Lisu Christian Hymnal
Hymn 34 ꓛꓵ ꓡꓰ ꓟꓽ ꓓ ꓟ ꓐꓰ ꓧꓳꓽ ꓬꓰ ꓟꓽ ꓓ ꓟ ꓡꓯꓼ ꓪ Lyrics
ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓐ ꓐ ꓪꓴ-ꓢ ꓔꓯ ꓓꓳ, ꓟꓴ ꓖꓶ꓿ ꓢꓯꓸ ꓔꓬˍ ꓟ ꓥꓳ ꓡꓳ. ꓓꓴ ꓣꓳ ꓙꓳ ꓠ ꓟ ꓬꓲ ꓠꓬ ꓬꓲ ꓫꓱꓸ ꓤ ꓟ ꓬꓲ ꓓꓽ ꓟ ꓔꓯ ꓛꓳ ꓢꓲ ꓬꓰ-ꓢꓴ ꓙꓲ-ꓢꓴ ꓫꓵˍ ꓗꓪ ꓐꓰ ꓢꓯ ꓬꓲꓼ ꓡ ꓟ ꓡꓰ ꓣꓳ ꓔꓯ ꓫꓬ ꓦꓵ ꓗꓷꓳ꓿
ꓕꓱ ꓟ ꓠꓬ ꓟꓴ ꓗꓪ ꓕꓯꓽ ꓢꓲ ꓗꓪ ꓠꓴ ꓪ ꓐꓱ ꓶ ꓫꓺ ꓗꓶꓺ ꓔ ꓟ꓾ ꓛꓵꓽ ꓡꓰ ꓟꓽ ꓓ ꓟ ꓐꓰ ꓟꓽ ꓫꓬ ꓟ ꓠꓷꓼ ꓡꓰ ꓟꓽ ꓓ ꓟ ꓐꓰ ꓧꓳꓽ ꓬꓰ ꓟꓽ ꓓ ꓟ ꓡꓯꓼ ꓪ ꓟꓶ ꓠ ꓟ ꓥ ꓡꓳ꓿
ꓠꓴ ꓪ ꓠꓬ꓾ ꓟꓲ ꓠꓯ ꓡꓳ, ꓬꓰˍ ꓕꓯ ꓟꓳ. ꓖꓶ ꓠ ꓟ ꓙ ꓖꓶ ꓔˍ ꓟ ꓢꓯꓼ ꓟꓬ ꓝ ꓟ ꓣꓱ ꓛꓰ ꓟꓽ ꓟꓶ ꓕ ꓑꓳ꓾ ꓙꓵꓻ ꓠꓲ, ꓗꓪ ꓐꓰ ꓪꓴ-ꓢ ꓪ ꓠꓬꓲˍ ꓟ ꓡꓰ ꓔ ꓙˍ ꓟ ꓟꓶ ꓢꓴ ꓥ ꓡꓳ꓿
ꓕꓱ ꓟ ꓗꓪ ꓐꓰ ꓠꓴ ꓪ ꓠꓬ ꓮ ꓘꓶ. ꓗ ꓛꓲˍ ꓡꓳ꓿ ꓖꓳ ꓡꓱ ꓥˍ ꓟꓲ ꓟꓽ ꓗꓷ ꓡꓰ ꓟꓽ ꓓ ꓕꓯ ꓠꓽ꓾ ꓮ ꓟꓶ ꓠꓬ꓾ ꓤ, ꓠꓬꓲ ꓟ ꓬꓲ ꓫꓵ ꓬꓲ ꓙꓰꓽ ꓗꓪ ꓕꓲ ꓑ ꓤ ꓙ ꓫˍ ꓡꓳ꓿
ꓠꓴ ꓪ ꓙꓵꓻ ꓠꓲ, ꓔꓯ ꓤ, ꓠꓬꓲˍ ꓟ ꓠꓬ꓾ ꓮ. ꓔꓳ. ꓡꓰ ꓤ, ꓠꓬꓲˍ ꓥ ꓟꓲ꓾ ꓐꓬ ꓡꓰ ꓓˍ ꓟ ꓫꓵꓺ ꓢꓶ. ꓟꓽ ꓞꓲ ꓒꓵꓽˍ ꓟ ꓥ ꓠꓬꓲ꓾ ꓬꓰ-ꓢꓴ ꓙꓲ-ꓢꓴ ꓟꓳꓸ ꓖꓶ ꓡˍ ꓕꓯ꓾ ꓫꓱ ꓖꓶ ꓓꓴˍ ꓐꓰ ꓐꓬꓱꓼ ꓡꓱꓼ ꓡꓱꓼ ꓟˍ ꓐꓰ ꓟꓬꓱ ꓓꓳꓽ ꓒꓬꓱꓼ ꓡ ꓠˍ ꓟ ꓥ ꓡꓳ꓿
