Lisu Christian Hymnal
Hymn 32 ꓪꓴ-ꓢ ꓠꓲ ꓒꓴ ꓟ ꓔꓲ ꓓꓴ Lyrics
ꓖꓳ ꓡꓱ ꓠꓬꓲ ꓬꓲ ꓤ ꓠꓬꓲ ꓤ ꓐꓴꓳ꓾ ꓠꓴ ꓪ ꓖꓳ ꓓꓱ ꓠꓬ ꓢꓯꓸˍ ꓟ ꓐꓰ ꓢꓲ ꓫꓬ ꓟˍ ꓐꓰ ꓪꓴ-ꓢ ꓠꓲ, ꓒꓴˍ ꓟ ꓔꓲ ꓖꓶ ꓓꓴ ꓬꓰ ꓢꓲ ꓔꓲ ꓖꓶ ꓠˍ ꓟ ꓥꓪ ꓠꓬ ꓪꓴ-ꓢ ꓫꓱ. ꓤ ꓟ ꓗꓪ ꓐꓰ ꓠꓴ ꓪ ꓔꓯ ꓘꓶ. ꓖꓶˍ ꓡꓳ꓿ ꓠꓴ ꓪ ꓖꓳ ꓡꓱ ꓣꓱꓽ ꓙ ꓙꓲꓽ ꓙꓳˍ ꓡꓳ꓿
ꓖꓳ ꓡꓱ ꓢꓲ ꓟꓲ ꓠꓯ ꓕꓱ ꓟ ꓒꓬꓱꓽ ꓕꓽ ꓶꓻ ꓝꓲ꓿ ꓠꓴ ꓪ ꓠꓬ ꓪꓴ-ꓢ ꓬꓲ ꓙꓲˍ ꓟ ꓐꓰ ꓠꓲ, ꓒꓴˍ ꓟ ꓐꓰ ꓙꓲ ꓓꓰˍ ꓟ ꓠꓲ, ꓡꓶ ꓮ ꓡꓲ ꓥˍ ꓟ ꓤ, ꓠꓬꓲ ꓠ ꓟ ꓠꓴ ꓪ ꓕꓲ ꓙ ꓠꓲ ꓡꓱꓸꓼ ꓬꓲ ꓫꓵꓼ ꓒꓬꓱꓼ ꓡˍ ꓟ ꓗꓪ ꓐꓰ ꓑꓶ. ꓡꓰ ꓠ ꓗ ꓡꓳ꓿
ꓮ ꓡꓲꓳ ꓐꓯ ꓠꓬ ꓥꓪ ꓔꓯ ꓖꓶ ꓡ ꓟ ꓣꓱ ꓛꓰ ꓗꓪ ꓐꓰ ꓠꓴ ꓪ ꓮ ꓙꓵ ꓢꓴ ꓔꓯ ꓐꓯˍ ꓡꓳ꓿ ꓒꓵꓽ ꓠꓯˍ ꓟ ꓕꓯ ꓢꓲ ꓚꓲ ꓛꓬ ꓔꓯ ꓕꓽ ꓒꓵ꓿ ꓞꓳ ꓢꓲꓽ ꓬꓰ ꓢꓲ꓾ ꓪꓴ-ꓢ ꓡꓰ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓙꓵꓻ ꓠꓲ ꓮ ꓡꓲ ꓙꓳ ꓖꓶ ꓡ ꓠꓬ ꓮ ꓡꓲ ꓚꓲ ꓛꓬ ꓔꓯ ꓒꓵ꓿
ꓮ ꓡꓲꓳ ꓐꓯ ꓠꓬ ꓣꓳ ꓖꓳ ꓓꓱ ꓕꓲ ꓟ ꓠꓬ ꓡꓯꓼ ꓗ. ꓮ ꓟꓬ ꓙꓳˍ ꓟꓲ ꓡꓯꓼ ꓗ. ꓮ ꓙꓵ ꓠꓬ ꓣꓱꓽ ꓬꓯꓼ ꓖꓴ ꓕꓲꓽ ꓡꓰꓸꓼ ꓟꓽ ꓥ꓿
ꓖꓳ ꓟˍ ꓡꓰ ꓐꓰ ꓣꓳ ꓮ ꓟꓬ ꓣꓳꓽ ꓥ ꓟꓲ ꓙꓲ-ꓢꓴ ꓠꓯꓸꓼ ꓗꓪ ꓕꓲ ꓖꓳ ꓓꓱˍ ꓡꓰꓽ ꓥ ꓢꓲ꓾ ꓕꓲ ꓣꓳ ꓛꓳ ꓕꓲ ꓣꓳ ꓜꓯ ꓡꓯ ꓘꓳ ꓞˍ ꓟ ꓡꓯꓼ ꓗ ꓥ ꓡꓳ꓿
