Lisu Christian Hymnal
Hymn 41 ꓶꓼ ꓥꓳ ꓫꓱ, ꓥꓳ ꓟꓬꓱꓽ ꓐꓬꓱꓽ ꓘꓶꓽ ꓙ ꓖꓴ Lyrics
ꓬꓰ-ꓧꓳ-ꓧꓪ ꓔꓯ ꓧꓪ ꓟꓶ ꓓˍ ꓢꓰꓽ ꓕꓯˍ ꓡꓰ ꓬꓲ ꓔꓯ. ꓧꓪ꓿ ꓬꓲ ꓕꓲꓺ ꓞˍ ꓕꓯˍ ꓡꓰ ꓬꓲ ꓔꓯ ꓘꓴ ꓓꓰꓽ ꓟꓴ꓿
ꓞꓳ ꓥꓶ. ꓠꓬ ꓚꓲ ꓛꓬ ꓙ ꓖꓴ ꓔꓯ ꓧ, ꓗꓷ ꓢꓲ ꓟꓽ ꓙꓲ ꓫꓬ ꓢꓴˍ ꓟꓲ ꓚꓲ ꓛꓬ ꓓꓵ ꓙ ꓟ ꓔꓯ ꓡꓳꓺ ꓩꓴ ꓗꓷ ꓢꓲ ꓠꓬꓲ꓾ ꓬꓰ-ꓧꓳ-ꓧꓪ ꓔꓯ ꓬꓲꓼ ꓡꓯ꓿ ꓬꓰ-ꓧꓳ-ꓧꓪ ꓠꓬ ꓬꓲ ꓔꓯ ꓫꓱꓸ ꓤˍ ꓥꓳ꓿ ꓥꓪ ꓠꓴ ꓪꓴ-ꓢ ꓔꓯ ꓬꓲꓼ ꓡ ꓠꓯˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠ ꓠꓲ ꓡꓳ ꓡꓳ ꓡꓰ ꓖꓼ ꓖꓶ ꓥꓳ꓿
ꓬꓰ-ꓧꓳ-ꓧꓪ ꓡꓰ ꓐꓯˍ ꓡꓳ꓿ ꓥꓪ ꓓꓵ ꓙ ꓟ ꓠꓬ ꓠꓴ ꓪ ꓓꓵ ꓙ ꓟ ꓟꓽ ꓥ꓾ ꓠꓴ ꓪ ꓚꓱꓹˍ ꓟꓲ ꓥꓪ ꓚꓱꓹ ꓟꓽ ꓥ꓿
ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓠꓬ ꓟꓲ ꓠꓯ ꓢꓲ ꓟꓽ ꓞꓲ ꓟꓴˍ ꓟ ꓡꓰ ꓐꓰ ꓥꓪ ꓚꓱ,ˍ ꓟꓲ ꓠꓴ ꓪ ꓚꓱ, ꓢꓶ. ꓟꓽ ꓞꓲ ꓟꓴˍ ꓟ ꓥ ꓡꓳ꓿ ꓥꓪ ꓓꓵ ꓙˍ ꓟ ꓟꓲ ꓠꓴ ꓪ ꓓꓵ ꓙˍ ꓟ ꓢꓶ. ꓟꓽ ꓞꓲ ꓟꓴ ꓟ ꓥ ꓡꓳ꓿
ꓮ ꓡꓲꓳ ꓐꓯ ꓠꓬ ꓟꓶ ꓦ ꓐꓰ ꓪ ꓠꓬ ꓟꓴ ꓗꓪ ꓗꓪ ꓐꓰ ꓬꓯꓼ ꓡꓰ ꓢꓲ꓾ ꓟꓽ ꓚꓱ, ꓓꓯ ꓙꓰ ꓙꓰ ꓟꓲ ꓠꓯ ꓔꓯ ꓠꓱ ꓡꓰ ꓝꓲ ꓢꓲ ꓣꓱ ꓡ ꓓꓱ ꓡ ꓝꓲˍ ꓟ ꓡꓰˍ ꓐꓰ꓾ ꓫꓵ. ꓢꓴ ꓔꓯ ꓬꓲ ꓫꓵꓸ ꓖꓶ ꓡ ꓢꓲ꓾ ꓜꓽ ꓢꓴ ꓔꓯ ꓜꓽ ꓓꓴ ꓖꓶ ꓡˍ ꓟ ꓡꓰ ꓐꓰ꓿