ꓠꓴ ꓪ ꓠꓬ ꓬꓲ ꓔꓯ ꓟꓽ ꓟꓳ ꓠꓬꓲˍ ꓟꓲ ꓬꓲ ꓔꓯ ꓠꓲ, ꓠꓵˍ ꓡꓳ꓿ ꓮ ꓟꓶ ꓬꓲ ꓔꓯ ꓟꓽ ꓟꓳ ꓥˍ ꓟꓲ ꓙꓵꓻˍ ꓟ ꓗꓪ ꓐꓰ ꓮ ꓘꓶ. ꓗ, ꓛꓲ ꓢꓲ꓾ ꓠꓴ ꓪ ꓗ, ꓛꓲˍ ꓟ ꓐꓯ ꓖꓴ ꓟꓽ ꓓ ꓢꓲ ꓠꓬꓲ ꓐꓬꓱꓼ ꓡꓱꓼ ꓡꓱꓼ ꓐꓰ ꓗˍ ꓡꓳ꓿
ꓙꓵꓻ ꓡꓳ, ꓬꓰˍ ꓟ ꓬꓲ ꓑꓶ ꓠꓴ ꓪ ꓟꓶˍ ꓥꓳ꓿ ꓕꓱ ꓟ ꓠꓬ ꓠꓴ ꓪ ꓶ ꓟꓬ ꓔꓯ ꓚꓬꓴ ꓟꓶ ꓟ ꓥ ꓡꓳ꓿
ꓮ ꓡꓲꓳ ꓐꓯ ꓠꓬ ꓠꓴ ꓪ ꓒꓵ ꓒ ꓐꓴ ꓗꓪ ꓐꓰ ꓝ ꓩꓴ ꓡ ꓟ꓾ ꓮꓽ ꓔꓳꓺ ꓔꓳꓺ ꓞꓳꓻ ꓙꓳꓻˍ ꓟ ꓮꓽ ꓙꓵ ꓗꓪ ꓐꓰ ꓠꓴ ꓪ ꓔꓯ ꓫꓴ, ꓓꓳ ꓡˍ ꓟ ꓒꓵꓽ ꓠꓬ ꓐꓬ ꓡꓰ ꓓꓻˍ ꓡꓳ ꓫꓵꓽ ꓒꓴˍ ꓐꓰ ꓫꓵꓺ ꓠꓽ ꓟꓽ ꓥ꓿
ꓙꓲ-ꓢꓴ ꓬꓲ ꓒꓵˍ ꓟ ꓫꓵꓽ ꓥ ꓡꓳ ꓐꓰ꓾ ꓠꓴ ꓪ ꓢꓷ.ˍ ꓡꓳ꓿ ꓬꓲ ꓠꓬ ꓓꓰꓺ ꓖꓴ ꓟꓽ ꓙꓳ ꓟ ꓐꓰ ꓤꓰꓽ ꓞˍ ꓟ ꓟꓽ ꓙꓳ ꓟ ꓮ ꓣꓳ ꓤ ꓡꓰ ꓐꓰ ꓗˍ ꓡꓳ꓿
ꓟꓵꓽ ꓟꓽ ꓔꓶꓺ ꓟꓲꓺ ꓟꓽ ꓔꓶꓺ ꓕꓯˍ ꓡꓰ ꓪꓴ-ꓢ ꓡꓰ ꓬꓲ ꓔꓯ ꓢꓲ ꓚꓰꓹ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓟꓲ ꓠꓯ ꓡꓳꓹ ꓬꓰˍ ꓟ ꓦꓬ ꓠꓬꓲ ꓗꓪ ꓠꓬ꓾ ꓠꓴ ꓪ ꓐꓱ ꓶ ꓟꓳꓸ ꓖꓶ ꓡꓳ꓿
