Lisu Christian Hymnal
Hymn 51 ꓟꓴ ꓗꓪ ꓟꓲ ꓠꓯ ꓬꓲ ꓫꓵꓼ Lyrics
ꓖꓳ ꓕꓯ ꓟꓴ ꓗꓪ ꓬꓲ ꓫꓵꓼˍ ꓐꓰ ꓟꓲ ꓠꓯ ꓬꓲ ꓫꓵꓼ ꓔꓯ ꓥꓪ ꓟꓳˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓬꓲ ꓪꓴꓸ ꓕꓲ ꓟˍ ꓐꓰ ꓟꓲ ꓠꓯ ꓬꓲ ꓪꓴꓸ ꓕꓲ ꓟˍ ꓠꓬ꓾ ꓗꓳ. ꓙꓰꓻꓳ꓿ ꓕꓱ ꓡꓱ ꓖꓳ ꓑꓳ. ꓬꓲ ꓡꓴꓽ ꓐꓱꓻ ꓟꓽ ꓙꓳ꓿
ꓬꓲ ꓤ ꓖꓴ ꓐꓱ ꓶ ꓙꓽ ꓖꓶ ꓢꓲ꓾ ꓬꓺ ꓔꓸˍ ꓟ ꓟꓯꓸ ꓡꓯꓸ ꓟˍ ꓡꓰˍ ꓐꓰ꓾ ꓢꓲ ꓫꓬˍ ꓟ ꓡꓳ ꓒꓱ ꓙꓱ‐ꓣꓴ‐ꓢ‐ꓡꓱ ꓫꓵꓼ ꓠꓬ꓾ ꓟꓴ ꓗꓪ ꓗꓪ ꓪꓴ-ꓢ ꓔꓯˍ ꓐꓰ ꓬꓯꓼ ꓡˍ ꓟˍ ꓟꓲ꓾ ꓥꓪ ꓟꓳˍ ꓡꓳ꓿
ꓖꓳ ꓟˍ ꓡꓰ ꓟꓽ ꓞꓲ꓾ ꓙꓵꓽ ꓠꓬꓲ ꓕꓲꓺ ꓗꓪˍ ꓐꓰ ꓓꓳ ꓡˍ ꓟ ꓢꓯꓼ ꓓꓽ ꓟ ꓥꓪ ꓑ ꓙˍ ꓡꓳ꓿ ꓢꓯꓼ ꓖꓳ ꓟ ꓡꓰ꓾ ꓠꓬꓲ ꓠꓹ꓾ ꓪꓴ-ꓢ ꓔꓬ ꓖꓴ ꓠꓬ ꓞꓳ ꓤ ꓗꓳ ꓡꓳ ꓗꓪ ꓥ ꓢꓲ꓾ ꓬꓲ ꓠꓬ ꓬꓲꓸ ꓪ ꓐꓰ ꓕꓲ ꓪꓺꓼ ꓔꓬˍ ꓥꓳ꓿ ꓬꓲ ꓪ ꓠꓬ ꓬꓲ ꓑ ꓫꓬꓼ ꓐꓴ ꓬꓰˍ ꓥꓳ꓿
