Lisu Christian Hymnal
Hymn 15 ꓢ-ꓚꓬ-ꓡꓲ-ꓬ ꓡꓰ ꓪꓴ-ꓢ ꓔꓯ ꓫꓱ ꓖꓶˍ ꓟ Lyrics
ꓬꓲ-ꓢꓷ-ꓡꓰ ꓐꓴ ꓣꓳ ꓢꓲ ꓒ ꓪꓴ-ꓢ ꓔꓯ ꓫꓱ ꓖꓶ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓬꓲ ꓑ ꓫꓬ ꓐꓴ ꓔꓯ ꓔꓱꓹ ꓠꓬꓲ ꓡꓻꓳ꓿ ꓬꓲ ꓪ ꓐꓱ ꓶ ꓫꓴ ꓣꓴ ꓟ ꓟꓬꓱꓽ ꓬꓰ ꓗꓷꓳ꓿
ꓮ ꓠꓱ ꓕꓯ ꓡꓰ ꓢꓲ ꓒ ꓬꓲ ꓢꓲ ꓫꓬ ꓟ ꓟꓷ ꓠꓷ ꓝ ꓢꓴ ꓗꓪ ꓐꓰ ꓐꓯˍ ꓟˍ ꓡꓰ ꓐꓰ꓾ ꓣꓳ ꓔꓯ ꓛꓴ ꓙꓳ ꓢꓴ ꓡꓯ ꓒꓯ ꓗꓪ ꓐꓰ ꓣꓳ ꓔꓯ ꓚꓬꓴ ꓓꓳ ꓡ ꓠ ꓟ꓾ ꓣꓳ ꓔꓯ ꓠꓲ ꓜꓳ ꓢꓴ ꓔꓯ ꓐꓰ ꓣꓴ ꓓꓳ ꓡ ꓠ ꓟ꓾
ꓣꓳ ꓒꓵ ꓒ ꓐꓴ ꓔꓯ ꓖꓶ ꓙ ꓟꓳˍ ꓟ ꓫꓱ ꓤˍ ꓟ ꓔꓯ ꓬꓰ ꓐꓲꓺ ꓡ ꓠ ꓟ꓾ ꓾ ꓢꓲ-ꓫꓬ ꓟ ꓘꓶ ꓫꓵ ꓔꓯ ꓓꓵ ꓙ ꓛꓲ ꓡ ꓝꓲ ꓠ ꓟ꓾ ꓬꓲ ꓔꓯ ꓣꓱꓽ ꓙ ꓢꓴ ꓓ-ꓪꓵ ꓦꓲꓻ ꓗꓪ꓾ ꓣꓳ ꓐꓱ ꓶ ꓢꓯꓼ ꓟꓬ ꓝ ꓓꓴ ꓪꓴꓸ ꓛꓲ ꓕꓲ ꓗ ꓓꓳ ꓡ ꓝꓲˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓣꓳ ꓒꓵ ꓒ ꓮ-ꓐ-ꓡ-ꓦ ꓔꓯ ꓬꓲ ꓖꓳ ꓡꓱ ꓖꓶ ꓙ ꓟꓳˍ ꓡꓳ꓿ ꓣꓳ ꓔꓯ ꓛꓴ ꓙꓳ ꓢꓴ ꓡꓯ ꓒꓯ ꓗꓪ ꓐꓰ ꓣꓳ ꓔꓯ ꓚꓬꓴ ꓓꓳ ꓡ ꓢꓲ꓾ ꓣꓳ ꓙꓳ ꓔꓬˍ ꓟ ꓦꓬꓼ ꓠꓬꓲ ꓥ ꓕ ꓑꓳ ꓗꓪ꓾
ꓢꓲ ꓫꓬ ꓠꓲꓹˍ ꓐꓰ ꓙꓲ ꓫꓬ ꓠꓲꓹ ꓡꓰ ꓬꓲ ꓟꓲ ꓙꓬ ꓗꓪ ꓟ ꓙꓳꓺ ꓙꓳ꓾ ꓬꓲ ꓔꓯ ꓣꓱ ꓙ ꓝꓲ ꓠ ꓟ ꓬꓲ ꓡꓰ ꓮ-ꓐ-ꓡ-ꓦ ꓔꓯ ꓙ ꓟꓳˍ ꓡꓳ꓿
ꓤ ꓠꓱ ꓤꓽꓳ꓾ ꓠꓴ ꓔꓯ ꓠꓬ ꓟꓴ ꓡꓳꓹ ꓬꓰ ꓢꓴ ꓬꓲ ꓟꓷ ꓠꓷ ꓝ ꓢꓴ ꓐꓰ꓾ ꓘꓴˍ ꓥꓳ꓿ ꓠꓴ ꓠꓬ ꓢꓲ ꓒ ꓙ ꓖꓴ ꓙ ꓖꓶ ꓠ ꓟ ꓬꓲ ꓟꓲ ꓕꓯ ꓢꓲ ꓗꓪ ꓙꓰˍ ꓥꓳ꓿
ꓝꓮꓲ ꓠꓬ ꓬꓲ ꓑ ꓫꓬ ꓐꓴ ꓝꓴꓲ ꓖ ꓖꓶ ꓟꓶˍ ꓟ ꓗꓪ ꓐꓰ꓾ ꓬꓲ ꓪ ꓔꓯ ꓢꓯꓼ ꓟꓬ ꓝ ꓟ ꓣꓱ ꓛꓰ ꓢꓷꓸ ꓡꓰ ꓝꓲˍ ꓥꓳ꓿
ꓮ ꓡꓲꓳ ꓐꓯ ꓠꓬ ꓣꓳ ꓪꓴ-ꓢ ꓬꓲ ꓠꓲ ꓙꓽ ꓟꓬ ꓗꓳ ꓟ ꓗꓪ ꓐꓰ꓾ ꓟꓲꓽ ꓕꓯ ꓫꓬˍ ꓟ ꓠꓬꓲ ꓟꓳ ꓓꓴ ꓠꓬ ꓠꓯ ꓞꓲˍ ꓟ ꓐꓰ ꓫꓵꓻ ꓶꓻ ꓥꓳ ꓗꓪ ꓠꓬꓲ. ꓠ. ꓔꓬ ꓢꓴ ꓔꓯ ꓡꓬ ꓖꓶ ꓡ ꓠ ꓟ꓾
ꓣꓳ ꓛꓲ ꓒꓯ ꓔꓯˍ ꓟꓲ ꓢꓲ ꓡꓲ ꓟ ꓙ ꓖꓴ ꓗꓪ ꓧꓳ ꓙꓰ ꓖꓶ ꓠ ꓟ꓾ ꓟꓴ ꓗꓪ ꓗꓪ ꓐꓰ ꓣꓳ ꓔꓯꓸ ꓣꓳꓺ ꓖꓶ ꓡˍ ꓡꓳ꓾ ꓐꓯ ꓡꓳ꓿