Lisu Christian Hymnal
Hymn 26 ꓠꓬꓲ ꓟꓳ ꓓꓴ ꓗꓪ ꓫꓱꓽ ꓠꓯ ꓟ Lyrics
ꓬꓲ ꓚꓰ ꓬꓲ ꓪꓴ. ꓗꓪ ꓐꓰ ꓙꓳˍ ꓟ꓾ ꓥꓪ ꓠꓴ ꓑ ꓙ ꓗꓷˍ ꓟ꓾ ꓥꓪ ꓠꓴ ꓡꓳꓸ ꓠꓬꓲ ꓢꓲ꓾ ꓥꓪ ꓠꓴ ꓟꓬ ꓢꓶ ꓡꓰ ꓟꓳ ꓠꓬꓲˍ ꓟ꓾ ꓥꓪ ꓠꓴ ꓡꓯ ꓒꓯ, ꓡꓰ ꓫꓱꓹ ꓠꓬꓲˍ ꓟ ꓢꓯꓼ ꓟꓬ ꓐꓯ ꓘꓶꓽ ꓔꓯ ꓐꓯˍ ꓠꓬ꓾
ꓢꓯꓼ ꓟꓬ ꓕꓱ ꓟ ꓟꓳꓸ ꓖꓶ ꓡꓻꓳ꓿ ꓐꓹ ꓐˍ ꓐꓰ ꓕꓲ ꓪꓺꓼ ꓔꓬ ꓟˍ ꓐꓰ ꓥꓪ ꓠꓴ ꓔꓯ ꓟꓳꓸ ꓖꓶ ꓡˍ ꓟ꓾ ꓕꓲ ꓞꓲ ꓕꓲ ꓑ ꓟ ꓢꓯꓼ ꓟꓬ ꓕꓱ ꓟ ꓥꓪ ꓠꓴ ꓟꓳꓻ ꓗꓷ ꓢꓲ꓾ ꓢꓷ ꓙ ꓟꓳ ꓙ ꓢꓲ ꓠꓬꓲ꓾ ꓠꓴ ꓪ ꓔꓯˍ ꓟꓲ ꓐꓯ ꓟꓸ ꓖꓶˍ ꓡꓳ꓿
ꓠꓴ ꓪˍ ꓐꓰ ꓥꓪ ꓠꓴ ꓙ ꓡꓯ ꓘꓳ ꓠ ꓟ꓾ ꓥꓪ ꓠꓴ ꓟꓳ ꓠꓬꓲˍ ꓟˍ ꓐꓰ ꓑ ꓙ ꓠꓬꓲˍ ꓟ ꓠꓴ ꓪ ꓔꓯˍ ꓟꓲ ꓐꓯ ꓟꓸ ꓖꓶˍ ꓡꓳ꓿ ꓥꓪ ꓠꓴ ꓙ ꓡꓯ ꓘꓳˍ ꓟ ꓠꓬ꓾ ꓐ ꓐ ꓐꓰ ꓬꓲ ꓮ ꓐꓲ ꓬꓰ-ꓢꓴ ꓙꓲ-ꓢꓴ ꓔꓯ ꓙ ꓡꓯ ꓘꓳˍ ꓟ ꓥ ꓡꓳ꓿
ꓥꓪ ꓠꓴ ꓕꓱ ꓟꓬ ꓫꓵꓽ ꓐꓳꓺ ꓖꓶ ꓩꓴ ꓡˍ ꓟ ꓠꓬ꓾ ꓠꓴ ꓪ ꓗ ꓛꓲ ꓓꓴ ꓐꓲꓺ ꓡꓰ ꓝꓲ ꓠ ꓟ ꓥ ꓡꓳ꓿
ꓪꓴ-ꓢ ꓠꓬ ꓠꓬꓲ ꓟꓳ ꓓꓴ ꓥ ꓢꓲ꓾ ꓬꓲ ꓠꓯꓸꓼ ꓗꓪ ꓠꓯ ꓞꓲ,ˍ ꓟ ꓮ ꓔꓲ.ˍ ꓟꓲ ꓟꓽ ꓙꓳ꓾ ꓕꓱ ꓟ ꓠꓬ ꓬꓲ ꓔꓯˍ ꓐꓰ ꓥꓪ ꓠꓴ ꓑ ꓙ ꓗꓷ ꓢꓲ꓾ ꓠꓴ ꓪ ꓔꓯ ꓐꓯ ꓖꓶˍ ꓟ ꓓꓳꓽ ꓥ ꓡꓳ꓿
ꓣꓳ ꓠꓬ ꓪꓴ-ꓢˍ ꓐꓰ ꓙ ꓡꓯ ꓘꓳˍ ꓡꓳ꓾ ꓐꓰ ꓐꓯ ꓢꓲ꓾ ꓠꓯꓺ ꓞꓲ, ꓟ ꓗꓪ ꓫꓱꓽˍ ꓕꓯ ꓠ꓾ ꓣꓳ ꓗꓶꓸ ꓢꓲ ꓔꓱ ꓚꓵˍ ꓟ ꓔꓯ ꓟꓽ ꓛꓳ ꓢꓲ ꓞꓳ ꓙꓳꓻ ꓔꓬˍ ꓡꓳ꓿
ꓖꓳ ꓡꓱ ꓥ ꓟꓲ ꓪꓴ-ꓢ ꓠꓬ ꓠꓬꓲ ꓟꓳ ꓓꓴ ꓗꓪ ꓔꓬ ꓟˍ ꓡꓰ ꓐꓰ꓾ ꓠꓬꓲ ꓟꓳ ꓓꓴ ꓗꓪ ꓣꓳ ꓫꓱꓽˍ ꓕꓯ ꓠ꓾ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓙ ꓡꓯ ꓘꓳ ꓡꓰ ꓢꓲ꓾ ꓬꓲ ꓮ ꓐꓲ ꓬꓰ‐ꓢꓴ ꓬꓲ ꓫꓵꓽ ꓡꓰ ꓣꓳ ꓝꓴꓲ ꓮ ꓙꓵ ꓔꓯ ꓞꓲꓽ ꓦ ꓗꓷˍ ꓡꓳ꓿
ꓣꓳ ꓚꓲ ꓛꓬ ꓮ ꓫꓵꓽ ꓝꓴꓲ ꓟꓽ ꓙꓳ꓾ ꓐꓰ꓾ ꓐꓯˍ ꓕꓯ ꓠ꓾ ꓣꓳ ꓚꓲ ꓛꓬ ꓔꓯ ꓗꓶꓸ ꓢꓲ꓾ ꓣꓳ ꓠꓲ, ꓟ ꓠꓯꓸꓼ ꓗꓪ ꓔꓱ, ꓚꓵˍ ꓟ ꓟꓽ ꓓꓯꓹ꓿
ꓣꓳ ꓠꓬ ꓚꓲ ꓛꓬ ꓝꓴꓲ ꓣꓷꓠ ꓕꓯ ꓠ꓾ ꓣꓳ ꓝꓴꓲ ꓖ ꓖꓶ ꓢꓲ꓾ ꓣꓳ ꓟꓽ ꓙꓲ ꓫꓬꓻ ꓟ ꓮ ꓙꓵ ꓔꓯ ꓞꓲꓽ ꓦ ꓗꓷ ꓠ ꓟ꓾ ꓪꓴ-ꓢ ꓠꓬ ꓦ ꓡꓱ ꓐꓳˍ ꓟˍ ꓐꓰ ꓙꓲ ꓫꓬˍ ꓟ ꓥ ꓡꓳ꓿