Lisu Christian Hymnal
Hymn 24 ꓢꓲ-ꓫꓬ-ꓟ-ꓦ ꓟꓶ ꓡꓰˍ ꓟ Lyrics
ꓥꓪꓽ ꓞꓲ ꓠꓬꓲ ꓕꓲ ꓠꓬꓲ ꓟ ꓑꓮꓲꓽ ꓛꓲ ꓡ ꓕꓯ ꓝꓲ ꓓꓴ ꓐꓴ ꓮ ꓙꓵ ꓕꓲ ꓪꓺꓼ ꓐꓰ ꓔꓬ ꓡꓳ꓿
ꓖꓳ ꓡꓱ ꓠꓬ ꓞꓼ ꓐꓰ ꓟꓲ ꓦꓲ ꓓꓽ ꓟ ꓙꓱꓼ ꓡˍ ꓟ ꓡꓰ ꓐꓰ꓾ ꓟꓴ ꓗꓪ ꓗꓪ ꓐꓰ ꓢꓯꓼ ꓕꓲ ꓟ ꓬꓯꓼ ꓡꓰ ꓢꓲ꓾ ꓬꓲ ꓪ ꓠꓬꓲ ꓠ. ꓔꓬ ꓟ ꓦꓲ ꓗꓪ ꓐꓲꓺ ꓡˍ ꓡꓳ꓿
ꓮꓸ ꓔꓳꓸˍ ꓡꓰ ꓐꓰ ꓗˍ ꓟ ꓡ ꓛꓱˍ ꓟꓲ꓾ ꓬꓲ ꓪ ꓔꓯ ꓟꓳꓸ ꓖꓶ ꓡ ꓢꓲ꓾ ꓗꓪꓺ ꓡꓯ ꓘꓳ ꓢꓲꓸ ꓠꓬꓲ꓾ ꓬꓲ ꓪ ꓕꓲ ꓣꓳˍ ꓡꓰ ꓕꓲ ꓣꓳ ꓔꓯ ꓥꓳꓽ ꓡˍ ꓡꓳ꓿
ꓖꓳ ꓡꓱ ꓠꓬ꓾ ꓬꓲ ꓪ ꓮ ꓙꓵꓽ ꓢꓴ ꓔꓯ ꓢꓲ-ꓫꓬ-ꓟ-ꓦ ꓡꓰ ꓐꓲꓺ ꓞ ꓢꓲ꓾ ꓢꓲ-ꓫꓬ-ꓟ-ꓦ ꓡꓰ ꓬꓲ ꓪ ꓔꓯ ꓮ ꓡꓲ ꓖꓶˍ ꓠꓬ ꓬꓲ ꓖꓳ ꓡꓱ ꓠꓱ. ꓐꓯꓼ ꓥꓳꓽ ꓫ ꓕꓱ ꓪꓴ. ꓔꓴˍ ꓡꓳ꓿
ꓖꓳ ꓕꓯ ꓠꓬ ꓟꓴ ꓗꓪ ꓠꓯ. ꓘꓪ ꓮ ꓡꓲ ꓕꓲ ꓟꓵ ꓗꓪ ꓐꓰ ꓡˍ ꓟ ꓥˍ ꓟꓲ꓾ ꓠꓲ, ꓒꓵ ꓠꓲ, ꓡꓱˍ ꓟ ꓬꓴ-ꓔ ꓡ ꓞꓳ ꓠꓬ ꓙꓱ-ꓣꓴ-ꓢ‐ꓡꓱ ꓗꓪ ꓔꓬˍ ꓡꓳ꓿
ꓢꓯꓼ ꓕꓱ ꓟ ꓔꓯ ꓑꓺ ꓙ ꓠꓬ ꓡ ꓞꓳ ꓬꓲ ꓜꓴ ꓜꓲꓼ ꓡ ꓢꓲ꓾ ꓓꓵ ꓙ ꓥꓼ ꓡꓰꓳ꓿ ꓮ ꓡꓲꓳ ꓐꓯ ꓠꓬ ꓝꓲ ꓓꓴ ꓐꓴ ꓡꓰ ꓫꓸ ꓕꓱ ꓟ ꓔꓯ ꓮ ꓟ ꓚꓲ ꓛꓬ ꓥꓳꓽ ꓮ ꓟ ꓑꓺ ꓙˍ ꓡꓳ꓿
ꓬꓲ ꓪ ꓮ ꓙꓵ ꓢꓴ ꓠꓬ ꓦꓰꓽ ꓟꓽ ꓓꓳ ꓡ ꓠꓬꓲ ꓓꓵ ꓙ ꓟꓶ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓠꓬꓲ ꓠ꓾ ꓫꓸ ꓕꓱ ꓔꓬˍ ꓟ ꓮ ꓙꓵ ꓠꓬ ꓖ-ꓡꓲ-ꓡꓲ ꓢꓴ ꓟꓽ ꓥ ꓡꓺꓽ꓿