ꓠꓴ ꓪ ꓠꓬ ꓬꓲ ꓗꓪ ꓐꓰ ꓪꓴ-ꓢ ꓔꓯ ꓙꓵꓻ ꓢꓴ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓬꓲ ꓔꓯ ꓫꓵꓻ ꓗꓪ ꓐꓰ ꓢꓯ ꓬꓲꓼ ꓡ ꓝꓲ ꓢꓲ꓾ ꓬꓲ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓠꓴ ꓪ ꓙꓵꓻ ꓠꓲ ꓐꓰ ꓥꓳ ꓡꓳ. ꓓꓴ ꓠꓬ꓾ ꓪꓴ-ꓢ ꓠꓯꓸꓼ ꓗꓪ ꓥ ꓡꓳ꓿
ꓠꓴ ꓪ ꓠꓬ ꓔꓱ, ꓚꓵˍ ꓟ ꓔꓯ ꓠꓺ ꓡꓳ.ˍ ꓟ ꓗꓪ ꓐꓰ ꓠꓴ ꓪ ꓶꓻ ꓟꓬ ꓔꓯ ꓢꓲ ꓫꓬ ꓡꓰ ꓝꓲ ꓠꓬꓲ꓾ ꓬꓲ ꓤ ꓠꓬꓲ ꓤ ꓐꓴ ꓔꓯ ꓠꓲ, ꓠꓵˍ ꓟ ꓗꓪ ꓠꓲ, ꓟ ꓠꓬꓲꓽ ꓔꓱ, ꓟꓽ ꓣꓱ ꓣꓱ ꓠꓴ ꓪ ꓠꓬ ꓠꓲ ꓟ ꓠꓯꓸꓼ ꓗꓪ ꓐꓰ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓡꓱ ꓡꓱ ꓐꓰ ꓠꓲ, ꓠꓵ ꓡꓯ ꓘꓳ ꓠꓯ ꓡꓳ꓿
ꓮ ꓡꓲꓳ ꓐꓯ ꓠꓬ ꓠꓴ ꓪ ꓔꓯ ꓫꓬ ꓦꓵ ꓗꓷ ꓟ ꓠꓬ ꓮ ꓕꓯˍ ꓟꓲ ꓢꓯ ꓔꓬ ꓟ ꓐꓰ ꓙꓳ ꓞˍ ꓟ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓥ ꓡꓳ꓿ ꓛꓵꓽ ꓡꓰ ꓓˍ ꓟ ꓬꓲ ꓫꓵ. ꓗꓪ ꓐꓰ ꓟꓽ ꓥ ꓥ ꓛꓵꓽ ꓡꓰ ꓟꓽ ꓓ ꓟ ꓬꓲ ꓫꓵꓸ ꓗꓪ ꓐꓰ ꓥ ꓡꓳ꓿
ꓮ ꓡꓲꓳ ꓐꓯ ꓠꓬ꓾ ꓫꓵꓽ ꓙꓳ ꓧꓪꓽ ꓙꓳˍ ꓟ ꓥ ꓕ ꓑꓳ ꓮ ꓙꓵ ꓟꓳꓼˍ ꓡꓰ ꓐꓰ ꓗ, ꓢꓲ꓾ ꓬꓲ ꓟꓬꓱ ꓓꓳ ꓮ ꓙꓵ ꓠꓬ ꓟꓳꓼ ꓗꓪ ꓟ ꓬꓲ ꓪꓰꓺˍ ꓡꓰ ꓐꓰ ꓗˍ ꓡꓳ꓿ ꓟꓳꓼ ꓠꓬ ꓙꓴ ꓡꓰˍ ꓡꓳ꓿ ꓬꓲ ꓪꓰ ꓠꓬ ꓧꓳꓽ ꓡꓰˍ ꓡꓳ꓿
ꓢꓲ ꓒ ꓐꓯ ꓘꓶ ꓠꓽ ꓕꓲ ꓞꓲꓼ ꓕꓲ ꓑ ꓟꓽ ꓡꓳ, ꓬꓰ꓿ ꓐꓯ ꓘꓶ ꓕꓱ ꓟ ꓠꓬ꓾ ꓠꓴ ꓪ ꓔꓯ ꓚ ꓟ. ꓖꓶˍ ꓟ ꓶꓼ ꓥꓳꓽ ꓫꓱ, ꓥꓳꓽ ꓥ ꓡꓳ꓿