Lisu Christian Hymnal
Hymn 19 ꓤ ꓠꓬꓲ ꓟ ꓔꓯ ꓧꓪꓸ ꓡꓰˍ ꓟ Lyrics
ꓖꓳ ꓕꓯ ꓠꓲꓽ ꓪ ꓔꓲ ꓡꓰ ꓬꓲ ꓔꓯ ꓤꓹ ꓠꓬꓲ ꓠ ꓟ ꓢꓲ-ꓫꓬ-ꓟ-ꓦ ꓡꓰ ꓬꓰ-ꓢꓴ ꓔꓯ ꓡꓲ ꓛꓲ ꓗꓪ ꓧꓳ ꓓꓵ ꓙꓰˍꓡꓳ꓿
ꓬꓲ ꓠꓬ ꓜꓽ ꓓꓴ ꓟꓽ ꓜꓽ ꓟ ꓡꓲ ꓞꓲ ꓦꓬꓼ ꓡꓲ ꓞꓲ ꓠꓬꓲ ꓗ ꓠꓯ ꓦꓰ ꓟꓷꓼˍ ꓡꓳ꓿
ꓗꓶꓸ ꓤ ꓠꓬꓲ ꓢꓴ ꓠꓬ ꓬꓲ ꓔꓯ ꓡ ꓢꓲ ꓕꓱ ꓡꓱ ꓐꓯˍ ꓡꓳ꓿ ꓠꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥ ꓕꓯ ꓠ꓾ ꓭ ꓛꓲ ꓕꓱ ꓟꓬ ꓟ ꓔꓯ ꓕꓵ ꓪ ꓐꓯ ꓖꓶ ꓢꓲ꓾ ꓫꓪ ꓒꓵꓼ ꓒꓬꓱꓼ ꓡ ꓝꓲ꓾ ꓐꓯ ꓡꓳ꓿
ꓬꓲ ꓠ ꓕꓱ ꓡꓱ ꓒꓳꓹ ꓖꓶˍ ꓡꓳ꓾ ꓞꓳꓻ ꓤ ꓠꓬ ꓫꓪ ꓒꓵꓼ ꓗꓪ ꓐꓰˍ ꓡꓰ ꓢꓯꓸ ꓔꓬ ꓡꓳ ꓟꓽ ꓥ꓿ ꓪꓴ-ꓢ ꓟꓷ ꓠꓷ ꓗꓪ ꓐꓰ ꓓꓳ ꓡ ꓟ ꓐꓯ ꓘꓶ ꓮ ꓙꓵ ꓗꓪ ꓐꓰ ꓥ ꓡꓳ꓾ ꓐꓰ ꓐꓳ ꓔˍ ꓡꓳ ꓐꓯˍ ꓡꓳ꓿
ꓖꓳ ꓗ ꓠꓯ ꓠꓲꓽ ꓪ ꓔꓲ ꓠꓬ ꓬꓲ ꓔꓯ ꓢꓲ ꓫꓬ ꓟ ꓡꓳ ꓒꓱ ꓗꓪ ꓧꓳ ꓓꓵ ꓡꓰ ꓢꓲ꓾ ꓬꓲ ꓔꓯ ꓢꓲ ꓫꓬ ꓦꓲ ꓟꓴ ꓓꓰˍ ꓟ ꓕꓲ ꓔꓳ ꓗꓪ ꓦꓰꓼ ꓔꓬ ꓝꓲ ꓢꓲ ꓠꓬꓲ꓾
ꓬꓲ ꓔꓯ꓾ ꓠꓴ ꓠꓬ ꓪꓴ-ꓢ ꓬꓲ ꓮ ꓐꓲ ꓥ ꓕꓯ ꓠ꓾ ꓠꓴ ꓔꓷꓹ ꓬꓯꓼ ꓙꓰ꓿ ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ꓾ ꓢꓲ ꓒ ꓡꓰ ꓬꓲ ꓟꓴ ꓗꓪ ꓝꓲ ꓓꓴ ꓐꓴ ꓔꓯ ꓠꓴ ꓐꓱ ꓶ ꓕꓵꓼ ꓪ ꓖꓶˍ ꓥꓳ꓿ ꓝꓮꓲ ꓠꓴ ꓛꓲ ꓒꓯ ꓠꓬ ꓭ ꓛꓲ ꓗꓪ ꓕꓯꓼ ꓗꓷˍ ꓟ ꓔꓯ ꓗꓳ ꓚꓱˍꓠꓬꓲ꓾ ꓬꓲ ꓪ ꓡꓯ ꓒꓯ ꓡꓰ ꓠꓴ ꓔꓯ ꓔꓳꓹ ꓔ ꓖꓶˍ ꓥꓳ꓾ ꓐꓰ ꓐꓳ ꓔ ꓡꓳ꓾ ꓐꓯ ꓡꓳ꓿
ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓢꓲ ꓒ ꓪꓴ-ꓢ ꓔꓯ ꓠꓴ ꓤꓹ ꓠꓬꓲ ꓟꓽ ꓓ꓾ ꓐꓰ ꓐꓳ ꓔ ꓢꓰ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿
ꓠꓲ ꓪ ꓔꓲ ꓝꓮꓲ ꓬꓲ ꓔꓯ ꓮ ꓘꓶ ꓟꓴˍ ꓟ ꓪ ꓡꓴ ꓗꓪ ꓧꓳ ꓓꓯ ꓙꓰ ꓢꓲ꓾ ꓟꓵ ꓗꓳꓹ ꓓꓵ ꓓꓵ ꓟ ꓗꓴꓷꓼ ꓥ ꓕ ꓑꓳˍ ꓐꓰ ꓗꓴꓷ ꓖꓳ ꓟꓬ ꓟ ꓐꓬꓱ ꓡꓱ ꓡꓱ ꓗ ꓟ ꓬꓲ ꓔꓯ ꓖꓴ ꓟ. ꓖꓶꓽ ꓢꓲ꓾
ꓬꓲ ꓔꓯ꓾ ꓠꓴ ꓟꓳꓼ ꓔ ꓢꓲ ꓥꓪ ꓔꓯ ꓪꓴ ꓓꓵ ꓕꓱꓼˍ ꓕꓯ ꓠ꓾ ꓕꓱ ꓟꓬ ꓟ ꓮ ꓙꓵ ꓥꓪ ꓠꓴ ꓔꓯ ꓖꓶ ꓥꓳ꓾ ꓐꓯ ꓡꓳ꓿
ꓬꓰ-ꓢꓴ ꓠꓬ ꓬꓲ ꓔꓯ ꓕꓱ ꓡꓱ ꓐꓯ ꓡꓳ꓾ ꓢ-ꓓꓯ ꓠꓴ ꓙꓰ ꓨ꓿ ꓮ ꓡꓲꓳ ꓐꓯ ꓠꓬ꓾ ꓠꓴ ꓠꓬ ꓠꓴ ꓢꓲ ꓒ ꓪꓴ-ꓢ ꓔꓯ ꓪꓴ ꓓꓵ ꓕꓱ ꓢꓲ ꓬꓲ ꓔꓯˍ ꓡꓰꓽ ꓣꓱꓽ ꓙ ꓠ ꓗ ꓡꓳ꓾ ꓐꓰ꓾ ꓐꓳ ꓔ ꓡꓳ꓾ ꓐꓯ ꓡꓳ꓿
ꓤ ꓠꓬꓲ ꓟ ꓔꓯ ꓜꓲꓽ ꓢꓴ ꓠꓬ ꓶꓼ ꓙꓳ ꓫꓱ ꓙꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓔꓯ ꓤꓹ ꓠꓬꓲ ꓟꓶ ꓡꓰ ꓠꓬ꓾ ꓢꓲ ꓒ ꓡꓰ ꓬꓲ ꓔꓯ ꓠꓲꓹ ꓠꓵ ꓢꓴ ꓔꓯ ꓖꓶ ꓙ ꓟꓳˍ ꓟ ꓢꓯꓼ ꓟꓬ ꓙꓵꓽ ꓪꓴꓸ ꓛꓴ ꓬꓲ ꓟꓶˍ ꓥꓳ꓿