Lisu Christian Hymnal
Hymn 11 ꓫ ꓟꓳˍ ꓟ Lyrics
ꓳ꓾ ꓬꓰ-ꓧꓳ-ꓧꓪ ꓔꓯ ꓫ ꓟꓳ ꓖꓶ꓿ ꓬꓲ ꓟꓬꓱꓺ ꓔꓯ ꓘꓴ ꓓꓰꓽ ꓠꓯˍ ꓡꓳ꓿ ꓬꓲ ꓬꓰˍ ꓟ ꓟꓬꓱꓽ ꓔꓯꓸ ꓠꓬ ꓞꓳ ꓫꓵꓽ ꓞꓳ ꓙꓰ ꓗꓳ ꓡꓳ ꓗꓪ ꓢꓷꓸ ꓡꓰ ꓝꓲ꓿
ꓬꓲ ꓐꓱ ꓶ ꓟꓴ ꓖꓪ ꓖꓪ ꓖꓶ꓿ ꓬꓲ ꓐꓱ ꓶ ꓫꓱꓸ ꓖꓶ ꓓꓴ ꓖꓪ꓿ ꓬꓲ ꓓꓵ ꓙ ꓟꓶ ꓓꓴ ꓟꓬꓱꓽ ꓮ ꓙꓵ ꓠꓴ ꓪ ꓛꓳ ꓠꓴ ꓪ ꓚꓺ ꓟꓸ ꓖꓶ꓿
ꓮ ꓡꓲꓳ ꓐꓯ ꓠꓬ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓡꓰ ꓠꓴ ꓪ ꓔꓯ ꓟꓵ ꓙꓲˍ ꓟ ꓐꓰ꓾ ꓬꓲ ꓙꓬ ꓡꓳꓻ ꓐꓰ꓾ ꓡꓳꓻ ꓖꓳꓻ ꓐꓰ ꓪ ꓡꓴ ꓗꓪ ꓐꓰ ꓚꓴꓺ ꓓꓳ ꓡˍ ꓟ ꓬꓲ ꓝꓳꓹ ꓟꓶ ꓐꓰ꓾ ꓬꓲꓻ ꓓꓴꓽ ꓙꓳˍ ꓟ ꓟꓵ ꓗꓪ ꓧꓳ ꓓꓵ ꓡꓰˍ ꓥꓳ꓿
ꓫꓪˍ ꓐꓰ ꓤꓴꓺ ꓙꓳˍ ꓟ ꓟꓵꓽ ꓐꓰ꓾ ꓛꓱ ꓡꓱ ꓚˍ ꓟꓲ꓾ ꓘꓶ ꓢꓶ ꓜꓲˍ ꓟꓲ꓾ ꓢꓷ ꓡꓷꓼ ꓢꓶˍ ꓟꓲ ꓙꓳˍ ꓡꓳ꓿ ꓞꓶ ꓙꓳˍ ꓟ ꓮ ꓛꓬ ꓢꓶˍ ꓐꓰ ꓐꓬꓽ ꓬꓲꓻ ꓙꓳˍ ꓟ ꓟꓵꓽ ꓥ ꓢꓰ ꓡꓳ꓿
ꓖꓳ ꓕꓲ ꓟꓵ ꓗꓪ ꓔꓬ ꓠꓬ ꓠꓴ ꓜ ꓓꓴ ꓟꓽ ꓠꓲꓸ ꓡꓰ꓿ ꓖꓳ ꓗꓪ ꓛ ꓡꓰ ꓓꓴ ꓕꓲ ꓫꓵˍ ꓟꓲ ꓟꓽ ꓙꓳ꓿ ꓟꓵꓽ ꓖꓳ ꓟ ꓗꓪ ꓟ ꓭ. ꓛꓲ ꓠꓬ ꓧꓳꓻ ꓥ ꓡꓳ꓿ ꓪ ꓚꓲ ꓗꓪ ꓐꓰˍ ꓟꓲ ꓙꓲꓽ ꓓꓵ ꓓꓳꓺ ꓡ ꓓˍ ꓡꓳ꓿