ꓮ ꓡꓲ ꓗꓷ ꓡꓰ ꓠꓬꓲ ꓣꓳ ꓮ ꓟ ꓥˍ ꓟꓲ ꓣꓳ ꓔꓯ ꓦꓵˍ ꓕꓯˍ ꓡꓰ ꓣꓱꓽˍ ꓟ ꓥꓳ ꓑꓺ ꓙ ꓥ꓿
ꓒꓲ-ꓕꓱ ꓠ꓾ ꓞꓲ ꓕꓲ ꓣꓳ ꓟˍ ꓐꓰ ꓕꓲ ꓡꓰꓸꓼ ꓦꓰꓼ ꓞ, ꓢꓲ꓾ ꓢꓯꓼ ꓓꓽ ꓟ ꓡꓰ ꓚꓺ ꓢꓲ꓾ ꓬꓴ-ꓔ ꓡ ꓞꓳˍ ꓐꓰ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓮ ꓙꓵꓽ ꓢꓴꓳ꓾ ꓕꓱ ꓟ ꓔꓯ ꓠꓴ ꓪ ꓢꓷ ꓠꓯˍ ꓡꓳ꓿ ꓥꓪ ꓐꓯ ꓘꓶꓽ ꓔꓯˍ ꓟꓲ ꓠꓺ ꓠꓹ꓿
ꓠꓴ ꓪ ꓓꓵ ꓙˍ ꓟ ꓡꓰ ꓐꓰ ꓕꓱ ꓕꓲ ꓧꓳꓽ ꓟ ꓠꓬ ꓙꓲ ꓒꓶ ꓬꓲꓼˍ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓗꓴꓺ ꓙꓵˍ ꓡꓰ ꓥ ꓡꓳ꓿
ꓬꓲ-ꓢꓷ-ꓡꓰ ꓡ ꓞꓳ ꓐꓴꓳ꓾ ꓐꓯ ꓘꓶ ꓕꓱ ꓟ ꓔꓯ ꓠ ꓠ꓾ ꓪꓴ-ꓢ ꓠꓽ ꓠ-ꓢ-ꓡꓱ ꓢꓴ ꓬꓰ-ꓢꓴ ꓗꓪ ꓐꓰ ꓠꓴ ꓪ ꓗꓳ ꓡꓳ ꓗꓪ꓾ ꓪ ꓠꓬꓲˍ ꓟ ꓟꓬꓱꓽˍ ꓐꓰ ꓓꓵ ꓙ ꓟꓶ ꓓꓴˍ ꓐꓰ꓾ ꓢꓷ ꓡꓰ ꓓꓴ ꓬꓰˍ ꓟ ꓑꓶ. ꓓꓴ꓾ ꓬꓰ-ꓢꓴ ꓠꓬ ꓪꓴ-ꓢ ꓔꓯ ꓐꓰ ꓡˍ ꓟ ꓕꓲ ꓣꓳ ꓥ ꓡꓳ꓾ ꓐꓰ ꓟꓳꓸ ꓖꓶ ꓡˍ ꓡꓳ꓿ ꓕꓱ ꓟ ꓔꓯꓸ ꓟꓲ ꓠꓴ ꓪ ꓢꓷ ꓡꓰꓳ꓿
ꓬꓲ ꓔꓯ ꓠꓬ꓾ ꓪꓴ-ꓢ ꓝꓰꓹ ꓔ ꓟ ꓐꓰ ꓧꓶ. ꓕꓯ ꓡꓰ ꓟꓳꓻ ꓢꓷ ꓔˍ ꓟ ꓔꓯ ꓛꓳ ꓢꓲ꓾ ꓡ ꓞꓳ ꓔꓯ ꓡꓯ ꓙꓱ ꓗꓷ ꓢꓲ ꓠꓬꓲ꓾ ꓠꓴ ꓪ ꓠꓬ ꓙꓵ ꓗ ꓟꓽ ꓙꓳ ꓢꓴ ꓡꓯ ꓒꓯ ꓗꓪ ꓐꓰ ꓬꓲ ꓔꓯ ꓕꓯꓼ ꓔꓶꓸ ꓢꓲ ꓢꓰꓼ ꓗꓷ ꓡꓳ꓿
