Lisu Christian Hymnal
Hymn 25 ꓫꓬꓹ ꓦꓵ ꓠ ꓗ ꓢꓰ ꓡꓳ Lyrics
ꓒ-ꓡꓲ-ꓢꓷ ꓐꓴ ꓗꓪ ꓟ꓾ ꓠꓲ-ꓘꓳ-ꓓꓲ-ꓟꓴ ꓟꓬꓱꓺ ꓔˍ ꓟ ꓬꓴ-ꓔ ꓡ ꓞꓳ ꓔꓯ ꓙꓵꓽ ꓢꓴ ꓕꓲ ꓣꓳ ꓙꓳˍ ꓡꓳ꓿
ꓖꓳ ꓕꓲ ꓣꓳ ꓠꓬ ꓢ ꓘꓪ ꓕꓯ ꓬꓲ ꓔꓯ ꓡ ꓢꓲ꓾ ꓣ ꓐꓲꓳ꓾ ꓠꓴ ꓠ ꓪꓴ-ꓢ ꓔꓯˍ ꓐꓰ ꓡ ꓟ ꓟꓸ ꓒ ꓕꓲ ꓣꓳ ꓥ ꓟ ꓥꓪ ꓠꓴꓽ ꓢꓷˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓴ ꓬꓰˍ ꓟ ꓢꓷ ꓡꓰ ꓓꓴ ꓕꓱ ꓟꓬ ꓙꓰꓽ ꓟ꓾ ꓪꓴ-ꓢ ꓬꓲˍ ꓐꓰ ꓟꓽ ꓔꓬ ꓕꓯ ꓠꓽ ꓮ ꓟˍ ꓟꓲ ꓬꓰ ꓟꓽ ꓐ ꓡ꓾ ꓐꓯˍ ꓡꓳ꓿
ꓬꓰ-ꓢꓴ ꓡꓰ ꓬꓲ ꓔꓯ ꓥꓪ ꓔꓱ, ꓔꓱˍ ꓐꓰ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓮ ꓟ ꓥˍ ꓟꓲ ꓫꓬ, ꓦꓵ ꓔꓸˍ ꓟ ꓟꓽ ꓥ ꓠꓬ꓾ ꓪꓴ-ꓢ ꓗꓴꓷꓼ ꓬꓲ ꓟꓳ ꓟꓽ ꓓ꓾ ꓐꓯ ꓡꓳ꓿
ꓠꓲ-ꓘꓳ-ꓓꓲ-ꓟꓴ ꓡꓰ ꓬꓲ ꓔꓯ꓾ ꓡ ꓞꓳ ꓕꓲ ꓣꓳ ꓟꓳꓽ ꓡꓰ ꓠꓬ ꓮ ꓡꓲ ꓐꓰ ꓦꓵꓻ ꓐ ꓡ ꓢꓰ꓾ ꓬꓲꓸ ꓮ ꓟꓺ ꓤ ꓘꓶ ꓗꓪ ꓝꓮꓲ ꓕꓲ ꓧꓪ ꓓꓵ ꓡꓰ ꓢꓲ ꓦꓵꓻ ꓐ ꓡˍ ꓢꓰ ꓡꓺꓽ꓾ ꓐꓯ ꓡꓳ꓿
ꓬꓰ-ꓢꓴ ꓡꓰ ꓒꓳ, ꓖꓶ ꓢꓲ꓾ ꓥꓪ ꓔꓱ, ꓔꓱˍ ꓐꓰ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓮ ꓟ ꓥˍ ꓟꓲ ꓬꓲ ꓙꓬ ꓐꓰ ꓦ ꓡꓰ ꓦꓵꓻ ꓔ ꓟ ꓟꓽ ꓥ ꓠꓬ꓾ ꓪꓴ-ꓢ ꓗꓴꓷꓼ ꓗꓪ ꓬꓲ ꓓꓵ ꓡꓰ ꓟꓽ ꓓ꓿
ꓧꓪꓽ ꓡꓰ ꓦꓵ ꓔˍ ꓟ ꓠꓬ ꓧꓪꓽ ꓥ ꓡꓳ꓿ ꓦ ꓡꓰ ꓦꓵꓻ ꓔˍ ꓟ ꓠꓬ ꓦ ꓥ ꓡꓳ꓿
ꓠꓴ ꓪ ꓠꓬ ꓫꓬꓹ ꓦꓵꓻ ꓠ ꓗ ꓡꓳ꓾ ꓐꓰ꓾ ꓥꓪ ꓠꓴꓻ ꓔꓯ ꓐꓯ ꓖꓶˍ ꓠꓬꓲ꓾ ꓕ ꓓꓵ ꓙ ꓟꓶ꓿
