Lisu Christian Hymnal

Hymn 20 ꓬꓰ-ꓢꓴ ꓠꓬ ꓙꓲꓻˍ ꓟ ꓮ ꓣꓳꓺ ꓡꓳꓸ ꓢꓴ ꓥ ꓡꓳ Lyrics

ꓥꓪ ꓔꓱ ꓔꓱˍ ꓐꓰ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ꓾ ꓗ ꓘꓶ ꓗꓪ ꓐꓰ ꓓꓵ ꓡꓰˍ ꓟ ꓟꓽ ꓥ ꓥ꓾ ꓬꓲ ꓔꓱ ꓬꓲ ꓕꓲ ꓚꓱꓹ ꓗꓪ ꓐꓰ ꓮ ꓣꓳꓺ ꓐꓱ ꓗꓪ ꓚꓬꓹ ꓓꓯ ꓙꓰ ꓢꓴ ꓠꓬ ꓞꓳ ꓘꓴˍ ꓐꓰ ꓒꓬꓹ ꓜ ꓢꓴ ꓥ ꓡꓳ꓿
ꓗ ꓘꓶ ꓗꓪ ꓐꓰ ꓓꓵꓽ ꓡꓰ ꓢꓴ ꓠꓽ ꓮ ꓣꓳꓺ ꓡꓳꓸ ꓢꓴ ꓥ ꓡꓳ꓿
ꓗ ꓘꓶ ꓦꓴ ꓠꓬ ꓢꓴ ꓠꓬ ꓬꓲ ꓔꓯ ꓗ ꓘꓶꓽ ꓒꓴ ꓖꓶˍ ꓡꓳ꓿ ꓮ ꓣꓳˍ ꓟꓲ ꓬꓲ ꓢꓯꓼ ꓠꓺ ꓡꓳˍ ꓡꓳ꓿ ꓖꓳ ꓡꓱ ꓢꓲ ꓬꓲ ꓠꓬ ꓬꓲ ꓚꓲ ꓛꓬ ꓮ ꓣꓳꓺ ꓔꓯ ꓟꓬꓱꓺ ꓘꓴꓻ ꓢꓲ꓾ ꓧꓳꓽ ꓓꓳ ꓙꓰˍ ꓡꓳ꓿
ꓬꓲ ꓮ ꓣꓳ ꓮ ꓙꓵ ꓔꓯ ꓧꓳ ꓓꓳ ꓙꓰ ꓗꓷ ꓠꓬ꓾ ꓬꓲ ꓪ ꓟꓲ ꓕꓯ ꓢꓲ ꓗꓪ ꓙꓰ ꓢꓲ꓾ ꓮ ꓣꓳ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓢꓯꓼ ꓔꓯꓸ ꓬꓲ ꓪ ꓢꓷˍ ꓡꓳ꓿
ꓠꓱ ꓐꓯ ꓢꓴ ꓔꓯ ꓠ ꓬꓲ ꓪ ꓟꓽ ꓛꓳ ꓙꓰ꓿ ꓬꓲ ꓔꓯˍ ꓐꓰ ꓛꓰ ꓙꓰˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓠꓱ ꓐꓯ ꓢꓴ ꓢꓯꓼ ꓔꓯ ꓬꓲ ꓪ ꓟꓽ ꓢꓷ꓾ ꓐꓯ ꓡꓳ꓿
ꓥꓪ ꓠꓬ ꓗ ꓘꓶ ꓥ ꓡꓳ꓿ ꓮ ꓟ ꓥ ꓟꓲ ꓥꓪ ꓐꓰ ꓓꓵ ꓡˍ ꓠꓬ ꓬꓲ ꓢꓯꓼ ꓟꓬ ꓝ ꓟꓶ ꓢꓲ ꓬꓲ ꓓꓵ ꓓꓵ ꓓꓳ ꓓꓳ ꓬꓰ ꓢꓲ ꓠꓬꓲ꓾ ꓫꓵꓸ ꓟꓲ ꓧꓪ ꓟꓶˍ ꓥꓳ꓿
ꓞꓳ ꓘꓴ ꓠ꓾ ꓘꓴꓽ ꓠˍ ꓟ ꓐꓰ꓾ ꓢꓰꓼ ꓠˍ ꓟ ꓐꓰ ꓐꓬꓺ ꓡꓰ ꓝꓲ ꓠˍ ꓟ ꓟꓽ ꓥ ꓠꓬ꓾ ꓬꓲ ꓟꓽ ꓡ꓿ ꓥꓪ ꓠ ꓮ ꓣꓳ ꓔꓯ ꓢꓯꓼ ꓟꓬ ꓟꓶ ꓝꓲ ꓠˍ ꓐꓰ꓾ ꓐꓲꓺ ꓡꓶ ꓡꓰˍ ꓟ ꓢꓯꓼ ꓟꓬ ꓟꓶ ꓝꓲ ꓠˍ ꓟ ꓡˍ ꓡꓳ꓿
ꓥꓪ ꓠꓬ ꓙꓲˍ ꓟ ꓮ ꓣꓳ ꓡꓳꓸ ꓢꓴ ꓥ ