Lisu Christian Hymnal
Hymn 22 ꓫ ꓙꓵˍ ꓟ ꓜꓲꓽ ꓢꓴ ꓫꓴ ꓢꓲꓺ ꓒ Lyrics
ꓥꓪ ꓠꓴꓽ ꓐꓯ ꓟꓸ ꓖꓶˍ ꓟ ꓓꓳꓽ ꓮ ꓟ ꓙꓵˍ ꓡꓳꓺꓽ꓿ ꓬꓰ-ꓧꓳ-ꓧꓪ ꓡꓯ ꓪꓵꓼ ꓠꓬ ꓮ ꓟ ꓔꓯ ꓟꓳꓸ ꓖꓶ ꓗꓷꓳ ꓪꓺꓽ꓿
ꓬꓲ ꓠꓬ ꓬꓰ-ꓧꓳ-ꓧꓪ ꓟꓲꓽ ꓙꓬ ꓗꓪ ꓡꓯ.ˍ ꓟ ꓡꓲꓸ ꓤˍ ꓡꓰ ꓐꓰ ꓪꓴ: ꓡ ꓟꓴ ꓡˍ ꓡꓳ꓿ ꓟꓲ ꓛꓱꓹ ꓗꓪ ꓐꓰ ꓑꓵꓺ ꓓꓳ ꓡ ꓟ ꓬꓲꓸ ꓟꓵꓼˍ ꓡꓰ ꓐꓰ ꓗˍ ꓡꓳ꓿ ꓬꓲ ꓠꓬ ꓣꓳ ꓬꓲ ꓔꓯ ꓡꓳ. ꓟꓳ ꓠ ꓟ ꓖꓪꓺ ꓜꓳˍ ꓟ ꓒꓬꓱꓽ ꓟꓽ ꓶꓻ꓿ ꓣꓳ ꓬꓲ ꓔꓯ ꓠꓲ, ꓥꓳꓺ ꓠ ꓟ ꓡꓳꓸ ꓐꓲꓻ ꓟ ꓟꓲ ꓟꓽ ꓙꓳ꓿
ꓞꓳ ꓤ ꓡꓰ ꓬꓲ ꓔꓯ ꓟꓳ ꓟꓽ ꓟꓵ ꓢꓲ ꓡꓳꓺ ꓒꓰꓳ꓿ ꓬꓲ ꓠꓬ ꓫꓸ ꓙꓵˍ ꓟ ꓡ ꓞꓳ ꓕꓲ ꓣꓳ ꓥ ꓢꓲ꓾ ꓠꓲ, ꓫ ꓟꓬ ꓫ ꓜꓲꓽ ꓪ ꓢꓴ ꓕꓲ ꓣꓳ ꓥ ꓡꓳ꓿ ꓢꓴ ꓡꓰ ꓬꓲ ꓔꓯ ꓐꓰ ꓒꓬꓱ: ꓚꓵ ꓗꓷˍ ꓟ ꓟꓶ ꓢꓴ ꓕꓲ ꓣꓳˍ ꓡꓰ ꓐꓰ ꓗ ꓢꓲ꓾ ꓬꓲꓸ ꓔꓯ ꓟꓳ ꓟꓽ ꓟꓵ꓿ ꓣꓳꓽˍ ꓟꓲ ꓬꓲ ꓔꓯꓸ ꓟꓽ ꓒꓵꓽ꓿
ꓬꓲ ꓠꓬ ꓚꓵ ꓚꓵ ꓣꓳ ꓫꓸ ꓙꓵ ꓟꓷ ꓙꓵˍ ꓟ ꓟꓯꓻ ꓗꓷꓳ꓿ ꓖꓳ ꓡꓱ ꓥ ꓟꓲ ꓣꓳ ꓠ ꓬꓲ ꓔꓯ ꓪꓴ-ꓢ ꓡꓰ ꓓꓶꓽ ꓗꓷ ꓟ ꓐꓰ ꓔꓲꓸ ꓗꓷˍ ꓟ ꓐꓰ ꓛꓬ ꓒꓵꓽ ꓖꓶ ꓗꓷˍ ꓟ ꓡ ꓞꓳ ꓕꓲ ꓣꓳ ꓚꓬꓹ ꓗꓷꓳ꓿
