Lisu Christian Hymnal
Hymn 56 ꓙꓲˍ ꓟ ꓤ ꓟꓶ ꓤ ꓔꓯ ꓫꓱ. ꓖꓶˍ ꓟ Lyrics
ꓖꓳ ꓡꓱ ꓢꓲ ꓪꓴ-ꓢ ꓠꓬ ꓮ-ꓐ-ꓡ-ꓦ ꓔꓯ꓾ ꓠꓴ ꓤ ꓟꓶ ꓢ-ꓣ-ꓬ ꓔꓯ ꓠꓬ ꓢ-ꓣ-ꓬ ꓐꓰ ꓕꓽ ꓘꓴ꓾ ꓮ ꓡꓲꓳ ꓐꓯ ꓠꓬ ꓬꓲ ꓔꓯ꓾ ꓢ-ꓣ꓾ ꓐꓰ ꓘꓴ ꓠ ꓗˍ ꓡꓳ꓿
ꓥꓪ ꓠꓬ ꓬꓲ ꓔꓯ ꓶꓼ ꓤ ꓫꓱꓹ ꓤ ꓖꓶ ꓢꓲ꓾ ꓬꓲ ꓗꓪ ꓐꓰ ꓠꓴ ꓔꓯ ꓤꓽ ꓕꓲ ꓣꓳ ꓖꓶ ꓡˍ ꓥꓳ꓿ ꓥ ꓡꓳ꓾ ꓥꓪ ꓠꓬ ꓢ-ꓣ ꓔꓯ ꓶ ꓤ ꓫꓱ, ꓤ ꓖꓶ ꓢꓲ꓾ ꓬꓲ ꓠꓬ ꓮ ꓟꓬꓹ ꓗꓴꓷꓼ ꓟ ꓟꓹ ꓟꓺ ꓒꓬꓱꓼ ꓡˍ ꓥꓳ꓿ ꓞꓳ ꓫꓵꓽ ꓪ ꓔꓲ ꓠꓬ ꓬꓲ ꓗꓪ ꓐꓰ ꓡ ꓥꓳ꓾ ꓐꓯ ꓡꓳ꓿
ꓬꓲ ꓪ ꓠꓬ ꓤ-ꓐꓱ-ꓘ ꓔꓯ ꓶꓼ ꓥꓳ ꓙꓱ ꓖꓶ ꓢꓲ ꓕꓱ ꓡꓱ ꓐꓯ ꓡꓳ꓾ ꓥꓪ ꓠꓴ ꓠꓬꓲ ꓟꓺꓳ꓾ ꓟꓶꓽ ꓟꓶꓽ ꓔꓴꓺ ꓔꓴ ꓣꓳ ꓟ ꓟꓹ ꓟ ꓒꓬꓱꓼ ꓡ ꓝꓲ꓿ ꓠꓴ ꓞꓲꓼ ꓤ ꓡꓯ, ꓤ ꓐꓴ ꓠꓬ ꓬꓲ ꓔꓯ ꓠꓲ, ꓜꓳ ꓢꓴ ꓗ ꓘꓶ ꓔꓯ ꓣꓴ ꓟꓶ ꓡꓰ ꓝꓲ꓾ ꓐꓯ ꓡꓳ꓿
ꓖꓳ ꓡꓱ ꓢꓲ ꓗ ꓘꓶ ꓗꓪ ꓔꓬ ꓟ ꓑ ꓫꓬ ꓮ ꓙꓵ ꓢꓴ ꓐꓰ ꓞꓳ ꓪꓴ ꓞꓳ ꓔꓲ ꓐꓴ ꓡꓰ꓾ ꓥꓪ ꓠꓴ ꓠꓬ ꓢꓷ ꓙ ꓟꓳ ꓙ ꓢꓴ ꓥ ꓡꓳ꓾ ꓠꓴ ꓦꓲ ꓗꓪ ꓓꓵ ꓡ ꓟ ꓤ ꓟꓶ ꓤ ꓔꓯ ꓠꓬ ꓬꓲ-ꓢꓷ-ꓡꓰ ꓦꓲ ꓔꓯ ꓜꓶ ꓢꓴ ꓡ ꓚꓰꓼ ꓐꓰ ꓡꓲ-ꓬ ꓡꓰ ꓐꓰ ꓬꓰ-ꓧꓳ-ꓧꓪ ꓡꓰ ꓬꓲ ꓔꓯ ꓬꓲ ꓖꓳ ꓡꓱ ꓒꓬꓱꓼ ꓡ ꓝꓲ꓿ ꓰ-ꓩ-ꓕ ꓗꓪ ꓠꓴ ꓔꓯ ꓶꓼ ꓙꓳ ꓫꓱ, ꓙꓳ ꓝꓲ ꓢꓲ꓾ ꓐꓱ-ꓡꓲ-ꓦꓱ ꓗꓪ ꓟꓬꓱ ꓓꓳ ꓙꓳ ꓡ ꓝꓲ꓿
ꓬꓰ-ꓧꓳ-ꓧꓪ ꓡꓰ ꓤ ꓟꓶ ꓡꓯꓸ ꓕꓱ ꓕꓲ ꓣꓳ ꓗꓪ ꓐꓰ ꓠꓴ ꓔꓯ ꓞꓲꓼ ꓤ ꓡꓯ, ꓤ ꓙꓳ ꓝꓲ ꓢꓲ꓾ ꓠꓴ ꓦꓲ ꓔꓯ ꓠꓬ ꓕ-ꓟ ꓡꓰ ꓬꓴ-ꓔ ꓔꓯ ꓦꓵ ꓖꓶˍ ꓟ ꓩ-ꓡꓷ-ꓢꓶ ꓦꓲˍ ꓡꓰˍ ꓐꓰ ꓗꓷ ꓡꓰ ꓝꓲ꓾ ꓐꓯˍ ꓡꓳ꓿
