢꓰˍ ꓡꓳ ꓿ ꓬꓲ ꓪ ꓠꓬ ꓫ ꓠꓬꓲ ꓟꓷ ꓠꓬꓲ ꓫ ꓙꓵ ꓠꓬꓲ ꓘꓶ ꓙꓵ ꓟꓶ ꓠꓬꓲ ꓮ ꓣꓳ ꓙꓲ ꓘꓳ ꓠꓬꓲ ꓮ ꓛꓵꓼ ꓙꓲ ꓘꓳ, ꓠꓬꓲ ꓐꓰ ꓚꓳ ꓙꓰ ꓡꓳ꓿
ꓡꓲ ꓛꓲ ꓐꓰ ꓪ ꓛꓲ ꓐꓰ ꓭ ꓘꓴ ꓐꓰ ꓟꓲ ꓘꓴ ꓗꓪ ꓶ ꓚꓳ ꓔꓬ ꓡꓳ꓿ ꓬꓲ ꓪ ꓙꓳ ꓔꓬ ꓠ ꓟ ꓟꓲ ꓠꓯ ꓟꓽ ꓒꓵ꓿
ꓬꓲ ꓪ ꓮ ꓙꓵ ꓠꓬ ꓙꓵꓻ ꓠꓲ, ꓗꓪ ꓐꓰ ꓢꓷ ꓙ ꓟꓳ ꓙ ꓓꓴ ꓟꓶ ꓡꓰ ꓥ ꓟꓲ ꓖꓶ ꓙ ꓟꓳ ꓔ ꓟ ꓔꓯ ꓟꓽ ꓟꓶ ꓢꓰ꓿
ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓣꓳ ꓐꓱ ꓶ ꓪ ꓜꓶ ꓙꓲ ꓡꓳ ꓫꓵꓽ ꓙ ꓖꓶ ꓔ ꓡꓳ꓿ ꓕꓱ ꓟ ꓠꓬ ꓬꓲ ꓪ ꓣꓳ ꓐꓰ ꓕꓲ ꓪꓺꓼ ꓟꓽ ꓥ ꓠꓬ ꓟꓽ ꓜꓳꓽ ꓓꓰ ꓡꓰ꓿
ꓖꓳ ꓡꓱ ꓠꓬꓲ ꓕꓱ ꓘꓶ ꓛꓲ ꓪꓴꓽˍ ꓟ ꓢꓷ ꓙ ꓟꓳ ꓙ ꓢꓴ ꓕꓲ ꓜꓴ ꓠꓬ ꓟꓴ ꓗꓴ. ꓡꓰ ꓐꓰ ꓣꓳ ꓔꓯ ꓚꓳꓺ ꓞ ꓠꓬꓲ ꓣꓳ ꓟꓲ ꓘꓶꓻ ꓡꓶꓼ ꓓꓴ ꓮ ꓙꓵˍ ꓐꓰ ꓣꓳ ꓔꓯ ꓔꓵ. ꓔꓵ. ꓟꓴ ꓔꓵ. ꓞ, ꓟ ꓝꓴꓲ ꓔꓯ ꓡꓵ. ꓗꓷ ꓢꓲ ꓣꓳ ꓙꓵ ꓠꓲ, ꓬꓲ ꓚꓰꓺ ꓐꓰ ꓣꓳ ꓙꓵ ꓠꓲ ꓔꓯ ꓪꓴꓽ ꓓꓰ ꓡꓰ ꓝꓲ ꓢꓴ ꓬꓰ-ꓢꓴ ꓔꓯ ꓡꓳ. ꓔ ꓢꓲ ꓠꓬꓲ ꓜꓲꓽ ꓘꓴ ꓠꓲ, ꓡꓰ ꓣꓳ ꓟꓲ ꓙꓬ ꓗꓪ ꓓ ꓟ ꓔꓷ, ꓖꓴ ꓗꓪ ꓔꓷ, ꓙꓰ ꓡꓯ꓿
ꓬꓲ ꓠꓬ ꓬꓲ ꓟꓲ ꓙꓬ ꓗꓪ ꓓ, ꓟ ꓗ ꓛꓲ ꓓꓴ ꓪꓴ. ꓠꓬꓲ ꓫ ꓔꓳ ꓫ ꓒꓯ ꓟ ꓔꓯ ꓟꓳ ꓟꓽ ꓟꓵ ꓟꓵ ꓡꓯ ꓐꓳ ꓔꓶ ꓓꓴ ꓜꓲꓽ ꓢꓲ ꓪꓴ-ꓢ ꓡꓯ ꓙ ꓕꓲ ꓛꓱꓽ ꓗꓪ ꓠꓬꓲ. ꓠ. ꓡꓰꓳ꓿