ꓬꓲ ꓔꓯ ꓠꓽ ꓣꓳ ꓛꓬ ꓖꓴ ꓥꓳꓽ ꓖꓴ ꓑꓶꓸ ꓓꓴ ꓠꓻ ꓓꓴ ꓓꓴ ꓡꓰꓳ꓿ ꓣꓳ ꓟꓽ ꓙꓲ ꓟꓽ ꓜꓳˍ ꓟ ꓑꓶꓸ ꓓꓴ ꓬꓲ ꓔꓯ ꓫꓵ: ꓛꓵꓽ ꓡꓴꓸ ꓡꓰꓳ꓿ ꓬꓲ ꓠꓬ꓾ ꓛꓬꓻ ꓒꓵ ꓟꓯˍ ꓟ ꓗꓪ ꓐꓰ ꓣꓳ ꓢꓲꓺ ꓡꓲˍ ꓟ ꓟꓶˍ ꓡꓳ꓿ ꓬꓲ ꓐꓴꓻ ꓙꓵꓽ ꓓꓴ ꓗꓪ ꓐꓰ ꓣꓳ ꓓꓻ ꓡꓰ ꓟꓶˍ ꓡꓳ꓿
ꓣꓳ ꓮ ꓙꓵꓽ ꓢꓴ ꓠꓬ ꓮ ꓣꓳˍ ꓡꓰ ꓐꓰ ꓫꓱꓽ ꓪꓴꓸ ꓙꓰꓳ꓿ ꓮ ꓟ ꓙ ꓖꓴ ꓗꓪ ꓮ ꓟ ꓧꓶ. ꓙꓰꓳ꓿ ꓬꓰ-ꓧꓳ-ꓧꓪ ꓡꓰ ꓣꓳ ꓮ ꓙꓵꓽ ꓢꓴ ꓟꓽ ꓙꓲ ꓟꓽ ꓜꓳꓽ ꓟ ꓬꓲ ꓕꓯꓼ ꓢꓲ ꓗꓪ ꓚꓰꓹ ꓗꓷꓳ꓿
ꓬꓲ ꓔꓯ ꓠꓬꓲꓸ ꓤꓲꓺ ꓗꓷ ꓥˍ ꓟꓲ꓾ ꓬꓲ ꓠꓬ ꓙ ꓣꓳꓽ ꓢꓲ ꓮ ꓫꓵꓽ ꓟꓽ ꓐꓯ꓿ ꓬꓲ ꓠꓬ ꓢꓰꓼ ꓖꓴ ꓗꓪ ꓢꓲꓻ ꓛꓲ ꓬꓰ ꓟ ꓮ ꓣꓳ ꓤ ꓡꓰ ꓐꓰ꓾ ꓟꓵꓺ ꓞꓶꓽ ꓢꓴ ꓡꓯ ꓒꓯ ꓗꓪ ꓟꓽ ꓟꓶꓻˍ ꓟ ꓮ ꓣꓳ ꓤˍ ꓡꓰ ꓐꓰ ꓬꓲ ꓟꓷ ꓠꓷ ꓟꓽ ꓧ꓿
ꓠꓬꓲꓸ ꓤꓲˍ ꓟ ꓐꓰ ꓐꓯ ꓟꓴ ꓘꓶ ꓗꓷ ꓟ ꓑꓶ ꓓꓴ ꓬꓲꓸ ꓔꓯ ꓣꓴ ꓔꓯꓹ ꓙꓰˍ ꓡꓳ꓿ ꓬꓲ ꓕꓲ ꓤꓶ ꓟ ꓔꓯ ꓐꓯ ꓠ꓾ ꓬꓲ ꓔꓯ ꓔꓲꓸ ꓠꓻ ꓡꓰˍ ꓟ ꓐꓰ ꓞꓳ ꓢꓯꓸ ꓟꓵ ꓗꓪ ꓐꓰ ꓛꓴ ꓛꓰ ꓡꓰ ꓝꓲˍ ꓠꓬ ꓥꓪ ꓑ ꓫꓬ ꓐꓴ ꓛꓬ ꓖꓴ ꓥꓳꓽ ꓖꓴ ꓑꓶꓸ ꓓꓴ ꓥ ꓟ ꓔꓯ ꓮ ꓟ ꓡꓰ ꓓꓵ ꓙ ꓠꓬꓲ ꓗꓷꓳ ꓪꓽ꓿
ꓬꓲ ꓟꓷ ꓠꓷ ꓗꓪ ꓗꓶꓸˍ ꓟ ꓟꓽ ꓙꓳ ꓢꓲ꓾ ꓬꓲ ꓠꓬ ꓜꓲꓽ ꓜꓲꓽ ꓑꓰ, ꓑꓰ, ꓟꓽ ꓬꓰ ꓠꓬꓲ ꓥˍ ꓟꓲ꓾ ꓬꓲ ꓪ ꓠꓬ ꓞꓳ ꓥꓶˍ ꓐꓰ ꓕꓲ ꓪꓺꓼ ꓬꓲ ꓡꓱꓼ ꓜꓴ ꓫꓬꓹ ꓗꓷꓳ꓿ ꓬꓲ ꓫꓵꓻ ꓕꓯ ꓞꓳ ꓐꓳˍ ꓐꓰ ꓕꓲ ꓪꓺꓼ ꓔꓵ. ꓗꓷꓳ꓿