ꓫꓵꓻˍ ꓟ ꓠꓻ ꓫꓸ ꓓꓴ ꓔꓯ ꓪꓴ-ꓢ ꓡꓰ ꓒꓶꓻ ꓩꓴ ꓗꓷ ꓢꓲ꓾ ꓬꓰ-ꓢꓴ ꓔꓯ ꓬꓲ ꓢꓯꓸ ꓬꓲꓼ ꓡ ꓝꓲˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓫꓵꓻ ꓟ ꓡꓰ ꓬꓲ ꓔꓯ ꓣꓴ ꓔꓸ ꓟꓽ ꓧꓪꓸ ꓡꓰ꓿
ꓖꓳ ꓡꓱ ꓠꓬꓲ ꓠꓴ ꓪ ꓡꓰ ꓕꓯ ꓔꓶ ꓗꓷˍ ꓟ ꓬꓰ-ꓢꓴ ꓕꓱ ꓕꓲ ꓣꓳ ꓔꓯ꓾ ꓪꓴ-ꓢ ꓡꓰ ꓢꓲꓺ ꓒˍ ꓐꓰ ꓙꓲ-ꓢꓴ ꓒꓬꓱꓼ ꓡ ꓝꓲˍ ꓡꓳ꓾ ꓐꓰ ꓬꓲ-ꓢꓷ-ꓡꓰ ꓕꓲ ꓦꓲꓻ ꓢꓴ ꓡꓱꓸꓼ ꓚꓵ ꓚꓵ ꓢꓷ. ꓠꓯˍ ꓡꓳ꓾ ꓐꓰ꓾ ꓐꓯˍ ꓡꓳ꓿
ꓕꓱ ꓟ ꓔꓯ ꓬꓲ ꓪ ꓑ ꓙ ꓕꓯ꓾ ꓬꓲ ꓪ ꓠꓲꓹ ꓟ ꓗꓪ ꓗꓸ ꓬꓯꓼ ꓢꓲ꓾ ꓒꓲ-ꓕꓱˍ ꓐꓰ ꓠꓱ ꓐꓯ ꓝꓲ ꓓꓴ ꓐꓴ ꓔꓯ꓾ ꓬꓲ ꓤ ꓠꓬꓲ ꓤ ꓐꓴꓳ꓾ ꓥꓪ ꓠꓴ ꓮ ꓡꓲ ꓬꓰ ꓠꓯˍ ꓡꓳꓽ꓾ ꓐꓯ ꓡꓳ꓿
ꓖꓳ ꓡꓱ ꓠꓬ ꓒꓲ-ꓕꓱ ꓡꓰ ꓬꓲ ꓪ ꓔꓯ ꓠꓴ ꓪ ꓝꓴꓲ ꓖ ꓖꓶ ꓟꓶ ꓠ, ꓟ ꓠꓴ ꓪ ꓕꓲ ꓣꓳˍ ꓡꓰ ꓕꓲ ꓣꓳ ꓓꓵ ꓙ ꓒꓳꓹ ꓬꓲꓼ ꓡ ꓢꓲ꓾ ꓬꓰ-ꓢꓴ ꓙꓲ-ꓢꓴ ꓟꓬꓱꓺ ꓗꓪ ꓐꓰ ꓖꓳ ꓓꓱ ꓔꓲꓹ ꓠ ꓗˍ ꓡꓳ꓿ ꓖꓳ ꓡꓱ ꓠꓬ ꓡꓯꓼ ꓫꓴ ꓢꓲ-ꓫꓬ-ꓟ-ꓦ ꓠꓴ ꓪ ꓟꓶˍ ꓥꓳ꓿
ꓖꓳ ꓕꓯ ꓬꓲ ꓐꓯ ꓘꓶ ꓘꓳ ꓣꓴ ꓢꓴ ꓔꓯ ꓠꓬ꓾ ꓖꓳ ꓓꓱ ꓔꓲꓹ ꓖꓶˍ ꓡꓳ꓿ ꓖꓳ ꓕꓲ ꓠꓬꓲ ꓗꓪ ꓠꓬ ꓡ ꓞꓳ ꓢ ꓔꓴ ꓛꓲ ꓙꓵꓻ ꓢꓴ ꓔꓯ ꓡꓴꓽ ꓖꓶ ꓡˍ ꓡꓳ꓿
ꓬꓲ ꓪ ꓠꓬ ꓮ ꓕꓯ ꓟꓲ ꓝꓲ ꓓꓴ ꓐꓴ ꓟꓸ ꓖꓶˍ ꓟ ꓐꓰ꓾ ꓙ ꓡꓯ ꓘꓳ ꓟˍ ꓐꓰ ꓒꓵꓼ ꓦꓶˍ ꓟˍ ꓐꓰ ꓪ ꓘꓴˍ ꓟ ꓗꓪ ꓕꓶ ꓕꓶ ꓡꓰ ꓬꓰ ꓔꓬˍ ꓡꓳ꓿