ꓖꓳ ꓡꓱ ꓢꓲ ꓣꓳ ꓔꓯ ꓖꓶ ꓡˍ ꓟ ꓣꓱ ꓛꓰ ꓮ ꓡꓲ ꓥ ꓠꓬ ꓟꓽ ꓫꓱ. ꓡꓯꓼ ꓘꓳ ꓟ ꓡꓯ ꓫꓴˍ ꓟꓲ ꓬꓲ ꓖꓳ ꓡꓱ ꓙꓳˍ ꓠꓬꓲ꓾ ꓥ ꓠꓬ ꓟꓷ ꓠꓷ ꓝ ꓟ ꓥ ꓕꓯ ꓠ꓾ ꓣꓳ ꓔꓯ ꓙꓵꓻ ꓠꓲ ꓮ ꓡꓲ ꓐꓱ ꓖꓶ ꓡ ꓠꓬ ꓟꓷ ꓠꓷ ꓮ ꓡꓲ ꓝ ꓠꓯˍ ꓡꓳ꓿
ꓥ ꓠꓬ ꓣꓱ ꓙˍ ꓟ ꓟꓬꓱꓽ ꓥ ꓕꓯ ꓠꓽ꓾ ꓣꓱ ꓙ ꓠꓯˍ ꓡꓳ꓿ ꓥ ꓠꓬ ꓟꓸ ꓢꓴ ꓥ ꓕꓯ ꓠ꓾ ꓟ. ꓠꓯˍ ꓡꓳ꓿
ꓥ ꓠꓬ ꓘꓶꓸ ꓢꓴ ꓥ ꓕꓯ ꓠꓽ꓾ ꓘꓶꓸ ꓠꓯˍ ꓡꓳ꓿ ꓓꓰꓽ ꓖꓶ ꓢꓴ ꓠꓬ ꓠꓲ ꓒꓴ ꓒꓴˍ ꓡꓰꓽ ꓖꓶ ꓠꓯˍ ꓡꓳ꓿ ꓙꓵꓽ ꓢꓴ ꓠꓬ ꓕꓰ ꓕꓰ ꓡꓰꓽ ꓙꓵꓽ ꓠꓯˍ ꓡꓳ꓿ ꓫꓱꓸ ꓤ ꓢꓴ ꓬꓲ ꓠꓬ ꓠꓲ, ꓡꓳꓻ ꓡꓳˍ ꓡꓰꓽ ꓫꓱꓸ ꓤ ꓠꓯˍ ꓡꓳ꓿
ꓠꓲ, ꓠꓵ ꓟ ꓗꓪ ꓠꓲ, ꓟ ꓠꓬꓲꓽ ꓔꓱꓹ ꓟ ꓕꓽ ꓬꓰ꓿ ꓥꓶ. ꓟ ꓔꓯ ꓠꓲꓹ ꓜꓳ꓿ ꓙꓲˍ ꓟ ꓔꓯ ꓠꓷ ꓡꓰ꓿
ꓬꓲ ꓤ ꓠꓬꓲ ꓤ ꓔꓯ ꓠꓲ ꓠꓵˍ ꓟ ꓗꓪ ꓠꓴꓽˍ ꓟ ꓠꓲ, ꓟ ꓡꓰ ꓙ ꓗꓳ ꓡꓯ ꓘꓳ꓿ ꓟꓬꓱ ꓓꓳ ꓗꓪ ꓕꓲ ꓣꓳ ꓛꓳ ꓕꓲ ꓣꓳ ꓞꓳ ꓒꓵꓽ ꓡꓯ ꓘꓳ꓿
ꓞꓳ ꓕꓰ ꓬꓰˍ ꓟ ꓗꓪ ꓠꓲ, ꓟ ꓕꓽ ꓙꓬ ꓠꓲ, ꓟ ꓡꓱ ꓢꓲ ꓢꓲ-ꓒ ꓔꓯ ꓣꓱꓽ ꓙ꓿
ꓥꓳ ꓡꓳ.ˍ ꓟ ꓗꓪ ꓗ ꓛꓲ ꓢꓲ꓾ ꓫ ꓙꓵˍ ꓟ ꓗꓪ ꓜꓲꓽ ꓘꓴ ꓢꓲ ꓠꓬꓲ꓾ ꓪ ꓘꓴˍ ꓟ ꓗꓪ ꓮ ꓕꓯ ꓟꓲ ꓢꓯꓼ ꓕꓵ꓿
ꓢꓲ ꓫꓬ ꓢꓴ ꓐꓴ ꓣꓱ ꓛˍ ꓟ ꓗꓪ ꓬꓰ ꓙ꓿ ꓪꓰ ꓤ ꓔꓯ ꓘꓳ ꓣꓴ ꓠꓲ, ꓒꓴ꓿
ꓠꓴ ꓪ ꓔꓯ ꓗ. ꓧꓪ ꓢꓴ ꓔꓯ ꓶꓼ ꓥꓳ ꓙꓱꓽ ꓖꓶ꓿ ꓶꓼ ꓥꓳ ꓡꓰ ꓙꓱꓽ ꓖꓶ ꓢꓲ ꓬꓲ ꓔꓯ ꓕꓽ ꓙꓱ꓿