ꓖꓳ ꓡꓱ ꓢꓲ ꓠꓴ ꓜꓽ ꓓꓳ ꓡꓰ ꓠꓬ ꓠꓴ ꓔꓯ ꓖꓶ ꓡ ꓟ ꓟꓵꓽ ꓙꓲꓻˍ ꓟ ꓑꓶꓸ ꓓꓴ꓾ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓔꓯ ꓫꓱ ꓖꓶ ꓠ ꓗ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓥꓪ ꓡꓰ ꓠꓴ ꓔꓯ ꓕꓵꓼ ꓪ ꓗꓪ ꓐꓰ ꓟꓸ ꓖꓶˍ ꓟ꓾ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓬꓲ ꓕꓵ ꓪˍ ꓐꓰ꓾ ꓬꓲ ꓕꓵ ꓘꓶˍ ꓐꓰ꓾ ꓬꓲ ꓙꓵ ꓚꓱꓹ ꓕꓱ ꓟ ꓔꓯ ꓟꓽ ꓟꓲ ꓡꓰ ꓠꓹ ꓟ ꓠꓴ ꓤ ꓟꓳ ꓠ ꓗ ꓡꓳ꓿
ꓟꓽ ꓥ ꓠꓬ꓾ ꓠꓴ ꓜꓽ ꓐꓳ ꓡꓰ ꓢꓲ꓾ ꓦꓲ ꓙꓲˍ ꓟ ꓫꓬ ꓢꓲ ꓠꓬꓲ ꓔꓬ ꓗꓷ ꓠꓬ꓾ ꓠꓴ ꓮ ꓠꓬꓲ ꓜꓴ ꓐꓰ ꓛꓵꓼ ꓜꓴ ꓣꓳ ꓜꓴ ꓟꓬ ꓡ ꓢꓲ꓾ ꓠꓴ ꓒꓴ ꓐꓰ ꓠꓴ ꓫꓵꓺ꓾ ꓠꓴ ꓙꓳˍ ꓟ ꓥ ꓕ ꓑꓳ ꓟꓲ ꓟꓬꓽ ꓡ ꓕꓯ
ꓠꓴ ꓠꓲꓹ ꓪꓴꓽ ꓠꓲꓹ ꓘꓹ ꓢꓲ꓾ ꓬꓲ-ꓙꓲ ꓟꓵꓽ ꓚꓳ ꓑ ꓦꓲꓻ ꓗꓪ ꓐꓰ ꓠꓴ ꓔꓯ ꓧꓳꓽ ꓓꓳꓺ ꓡ ꓢꓴ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓔꓯ ꓟꓲ ꓡꓰˍ ꓟ ꓔꓯ ꓗꓳ ꓚꓱˍ ꓡꓳ꓿
ꓮ ꓧꓪ ꓠꓴ ꓠꓲꓹ ꓟ ꓠꓯꓸꓼ ꓗꓪ ꓥꓪ ꓚꓲ ꓛꓬ ꓡꓯ ꓒꓯ, ꓡꓰ ꓥꓪ ꓢꓯꓼ ꓥꓪ ꓪꓽ ꓗꓪ ꓐꓰ ꓐꓳ ꓶꓽ ꓕꓱ ꓟ ꓟꓶ ꓡꓰꓳ꓾ ꓐꓰ꓾ ꓟꓽ ꓐꓯ ꓠꓹ ꓟ ꓠꓴ ꓤ ꓟꓳ꓿
ꓖꓳ ꓡꓱ ꓠꓬꓲ ꓠꓴ ꓠꓬ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓔꓯ ꓓꓵ ꓙ ꓔ꓿ ꓮ ꓡꓲꓳ ꓐꓯ ꓠꓬ ꓐꓳ ꓶꓽ ꓟꓶ ꓡꓰˍ ꓟ ꓢꓯꓼ ꓪꓽ ꓠꓬ ꓬꓲ ꓡꓰ ꓠꓴ ꓔꓯ ꓖꓶ ꓡˍ ꓟ ꓥ ꓡꓳ꓿