ꓬꓲ ꓪ ꓟꓬ ꓢꓶ ꓗꓪ ꓟ ꓟꓬꓺ ꓐꓰꓺ ꓥ ꓕ ꓑꓳ ꓬꓲ ꓡꓰ ꓫꓵꓹ ꓦ ꓖꓶˍ ꓥꓳ꓿ ꓕꓱ ꓡꓱ ꓖꓳ ꓑꓳ ꓫꓵꓻˍ ꓟ ꓟꓽ ꓙꓳ꓿ ꓠꓲꓹ ꓥꓴˍ ꓟˍ ꓐꓰ꓾ ꓮ ꓛꓬ ꓙꓱˍ ꓟˍ ꓐꓰ꓾ ꓠꓻˍ ꓟˍ ꓟꓲ ꓕꓱ ꓡꓱ ꓖꓳ ꓑꓳ ꓟꓽ ꓙꓳꓻ꓿ ꓮ ꓡꓲꓳ ꓐꓯ ꓠꓬ ꓧꓶ ꓕꓯ ꓟ ꓠꓽ꓾ ꓗꓳꓸ ꓙꓰꓳ꓾ ꓐꓯˍ ꓡꓳ꓿
ꓙꓵꓽ ꓠꓬꓲꓸ ꓕꓲꓺ ꓗꓪ ꓠꓬꓲꓸ ꓠꓸ ꓢꓴ ꓡꓰ꓾ ꓠꓬꓲꓺ ꓠꓹ꓾ ꓙꓳˍ ꓟ ꓥ ꓕ ꓑꓳ ꓔꓯ ꓥꓪ ꓡꓰ ꓬꓲꓸ ꓫꓵꓼ ꓒꓬꓱꓼ ꓡ ꓝꓲꓳ꓾ ꓐꓯˍ ꓡꓳ꓿ ꓝꓮꓲ ꓬꓲ ꓡꓰ꓾ ꓐꓳ ꓔꓸ꓿ ꓮ ꓡꓲꓳ ꓐꓯ ꓠꓬ ꓐꓯ ꓘꓶ ꓕꓱ ꓟ ꓦ ꓡꓱ ꓐꓳˍ ꓟˍ ꓐꓰ ꓔꓱꓹ ꓚꓵˍ ꓟ ꓥ ꓡꓳ꓾ ꓐꓯ ꓡꓳ꓿
ꓝꓮꓲ ꓬꓲ ꓡꓰ ꓥꓪ ꓔꓯ ꓕꓱ ꓡꓱ ꓐꓯ ꓢꓰꓽ ꓡꓳ꓾ ꓬꓰ ꓓꓳ ꓡꓰꓳ꓾ ꓥꓪ ꓠꓬ ꓮ-ꓡ-ꓩ ꓐꓰ ꓳ-ꓟꓲ-ꓗꓽ꓾ ꓬꓲ ꓪꓴꓸ ꓔꓴˍ ꓟˍ ꓐꓰ ꓡꓳꓹ ꓬꓰˍ ꓟ ꓥ ꓡꓳ꓿ ꓥꓪ ꓠꓬ ꓢꓯꓼ ꓟꓬ ꓬꓲ ꓙꓬ ꓬꓲ ꓝꓳꓹ ꓟꓶ ꓗꓪ ꓐꓰ ꓢꓲꓼ ꓢꓴ ꓔꓯ ꓬꓲ ꓒꓵꓽ ꓟꓽ ꓧꓪ ꓧꓪ ꓖꓶ ꓓꓳˍ ꓥꓳ꓿
ꓧꓪꓸ ꓡꓰ ꓢꓴ ꓠꓬ ꓕꓱ ꓟꓬ ꓫꓵꓽ ꓟꓺ ꓟꓶˍ ꓥꓳ꓿ ꓥꓪ ꓠꓬ ꓬꓲ ꓪꓴ-ꓢ ꓬꓰ ꓢꓲ꓾ ꓬꓲˍ ꓟꓲ ꓥꓪ ꓤ ꓬꓰˍ ꓥꓳ꓿
ꓖꓳ ꓕꓯ ꓪꓴ-ꓢ ꓐꓰ ꓮ ꓣꓳ ꓤ ꓙꓵꓽ ꓠꓬꓲ ꓕꓲꓺ ꓗꓪ ꓐꓰ꓾ ꓡꓳ ꓒꓱ ꓙ ꓖꓴ ꓓꓽ ꓟ ꓔꓱꓺ ꓦꓲ ꓗꓪ ꓒꓵꓽ ꓡꓳꓺ ꓫꓬꓻˍ ꓡꓰˍ ꓐꓰ ꓐꓬꓱꓼ ꓡꓱꓼ ꓡꓱꓼˍ ꓟ ꓢꓯꓼ ꓟꓬ ꓬꓲ ꓙꓬ ꓡꓳꓻ ꓕꓲ ꓓꓴꓽ ꓬꓲꓻ ꓔꓬˍ ꓟ꓾ ꓬꓲꓸ ꓥꓪꓻ ꓔꓯ ꓟꓳꓸ ꓖꓶ ꓡˍ ꓡꓳ꓿