ꓖꓳ ꓡꓱ ꓥˍ ꓟꓲ ꓬꓲ ꓔꓯ ꓫꓵꓽ ꓛꓵꓽ ꓡꓴꓸ ꓡꓰ ꓝꓲˍ ꓟ ꓠꓬ꓾ ꓬꓰ-ꓧꓳ-ꓧꓪ ꓬꓲ ꓠꓲ, ꓡꓶꓽ ꓥ ꓢꓲ꓾ ꓬꓲ ꓔꓯ ꓫꓸ ꓙꓵ ꓡꓰ ꓝꓲˍ ꓡꓳ꓿ ꓬꓰ-ꓧꓳ-ꓧꓪ ꓡꓰ ꓬꓲ ꓔꓯ ꓝꓴꓲ ꓐꓱ ꓶ ꓔꓲ ꓓꓴ ꓬꓰ ꓝꓲ ꓕꓯ꓾ ꓬꓲ ꓠꓬ ꓬꓲ ꓞꓲ ꓤ ꓡꓯ ꓤ ꓔꓯ ꓡꓳ. ꓟꓳ ꓢꓲ꓾ ꓬꓲ ꓦꓬꓼ ꓠꓬꓲ ꓔꓯ ꓟꓶ ꓫꓵ ꓡꓰ ꓝꓲˍ ꓥꓳ꓿ ꓖꓳ ꓡꓱ ꓢꓲ ꓬꓰ-ꓧꓳ-ꓧꓪ ꓠꓲ ꓡꓶ ꓠꓬ ꓬꓲ ꓡꓯ ꓒꓯ ꓗꓪ ꓐꓰ ꓒꓬꓱ ꓡˍ ꓥꓳ꓿
ꓬꓲ ꓶ ꓟꓬ ꓫ ꓙꓵˍ ꓟ ꓗꓪ ꓐꓰ ꓬꓰ ꓓꓳ ꓡ ꓟ ꓔꓯ ꓬꓲ ꓟꓳˍ ꓥꓳ꓿ ꓠꓲꓹˍ ꓟꓲ ꓠꓲ, ꓘꓪ ꓫꓵ ꓡꓰˍ ꓥꓳ꓿ ꓡ ꓞꓳ ꓮ ꓟꓬ, ꓠꓬ ꓥꓪ ꓙꓲ ꓫꓬˍ ꓟ ꓚꓳꓺ ꓑ ꓔꓯ ꓢꓷˍ ꓟ ꓗꓪ ꓐꓰ ꓙꓲ ꓫꓬˍ ꓟ ꓚꓬꓹ ꓟꓶˍ ꓥꓳ꓿ ꓬꓲ ꓠꓬ ꓬꓲ ꓪ ꓟꓽ ꓙꓲ ꓟꓽ ꓜꓳꓽ ꓟ ꓔꓯ ꓟꓯꓻ ꓙ ꓥꓳ꓿
ꓖꓳ ꓡꓱ ꓠꓬꓲ ꓥꓪ ꓬꓲ ꓔꓯ ꓞꓳ ꓪꓴꓽ ꓕꓲ ꓐꓱꓻ ꓐꓱ ꓖꓶˍ ꓥꓳ꓿ ꓬꓲ ꓠꓬ ꓦꓴꓺ ꓔꓯꓹ ꓡˍ ꓟ ꓖꓴꓽ ꓙꓴꓽˍ ꓡꓰ ꓐꓰ ꓢꓯꓼ ꓙꓳ ꓪ ꓠꓬꓲ ꓢꓴ ꓔꓯ ꓐꓱꓻ ꓗꓷˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓡꓰ ꓬꓲ ꓢꓯꓼ ꓟꓬ ꓔꓯ ꓫꓵˍ ꓗꓪ ꓛꓲ ꓧꓳꓸ ꓩꓴ ꓗꓷꓳ꓿ ꓖꓳ ꓡꓱ ꓥˍ ꓟꓲ ꓡ ꓞꓳ ꓮ ꓟꓬ ꓣꓳ ꓟ ꓝꓴꓲ ꓔꓯ ꓬꓲ ꓟꓯ ꓙ ꓢꓲ꓾ ꓛꓬ ꓢꓴ ꓥꓳꓽ ꓢꓴ ꓐꓱ ꓶ ꓶ ꓓꓰ ꓙˍ ꓡꓳ꓿