ꓥꓪ ꓟꓷ ꓠꓷ ꓗꓪ ꓐꓰ ꓓꓳ ꓙꓰˍ ꓟ ꓥꓪ ꓐꓯ ꓘꓶˍ ꓟꓲ ꓬꓲ ꓖꓳ ꓡꓱ ꓗ ꓡꓳ꓿ ꓥꓪ ꓔꓯ ꓬꓲ ꓖꓳ ꓟꓽ ꓚꓱ ꓬꓲ ꓡꓻꓳ꓿ ꓥꓪ ꓠꓲ, ꓡꓶ ꓔꓯ ꓬꓰ ꓐꓲ ꓡꓰ ꓝꓲˍ ꓥꓳ꓿ ꓥꓪ ꓐꓯ ꓘꓶ ꓔꓯ ꓝꓲ ꓩꓴ ꓗꓷ ꓟ ꓫꓵꓽ ꓪꓴ ꓗꓪˍ ꓟꓲ ꓶ ꓛꓳ ꓡˍ ꓥꓳ꓿
ꓖꓳ ꓡꓱ ꓥ ꓟꓲ ꓕꓳ ꓶ ꓗꓪ ꓮ ꓡꓲ ꓐꓯˍ ꓡꓳꓺꓽ꓿ ꓐꓯ ꓘꓶ ꓠꓬ ꓠꓴ ꓒ ꓕꓲ ꓗꓪ ꓓˍ ꓢꓲ꓾ ꓠꓴ ꓟꓷ ꓠꓷ ꓐꓰ ꓠꓴ ꓠꓲ, ꓟ ꓠꓯꓸꓼ ꓗꓪ ꓓꓯˍ ꓡꓳ꓾ ꓐꓯˍ ꓡꓳ꓿ ꓕꓱ ꓟ ꓠꓬ ꓥꓪ ꓠꓴ ꓚ ꓟꓸ ꓖꓶ ꓟ ꓙꓵꓻ ꓠꓲ ꓟꓸ ꓟꓲ ꓥ ꓢꓲ꓾ ꓕꓱ ꓡꓱ ꓐꓯ ꓡꓳ꓿
ꓠꓴ ꓠꓬ ꓟꓷ ꓠꓷ ꓡꓰ ꓬꓰ-ꓢꓴ ꓠ ꓢꓲ-ꓒ ꓥ ꓡꓳ꓾ ꓐꓰ ꓣꓷꓠ ꓢꓲ꓾ ꓠꓲ, ꓟ ꓗꓪ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓫꓵˍ ꓟ ꓗꓪ ꓐꓰ ꓢꓯ ꓬꓲꓼ ꓡ ꓝꓲꓳ꓾ ꓐꓰ ꓙꓵꓻˍ ꓕꓯ ꓠꓽ ꓠꓴ ꓢꓯ ꓟꓬ ꓝ ꓟꓶ ꓥꓳꓻ ꓐꓯˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓠꓲ, ꓟ ꓡꓰ ꓙꓵꓻ ꓢꓲ ꓙꓲ ꓫꓬ ꓟ ꓚꓬ, ꓟꓶ ꓡꓳ꓿ ꓟꓷ ꓠꓷ ꓡꓰ ꓣꓷꓠ ꓢꓲ꓾ ꓢꓯꓼ ꓟꓬ ꓝ ꓟꓶˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓕꓳ ꓶ ꓗꓪ ꓮ ꓟ ꓥˍ ꓟꓲ ꓬꓲ ꓔꓯ ꓙꓵꓻ ꓢꓴ ꓠꓬ ꓟꓽ ꓫ ꓔꓳ ꓡꓰ ꓐꓯˍ ꓡꓳ꓿