ꓡꓳ ꓒꓱꓻ ꓙ ꓖꓴ ꓓꓽ ꓟ ꓔꓱꓺ ꓦꓲ ꓗꓪ ꓬꓲ ꓔꓬ ꓟ ꓬꓲ ꓙꓬ ꓡꓳ ꓖꓳꓻ ꓐ ꓕ ꓐ ꓗꓪ ꓠꓬ ꓬꓲ ꓢꓶ ꓞꓲꓻ ꓠꓬꓲꓽ ꓫꓵꓽ ꓓꓱꓼ ꓢꓲ꓾ ꓦ ꓐ ꓕꓲ ꓟˍ ꓡꓰ ꓕꓲ ꓬꓲ ꓢꓶ ꓓꓱꓼ ꓟ ꓢꓯꓼ ꓟꓬ ꓢꓲ, ꓜꓲ ꓙꓳˍ ꓡꓳ꓿ ꓢꓲ, ꓜꓲ ꓬꓲ ꓒꓬꓽ ꓠꓬ ꓞꓳ ꓫꓵ ꓐꓴ ꓔꓯ ꓫꓬ, ꓓ ꓡꓰ ꓠ ꓟ ꓥ ꓡꓳ꓿
ꓖꓳ ꓗ ꓠꓯ ꓠꓬ꓾ ꓙꓱ ꓔ ꓡꓳ ꓫꓵ ꓟꓽ ꓙꓳ꓿ ꓪꓴ-ꓢ ꓐꓰ ꓮ ꓣꓳ ꓤ ꓙꓵꓽ ꓠꓬꓲ. ꓕꓲꓺ ꓠꓬ ꓡꓳ ꓒꓱ ꓠꓯꓸꓼ ꓗꓪ ꓓ, ꓢꓲ꓾ ꓬꓲ ꓚꓳ ꓑ ꓐꓴ ꓠꓬ ꓬꓲ ꓔꓯ ꓣꓱ ꓙˍ ꓥꓳ꓿
ꓬꓲ ꓪ ꓠꓬ ꓬꓲ ꓒꓬꓱꓽ ꓔꓯ ꓟꓳˍ ꓥꓳ꓿ ꓬꓲ ꓟꓬꓱꓺˍ ꓟꓲ ꓬꓲ ꓪ ꓥꓷꓼ ꓛꓲꓺ ꓗꓪ ꓐꓳ ꓔˍ ꓥꓳ꓿
ꓖꓳ ꓗ ꓠꓯ. ꓢ ꓘꓪꓺ ꓟꓽ ꓙꓳ꓿ ꓟꓬ ꓡꓴꓻ ꓠꓬꓲ ꓟꓳ ꓓꓴ ꓥˍ ꓟꓲ꓾ ꓟꓲꓽ ꓟꓲ ꓠꓬꓲ ꓟꓳ ꓓꓴ ꓥˍ ꓟꓲ꓾ ꓬꓲ ꓪ ꓣꓱꓽ ꓟꓽ ꓬꓯꓼ꓿ ꓮ ꓡꓲꓳ ꓐꓯ ꓠꓬ ꓢꓲꓺ ꓒ ꓪꓴ-ꓢ ꓠꓬ ꓬꓲ ꓪ ꓠꓬꓲ ꓟꓳ ꓓꓴ ꓥ ꓡꓳ꓿ ꓬꓲ ꓪ ꓠꓬ ꓕꓲ ꓞꓲꓼ ꓕꓲ ꓑ ꓪ ꓔꓲ ꓣꓱ ꓔꓬ ꓥꓳ꓿