ꓠꓴ ꓠꓯꓸꓼ ꓗꓪ ꓓꓯˍ ꓟ ꓠꓲ, ꓟ ꓠꓬꓲꓽ ꓔꓱ, ꓟꓽ ꓙꓳ ꓟ ꓙꓵꓻ ꓠꓲ, ꓔꓯˍ ꓟꓲ ꓥꓪ ꓧꓪ. ꓛꓲ ꓡˍ ꓡꓳ꓿ ꓙꓵꓻ ꓠꓲ, ꓕꓱ ꓟ ꓠꓬ꓾ ꓧꓶ. ꓕꓯ ꓡꓰ ꓠꓴ ꓮ ꓤ ꓑꓯ, ꓡꓳ-ꓬꓲ ꓐꓰ ꓠꓴ ꓟ, ꓟ ꓬꓴ-ꓠꓲ-ꓢꓶ ꓠꓯꓸꓼ ꓗꓪ ꓓꓯˍ ꓡꓳ꓿ ꓠꓴ ꓠꓯꓸꓼ ꓗꓪ ꓟꓲ ꓓꓯˍ ꓡꓳ꓾ ꓐꓰ꓾ ꓥꓪ ꓦ ꓡꓱ ꓐꓳˍ ꓡꓳ꓿
ꓙꓲˍ ꓟ ꓐꓰ ꓔꓱˍ ꓟ ꓤ ꓟꓶ ꓤ ꓮ ꓟ ꓧꓪ ꓟꓶ ꓐ ꓡˍ ꓡꓳꓺꓽ꓿ ꓬꓲ ꓠꓬ ꓒꓵꓽ ꓡꓳ ꓢꓶꓸ ꓟꓽ ꓞꓲ ꓒꓵˍ ꓡꓳ꓿
ꓬꓲ ꓤ ꓖꓴ ꓠꓲ, ꓟ ꓠꓬ ꓬꓲ ꓔꓯ ꓦ ꓡꓱ ꓐꓳˍ ꓡꓳ꓿ ꓬꓲ ꓤ ꓖꓴ ꓐꓶ, ꓟꓶˍ ꓟˍ ꓟꓲ ꓟꓽ ꓛ ꓡꓰ꓿
ꓬꓲ ꓠꓬ ꓬꓲ ꓕꓲ ꓤꓶ ꓡꓱꓸꓼ ꓗꓪ ꓬꓲ ꓤ ꓖꓴ ꓔꓯ ꓙꓲˍ ꓟ ꓬꓰ ꓖꓶ ꓢꓲ꓾ ꓥꓶˍ ꓟ ꓕꓲ ꓫꓵꓽˍ ꓟꓲ ꓟꓽ ꓬꓰ ꓖꓶ꓿
ꓮ ꓣꓳ ꓟꓵˍ ꓐꓰ ꓪꓰ ꓜꓲ ꓧꓪ ꓢꓲ꓾ ꓠꓲ, ꓒꓴ ꓒꓴˍ ꓐꓰ ꓟꓬꓱꓽ ꓬꓰˍ ꓡꓳ꓿
ꓬꓲ ꓠꓬ ꓶꓻ ꓡꓯ ꓟꓴ ꓢꓴ ꓦꓲ ꓡꓲˍ ꓡꓰ ꓐꓰ ꓗ ꓢꓲ꓾ ꓶ ꓤ ꓗꓪ ꓐꓰ ꓜ ꓓꓴ ꓔꓯ, ꓡˍ ꓡꓳ꓿
ꓬꓲ ꓠꓬ ꓟꓲ ꓕꓯ ꓟꓽ ꓫꓬ ꓕꓯˍ ꓡꓰ ꓔꓴ ꓢꓲ꓾ ꓦꓲ ꓘꓴ ꓗꓪ ꓟ ꓞꓳ ꓤ ꓐꓱ ꓶ ꓜ ꓓꓴ ꓫꓬꓹ ꓖꓶ ꓢꓲ ꓠꓬꓲ꓾ ꓬꓲ ꓚꓳ ꓟ ꓐꓴ ꓔꓯ ꓟꓬꓱ ꓬꓰ ꓝꓲˍ ꓡꓳ꓿
ꓬꓲ ꓟꓷ ꓠꓷ ꓒꓴ ꓗꓷ ꓠꓬ ꓙ ꓗꓴ ꓠꓲꓹ ꓐꓯ ꓘꓶ ꓓꓳ ꓡˍ ꓡꓳ꓿ ꓠꓲ, ꓙ ꓟꓬ ꓗꓳˍ ꓟ ꓟꓸ ꓘꓶ ꓠꓬ ꓬꓲ ꓡ ꓛꓱ ꓗꓪ ꓓˍ ꓡꓳ꓿
ꓬꓲ ꓠꓬ ꓬꓲ ꓦꓲ ꓗꓪ ꓟ ꓡ ꓞꓳ ꓞꓳ ꓙꓳˍ ꓟ ꓔꓯ ꓜꓲ ꓜꓲ ꓟꓵ ꓟꓵ ꓡꓳꓸ ꓙ ꓢꓲ꓾ ꓞꓳ ꓐꓴꓻ ꓜ ꓓꓴ ꓔꓯ ꓬꓲ ꓟꓽ ꓜ꓿