Lisu Christian Hymnal
Hymn 61 ꓠꓺ ꓡꓳˍ ꓟ ꓗꓪ ꓐꓰ ꓶꓼ ꓛꓳ ꓫꓱ, ꓛꓳˍ ꓟ Lyrics
ꓠꓴ ꓪ ꓠꓬ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓐꓯ ꓘꓶ ꓔꓯ ꓬꓲ ꓜꓶ ꓐꓰ ꓠꓺ ꓠꓹ ꓔ ꓢꓲ꓾ ꓠꓬꓲꓸ ꓠꓬꓲ ꓥꓪ ꓡꓰ ꓠꓴ ꓪ ꓔꓯ ꓖꓶˍ ꓟ ꓬꓲ ꓕꓵꓼ ꓪ ꓮ ꓙꓵ ꓔꓯ ꓒꓵ ꓛꓳˍ ꓐꓭ ꓠꓬ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓡꓰ ꓟꓲ ꓠꓯ ꓗꓪ ꓟ ꓞꓳ ꓫꓵꓽ ꓐꓴ ꓥ ꓕ ꓑꓳ ꓕꓯ ꓢꓲ ꓗꓪ ꓠꓴ ꓪ ꓔꓯ ꓓꓳ, ꓟꓴ ꓔˍ ꓟ ꓒꓬꓱꓼ ꓡ ꓝꓲˍ ꓥꓳ꓿
ꓖꓳ ꓡꓱ ꓢꓲ ꓠꓴ ꓪ ꓠꓬ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓐꓯ ꓘꓶ ꓔꓯ ꓠꓺ ꓠꓹ ꓐꓭ ꓠꓬ꓾ ꓪꓳꓽ ꓑꓳ. ꓐꓳ ꓔ ꓟ ꓶꓼ ꓤ ꓫꓱ, ꓤ ꓕꓱ ꓟ ꓮ ꓙꓵ ꓠꓴ ꓪ ꓔꓯ ꓖꓼ ꓛꓲ ꓡ ꓢꓲ꓾ ꓠꓴ ꓪ ꓔꓯ ꓬꓯꓼ ꓡˍ ꓥꓳ꓿
ꓡꓳ ꓒꓱ ꓗꓪ ꓔꓬˍ ꓥ ꓟꓲ ꓶꓼ ꓙꓳ ꓫꓱ, ꓙꓳ ꓥꓳ꓿ ꓬꓰ ꓟꓲ ꓗꓪ ꓔꓬ ꓥ ꓟꓲ ꓶꓼ ꓙꓳ ꓫꓱ, ꓙꓳ ꓥꓳ꓿
ꓠꓴ ꓖꓳ ꓓꓱ ꓗꓪ ꓐꓰ ꓦꓵ ꓔ ꓟ꓾ ꓠꓴ ꓬꓰ ꓟꓲ ꓗꓪ ꓓꓱꓼ ꓡˍ ꓟ꓾ ꓠꓴ ꓙꓱ ꓤ ꓡꓰ ꓧꓳꓽ ꓔ ꓟ꓾ ꓠꓴ ꓮ ꓠꓬꓲꓽ ꓜꓴ ꓗꓪ ꓟꓬ ꓡˍ ꓟ꓾ ꓠꓴ ꓛꓵꓼ ꓜꓴ ꓣꓳ ꓜꓴ ꓗꓪ ꓡꓯ. ꓟ ꓮ ꓙꓵ ꓠꓬ ꓶꓼ ꓙꓳ ꓫꓱ, ꓙꓳˍ ꓥꓳ꓿
