Lisu Christian Hymnal
Hymn 35 ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓫꓱꓽ ꓠꓯˍ ꓟ Lyrics
ꓥꓪ ꓬꓲ, ꓢꓶ ꓠꓬ ꓕꓱ ꓡꓱ ꓥ ꓡꓳ꓿ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓫꓱꓽ꓿ ꓖꓳ ꓡꓱ ꓠꓬ ꓧꓪ ꓖꓳ ꓓꓱ ꓦꓯꓸ ꓠꓲ, ꓙꓵˍ ꓟ ꓔꓯ ꓠꓴ ꓪ ꓟꓽ ꓬꓰ ꓓꓳ ꓡꓻꓳ꓿
ꓮ ꓡꓲꓳ ꓐꓯ ꓠꓬ ꓧꓪꓽ ꓠꓲ, ꓡꓶ ꓦꓯꓸ ꓠꓲ, ꓙꓵˍ ꓟ ꓠꓬ꓾ ꓢꓲ‐ꓫꓬ‐ꓟ‐ꓦ ꓐꓰ ꓟꓯꓼ ꓬꓰ ꓡꓯ ꓘꓳˍ ꓡꓳ꓿ ꓢꓲ‐ꓫꓬ‐ꓟ‐ꓦ ꓟꓲ ꓧꓪꓽ ꓠꓲ, ꓡꓶ ꓐꓰ ꓟꓯꓼ ꓬꓰ ꓡꓯ ꓘꓳˍ ꓡꓳ꓿ ꓠꓴ ꓪ ꓠꓲ, ꓫꓵˍ ꓟ ꓟꓽ ꓬꓰ ꓐ ꓡ ꓠˍ ꓟ ꓕꓱ ꓠꓬꓲꓽ ꓫꓵ ꓒꓳ, ꓡꓯ ꓘꓳˍ ꓡꓳ꓿
ꓖꓳ ꓡꓱ ꓥ ꓟꓲ ꓢꓲ‐ꓫꓬ‐ꓟ‐ꓦ ꓡꓰ ꓠꓴ ꓪ ꓔꓯ ꓧꓳꓽ ꓙꓰˍ ꓕꓯꓽ ꓠꓽ ꓠꓴ ꓪ ꓠꓬ ꓙꓵꓽ ꓗ ꓠꓯ. ꓘꓪ ꓟꓽ ꓔꓬ꓿
ꓧꓪꓽ ꓠꓲ, ꓡꓶ ꓟꓬꓱꓽ ꓠꓽ ꓢꓲꓽ ꓢꓲꓽ ꓟꓳ ꓞ, ꓢꓲ꓾ ꓕꓱ ꓟ ꓥ ꓡꓳ꓿ ꓟꓽ ꓢꓲꓽ ꓟꓽ ꓫꓬ ꓟ ꓟꓽ ꓫꓬꓻ ꓟꓽ ꓖ ꓟ ꓦꓯ. ꓠꓲ, ꓙꓵˍ ꓟꓻ
ꓠꓲꓽ ꓐꓬꓱꓽ ꓔꓯ ꓪꓴ. ꓓꓵ ꓕꓱˍ ꓟ꓾ ꓥꓺ ꓟꓬꓱꓽ ꓬꓰˍ ꓟ꓾ ꓠꓲ, ꓜꓳ ꓡꓯ ꓘꓳˍ ꓟ꓾ ꓢꓰꓼ ꓡꓯ ꓘꓳˍ ꓟ꓾ ꓟꓬ ꓦꓯ.ˍ ꓟ꓾ ꓠꓲ, ꓟ ꓦꓶˍ ꓟ꓾ ꓐꓱ ꓡꓯ ꓘꓳˍ ꓟ꓾ ꓬꓲ ꓗꓪ ꓗꓪ ꓡꓰˍ ꓟ꓾ ꓬꓲ ꓧ, ꓧ, ꓙꓰˍ ꓟ꓿
