Lisu Christian Hymnal

Hymn 29 ꓙꓵ ꓢꓴ ꓟꓶˍ ꓟ ꓶ ꓤ ꓫꓱ ꓤ Lyrics

ꓖꓳ ꓡꓱ ꓠꓬꓲ ꓣꓳ ꓠꓬ ꓙꓵꓻ ꓠꓲ, ꓗꓪ ꓐꓰ ꓙꓲ ꓫꓬ ꓟ ꓚꓬꓹ ꓟꓶ ꓠꓬꓲ꓾ ꓣꓳ ꓢꓲ ꓒ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓪꓴ-ꓢ ꓐꓰ ꓧꓳꓹ ꓡꓰˍ ꓡꓳ꓿
ꓝꓮꓲ ꓠꓬ ꓙꓵꓻ ꓠꓲ, ꓑꓶꓸ ꓓꓴ ꓣꓳ ꓮ ꓟꓶ ꓦꓰꓼ ꓔꓬ ꓟ ꓣꓱ ꓛꓰ ꓕꓱ ꓟ ꓗꓪ ꓓꓵ ꓡꓰˍ ꓟ ꓠꓬ ꓬꓰ-ꓢꓴ ꓗꓪ ꓐꓰ ꓥ ꓢꓲ꓾ ꓪꓴ-ꓢ ꓬꓲ ꓐꓬꓱ ꓡꓱ ꓡꓱ ꓟ ꓔꓯ ꓥꓳ ꓡꓳ. ꓔꓬ ꓠꓬꓲ ꓗ ꓛꓲ ꓡꓳ꓿
ꓕꓱ ꓟ ꓡꓰ ꓟꓽ ꓞꓲ꓾ ꓣꓳ ꓫ ꓙꓵˍ ꓟ ꓗꓪˍ ꓟꓲ ꓣꓳ ꓗ ꓛꓲ ꓡꓳ꓿ ꓮ ꓡꓲꓳ ꓐꓯ ꓠꓬ ꓫ ꓙꓵˍ ꓟ ꓗꓪ ꓐꓰ ꓜꓲꓽ ꓘꓴ ꓠꓲ, ꓓꓱꓼ ꓓꓳ ꓡ ꓟ ꓣꓳ ꓢꓷˍ ꓡꓳ꓿
ꓜꓲꓽ ꓘꓴ ꓠꓲ, ꓠꓬ ꓤ, ꓟꓶ ꓗꓷˍ ꓟ ꓓꓱꓼ ꓓꓳ ꓡˍ ꓡꓳ꓿ ꓤ, ꓟꓶ ꓗꓷˍ ꓟ ꓠꓬ ꓥꓳ ꓡꓳ. ꓓꓴ ꓓꓱꓼ ꓓꓳ ꓡˍ ꓡꓳ꓿
ꓥꓳ ꓡꓳ. ꓓꓴ ꓠꓬ ꓟꓽ ꓫ ꓔꓳ ꓡꓰ ꓝꓲ꓾ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓵ ꓠꓲ, ꓠꓬ ꓣꓳ ꓔꓯ ꓖꓶ ꓡ ꓟ ꓢꓲ-ꓫꓬ- ꓟ-ꓦ ꓗꓪ ꓐꓰ ꓣꓳ ꓠꓲ, ꓟ ꓠꓯꓸꓼ ꓗꓪ ꓧꓳ. ꓧꓳꓽ ꓖꓶ ꓡꓻꓳ ꓐꓰ꓾ ꓣꓳ ꓢꓷˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓣꓳ ꓢꓯꓼ ꓐꓽ ꓢꓰꓽ ꓕꓯ ꓙꓲ-ꓢꓴ ꓠꓬ ꓝꓰ, ꓔ ꓟ ꓝꓲ. ꓗꓪ ꓠꓲ, ꓟꓽ ꓒꓵ ꓠꓲ, ꓟꓽ ꓡꓱ ꓢꓴ ꓐꓱ ꓶ ꓫꓵꓻ ꓡꓳ꓿
ꓮ ꓡꓲꓳ ꓐꓯ ꓠꓬ ꓙꓲ ꓫꓬ ꓢꓴ ꓐꓱ ꓶ ꓫꓵꓻ ꓢꓴ ꓮ ꓡ ꓟꓽ ꓙꓳ꓿ ꓮ ꓧꓪ, ꓙꓲˍ ꓟ ꓡ ꓞꓳ ꓐꓱ ꓶ ꓫꓵꓻ ꓙ ꓑꓶ. ꓢꓴ ꓕꓲ ꓣꓳ ꓣꓳ ꓙꓳˍ ꓟꓽ ꓢꓷ꓿
ꓖꓳ ꓡꓱ ꓥ ꓟꓲ ꓣꓳ ꓝꓴꓲ ꓙꓳ ꓢꓴ ꓬꓰ ꓔꓬ ꓕꓯ ꓡꓰ ꓙꓲ-ꓢꓴ ꓣꓳ ꓐꓱ ꓶ ꓫꓵꓻ ꓙ ꓟ ꓗꓪ ꓐꓰ ꓪꓴ-ꓢ ꓣꓳ ꓔꓯ ꓠꓲ, ꓠꓵˍ ꓟ ꓟꓳꓸ ꓖꓶ ꓓꓳ ꓡ ꓡꓳ꓿
ꓮ ꓟꓶ ꓣꓳ ꓠꓬ ꓬꓲ ꓫꓵꓽ ꓗꓪ ꓐꓰ ꓙꓲ ꓫꓬ ꓟ ꓚꓬꓹ ꓟꓶ ꓠꓬꓲ ꓬꓲ ꓑꓶ. ꓓꓴ ꓪꓴ-ꓢ ꓦꓶ ꓠꓲ, ꓗꓪ ꓐꓰ ꓡꓲ, ꓗꓷ ꓠ ꓟ ꓣꓳ ꓪ ꓜꓲ ꓚꓬꓴ ꓟꓶ ꓥꓳ꓿
ꓮ ꓡꓲꓳ ꓐꓯ ꓠꓬ ꓣꓳ ꓛꓴ ꓙꓳ ꓢꓴ ꓬꓰ ꓔꓬ ꓕꓯ ꓬꓲ ꓮ ꓐꓲ ꓫꓵꓻˍ ꓟ ꓗꓪ ꓐꓰ ꓪꓴ-ꓢ ꓐꓰ ꓣꓳ ꓧꓳ, ꓡꓰˍ ꓟ ꓟꓶˍ ꓕꓯ ꓠꓽ ꓮ ꓟꓶ ꓧꓳ, ꓡꓰ ꓠꓬꓲ ꓬꓲ ꓢꓯ. ꓔꓬ ꓟ ꓗꓪ ꓐꓰ ꓣꓳ ꓪ ꓜꓲ ꓚꓬꓴ ꓟꓶ ꓥꓳ꓿
ꓕꓱ ꓟ ꓡꓰ ꓟꓽ ꓞꓲ ꓣꓳ ꓠꓬ ꓣꓳ ꓢꓲ-ꓒ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ ꓪꓴ-ꓢ ꓠꓯꓸꓼ ꓗꓪˍ ꓟꓲ ꓗ ꓛꓲˍ ꓡꓳ꓿ ꓬꓲ ꓔꓯˍ ꓐꓰ ꓮ ꓟꓶ ꓣꓳ ꓧꓳ, ꓡꓰˍ ꓟ ꓟꓶ ꓗꓷꓳ꓿