ꓟꓲ ꓦꓲ ꓠꓬ ꓮ ꓡꓲ ꓗꓪ ꓙꓱꓼ ꓠꓲ, ꓫꓵˍ ꓠꓬ ꓙꓱꓼˍ ꓡꓳ꓿ ꓬꓲ ꓢꓯꓼ ꓠꓴ ꓑ ꓙˍ ꓟꓲ꓾ ꓮ ꓡꓲ ꓗꓪ ꓐꓰ ꓡˍ ꓟˍ ꓐꓰ ꓮ ꓡꓲ ꓗꓪ ꓙꓰˍ ꓟ ꓠꓴꓻ ꓟꓽ ꓢꓷ꓿ ꓦꓻ ꓡꓰ ꓦꓵꓻ ꓔ ꓟ ꓞꓳ ꓤ ꓥ ꓕ ꓑꓳ ꓠꓬ ꓕꓱ ꓡꓱ ꓗˍ ꓡꓳ꓾ ꓐꓯˍ ꓡꓳ꓿
ꓠꓲ-ꓘꓳ-ꓓꓲ-ꓟꓴ ꓡꓰ ꓬꓲ ꓔꓯ꓾ ꓕꓱ ꓟꓬ ꓙꓰ ꓠꓬ ꓮ ꓡꓲ ꓐꓰ ꓒꓬꓱ ꓡ ꓓ ꓢꓰ꓾ ꓐꓰ ꓒꓳꓹ ꓖꓶ ꓡꓳ꓿
ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓟꓸ ꓒ ꓥ ꓢꓲ꓾ ꓕꓱ ꓟꓬ ꓙꓰꓽ ꓠꓴ ꓟꓽ ꓙ ꓜꓲꓼ ꓢꓰ ꓡꓺ꓿
ꓥꓪ ꓔꓱ, ꓔꓱˍ ꓐꓰ ꓠꓴ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓠꓴꓽ ꓢꓷˍ ꓟ ꓥꓪ ꓠꓴ ꓫꓸ ꓕꓱˍ ꓡꓳ꓿ ꓥꓪ ꓠꓴ ꓟꓳꓻ ꓠꓬꓲˍ ꓟ ꓔꓯ ꓥꓪ ꓠꓴ ꓢꓷꓸ ꓙ ꓟꓳ ꓙˍ ꓡꓳ꓿ ꓖꓳ ꓡꓱ ꓢꓲ ꓥꓪ ꓠꓴ ꓢꓷ ꓙ ꓟꓳ ꓙˍ ꓟ ꓔꓯ ꓠꓴ ꓪ ꓟꓽ ꓘꓳ ꓣꓴ꓿
ꓥꓪ ꓠꓴ ꓪ ꓔꓯ ꓟꓲ ꓠꓯ ꓫꓵꓽ ꓪꓴ ꓐꓯ ꓖꓶˍ ꓟꓲ꓾ ꓠꓴ ꓪ ꓟꓽ ꓙꓵꓻ ꓠꓬ꓾ ꓥꓪ ꓠꓴ ꓪ ꓔꓯ ꓟꓴ ꓗꓪ ꓗꓪ ꓟ ꓫꓵꓽ ꓪꓴ ꓐꓯ ꓖꓶˍ ꓠꓬ꓾ ꓠꓴ ꓪ ꓮ ꓡꓲ ꓐꓰ ꓙꓵꓻ ꓗꓴꓸ ꓢꓰ꓿
ꓟꓴ ꓗꓪ ꓗꓪ ꓐꓰ ꓬꓯꓼ ꓡꓰ ꓢꓲ꓾ ꓟꓴ ꓗꓪ ꓗꓪ ꓔꓬˍ ꓟ ꓡ ꓞꓳ ꓮ ꓐꓲ ꓟꓽ ꓥ ꓠꓬ꓾ ꓟꓴ ꓗꓪ ꓕꓯ ꓢꓲ ꓗꓪ ꓮ ꓟˍ ꓟꓲ ꓟꓽ ꓓꓯ ꓙꓰ ꓠꓬꓲ꓿
ꓬꓲ ꓔꓯ ꓙꓵꓻ ꓢꓴ ꓮ ꓟ ꓥ ꓟꓲ ꓕꓲ ꓞꓲ ꓕꓲ ꓑ ꓟ ꓢꓯꓼ ꓟꓬ ꓟꓶ ꓠ, ꓟ꓾ ꓡꓲ ꓛꓲ ꓗꓪ ꓟꓳ-ꓫꓲ ꓡꓰ ꓩꓴ ꓔꓯ ꓔꓳꓹ ꓔꓴ ꓗꓷ ꓡꓰˍꓟˍ ꓡꓰ ꓐꓰ꓾ ꓡ ꓞꓳ ꓮ ꓐꓲ ꓔꓯˍ ꓟꓲ ꓔꓳ, ꓔꓴ ꓗꓷ ꓡꓰ ꓠ ꓗˍ ꓡꓳ꓿