ꓬꓴ-ꓔ ꓡ ꓞꓳ ꓐꓰ ꓦꓲ-ꓡꓲ ꓡ ꓞꓳ ꓦꓰꓽ ꓓꓴ ꓟꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓮ ꓙꓵ ꓢꓴ ꓢꓲ-ꓒ ꓠꓬ ꓕꓲ ꓣꓳˍ ꓡꓰꓽ ꓥ ꓢꓲ꓾ ꓬꓲ ꓔꓯ ꓶꓼ ꓓꓰꓽ ꓢꓴ ꓥ ꓕ ꓑꓳ ꓐꓱ ꓶ ꓐꓳˍ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓢꓲ-ꓒ ꓟꓬꓱ ꓔꓯ ꓘꓴ ꓢꓴ ꓮ ꓟ ꓥˍ ꓟꓲ ꓢꓯꓼ ꓟꓬ ꓝ. ꓟꓶˍ ꓥꓳ꓿
ꓖꓳ ꓡꓱ ꓥˍ ꓟꓲ ꓬꓲ ꓔꓯ ꓟꓽ ꓙꓵꓻ ꓠꓬꓲ ꓢꓴ ꓠꓬ꓾ ꓮ ꓡꓲ ꓐꓰ ꓢꓲ꓾ ꓬꓲ ꓔꓯ ꓘꓴ ꓓꓰ ꓢꓰꓽ꓿ ꓬꓲ ꓓꓳꓽ ꓔꓯ ꓟꓽ ꓑ ꓙ ꓠꓬꓲ ꓢꓴ ꓠꓬ ꓮ ꓡꓲ ꓐꓰ ꓢꓲ ꓬꓲ ꓔꓯ ꓙꓵꓽ ꓢꓰ꓿ ꓟ. ꓟꓲ ꓚ ꓢꓴ ꓟꓽ ꓙꓳ ꓠꓬ ꓮ ꓡꓲ ꓐꓰ ꓢꓲ ꓑ ꓙ ꓢꓰꓽ꓿
ꓬꓲ ꓪ ꓔꓯ ꓟꓽ ꓝꓲ ꓩꓴ ꓗꓷ ꓠꓬ꓾ ꓮ ꓡꓲ ꓐꓰ ꓢꓲ ꓟ. ꓟꓲ ꓚ ꓢꓰ꓿ ꓕꓱ ꓟ ꓠꓬ ꓕꓳ ꓶ ꓗꓪ ꓶꓼ ꓥꓳ ꓫꓱ, ꓥꓳ ꓚ ꓖꓶ ꓡ ꓢꓴ ꓛꓲ ꓒꓯ, ꓠꓬ ꓮ ꓘꓶ ꓡꓳ. ꓐꓲ ꓡꓳ ꓟꓽ ꓐꓰ꓾ ꓐꓳ ꓔ ꓟ ꓡꓰ ꓐꓰ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓙꓵ ꓢꓴ ꓠꓬ ꓶꓼ ꓥꓳ ꓫꓱ, ꓥꓳ ꓔꓯ ꓠꓺ ꓡꓳ. ꓢꓴ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓬꓲ-ꓢꓬ ꓡꓰ ꓢꓲ-ꓒꓽꓳ ꓥꓪ ꓠꓴ ꓐꓯ ꓟ ꓖꓶ ꓟ ꓮ ꓟ ꓙꓵˍ ꓡꓳꓺꓽ꓾ ꓐꓯˍ ꓡꓳ꓿
ꓖꓳ ꓡꓱ ꓠꓬꓲ ꓙꓵꓻ ꓠꓲ, ꓠꓬ ꓑ ꓙˍ ꓟ ꓗꓪ ꓐꓰ ꓥ ꓡꓳ꓿ ꓑ ꓙˍ ꓟ ꓠꓬ꓾ ꓙꓲ-ꓢꓴ ꓐꓯ ꓘꓶ ꓗꓪ ꓐꓰ ꓥ ꓡꓳ꓿