ꓟꓬ ꓠꓯˍ ꓟ꓾ ꓙꓲꓻ ꓒꓶ ꓬꓲˍ ꓟ꓾ ꓡꓷ ꓖꓪ ꓡꓶˍ ꓟ ꓐꓰ꓾ ꓕꓱ ꓡꓱ ꓫꓵꓽ ꓥ ꓡꓳ꓿ ꓕꓱ ꓟ ꓠꓬ ꓥꓪ ꓠꓴ ꓪ ꓔꓯ ꓧꓶ. ꓕꓯ ꓢꓲꓽ ꓢꓲꓽˍ ꓡꓰ ꓐꓯ ꓖꓶˍ ꓟ ꓡꓰ ꓐꓰ꓾ ꓮ ꓟꓶˍ ꓟꓲ ꓠꓴ ꓪ ꓔꓯ ꓢꓲꓽ ꓢꓲꓽ ꓡꓰ ꓐꓯ ꓖꓶ ꓢꓰˍ ꓡꓳ꓿ ꓕꓱ ꓡꓱ ꓫꓵꓽ ꓬꓰ ꓢꓴ ꓠꓬ ꓪꓴ-ꓢ ꓗꓴꓷ ꓟꓽ ꓟꓶ꓿
ꓖꓳ ꓡꓱ ꓥˍ ꓟꓲ ꓢꓲ‐ꓫꓬ‐ꓟ‐ꓦ ꓓꓱꓼˍ ꓟ ꓢꓶ, ꓢꓶꓽ ꓠꓬ꓾ ꓠꓵ ꓠꓲ,꓾ ꓗ ꓛꓲ ꓠꓲ,꓾ ꓢꓲ ꓡꓲ ꓟ꓾ ꓠꓲ ꓟ ꓫꓵꓺ ꓟ꓾ ꓙ ꓗꓳˍ ꓟ꓾ ꓙꓲˍ ꓟ꓾ ꓦ ꓡꓱ ꓐꓳˍ ꓟ꓿
ꓠꓴꓽ ꓠꓲ,꓾ ꓚꓲ ꓛꓬ ꓔꓯ ꓙꓵ ꓘꓴˍ ꓟ ꓥ ꓡꓳ꓿ ꓕꓱ ꓡꓱ ꓫꓵꓽ ꓔꓯ ꓗꓽ ꓔ ꓟ ꓙꓵꓽ ꓗ ꓟꓽ ꓙꓳ꓿
ꓖꓳ ꓡꓱ ꓢꓲ꓾ ꓙꓲ-ꓢꓴ ꓬꓰ-ꓢꓴ ꓔꓯˍ ꓟ ꓡ ꓞꓳ ꓠꓬ ꓧꓪꓽ ꓠꓲ, ꓡꓶ ꓐꓰ ꓬꓲ ꓦꓯ. ꓠꓲ, ꓙꓵˍ ꓟ ꓐꓰ꓾ ꓬꓲ ꓠꓲ, ꓦꓯ. ꓟ ꓔꓯ ꓡꓯ ꓐꓳ ꓔꓶ ꓓꓴ ꓗꓪ ꓕꓯ ꓔꓶ ꓗꓷꓳ꓿
ꓣꓳ ꓠꓬ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓢꓯ. ꓔꓬ ꓐꓭ ꓠꓬ ꓢꓲ‐ꓫꓬ‐ꓟ‐ꓦ ꓗꓪ ꓐꓰˍ ꓟꓲ ꓫꓱꓽ ꓡꓯ꓿
ꓣꓳ ꓠꓬ ꓕꓲ ꓣꓳ ꓛꓳ ꓕꓲ ꓣꓳ ꓮ ꓟ ꓧꓪ. ꓟꓽ ꓧꓪ. ꓬꓰ ꓢꓲ ꓕꓲ ꓣꓳ ꓛꓳ ꓕꓲ ꓣꓳ ꓟꓬ ꓦꓯ. ꓡꓯ ꓘꓳ ꓢꓲ ꓠꓬꓲ꓾ ꓚꓲ ꓛꓬ ꓟꓬꓱ ꓓꓳꓽ ꓕꓽ ꓧꓪ꓿