ꓠꓴ ꓘ ꓔꓴˍ ꓟꓲ꓾ ꓠꓴ ꓫꓪ ꓒꓵ ꓑꓵꓹ ꓡꓴꓻˍ ꓟꓲ ꓶꓼ ꓙꓳ ꓫꓱ, ꓙꓳˍ ꓥꓳ꓿ ꓠꓴ ꓪ ꓓꓳ ꓙꓰˍ ꓟꓲ ꓶꓼ ꓙꓳ ꓫꓱ, ꓙꓳˍ ꓥꓳ꓿ ꓠꓴ ꓪ ꓓꓵ ꓡˍ ꓟꓲ ꓶꓼ ꓙꓳ ꓫꓱ, ꓙꓳ ꓡꓳ꓿
ꓠꓴ ꓪ ꓓꓳ ꓙꓰˍ ꓟꓲ ꓶꓼ ꓙꓳ ꓫꓱ, ꓙꓳˍ ꓥꓳ꓿ ꓠꓴ ꓪ ꓓꓵ ꓡ ꓟꓲ ꓶꓼ ꓙꓳ ꓫꓱꓹ ꓙꓳˍ ꓥꓳ꓿
ꓠꓴ ꓪ ꓔꓯ ꓔꓳꓹ ꓠꓹ ꓟ ꓔꓴ ꓡ ꓢꓲ꓾ ꓠꓴ ꓪ ꓔꓯ ꓛꓴꓽ ꓙꓳ ꓢꓴ ꓔꓯ ꓠꓬ ꓬꓰ-ꓧꓳ-ꓧꓪ ꓡꓰ ꓠꓴ ꓪ ꓟꓲ ꓙꓬ ꓗꓪ ꓫꓴ ꓡꓰ ꓝꓲˍ ꓥꓳ꓿ ꓬꓲ ꓪ ꓠꓬ ꓙ ꓖꓴ ꓕꓲ ꓚꓱˍ ꓗꓪ ꓐꓰ ꓠꓴ ꓔꓯ ꓔꓳ, ꓡ ꓢꓲ꓾ ꓙ ꓖꓴ ꓫꓵꓽ ꓚꓱꓹ ꓗꓪ ꓛꓰꓹ ꓙꓰˍ ꓥꓳ꓿
ꓠꓴ ꓜ ꓗꓹ ꓗꓪ ꓥ ꓟꓲ꓾ ꓠꓴ ꓡꓯ ꓒꓯ, ꓡꓰ ꓬꓰ ꓔ ꓟ ꓮ ꓙꓵ ꓗꓪ ꓥˍ ꓟꓲ꓾ ꓬꓰ-ꓧꓳ-ꓧꓪ ꓡꓰ ꓕꓵꓼ ꓪ ꓖꓶ ꓢꓲ꓾ ꓠꓴ ꓔꓯ ꓶꓼ ꓛꓳ ꓫꓱ, ꓛꓳ ꓡ ꓝꓲˍ ꓥꓳ꓿ ꓬꓰ-ꓧꓳ-ꓧꓪ ꓡꓰ ꓠꓴ ꓪ ꓔꓯ ꓖꓶ ꓡ ꓟ ꓟꓵ ꓗꓪ ꓥ ꓟꓲ ꓬꓲ ꓡꓰ ꓠꓴ ꓪ ꓔꓯ ꓶꓼ ꓛꓳ ꓫꓱ, ꓛꓳ ꓡ ꓝꓲˍ ꓥꓳ꓿
ꓠꓴ ꓪ ꓠꓬ ꓬꓰ-ꓧꓳ-ꓧꓪ ꓠꓴ ꓪ ꓪꓴ-ꓢ ꓕꓵꓼ ꓪ ꓔꓯ ꓒꓵ ꓛꓳ ꓢꓲ꓾ ꓬꓲ ꓚꓱ, ꓗꓪ ꓛꓳ ꓫꓱˍ ꓐꓭ ꓠꓬ꓾ ꓬꓲ ꓡꓰ ꓠꓴ ꓔꓯ ꓪꓵꓼ ꓔ ꓟˍ ꓡꓰ ꓐꓰ ꓬꓰ‐ꓧꓳ-ꓧꓪ ꓠꓬ ꓬꓲ ꓚꓲ ꓛꓬ ꓐꓱ ꓶ ꓢꓲ ꓫꓬ ꓟ ꓑ ꓫꓬ ꓬꓰ ꓠꓹ ꓟ꓾ ꓠꓴ ꓪ ꓔꓯ ꓕꓶꓻ ꓡꓰ ꓝꓲˍ ꓥꓳ꓿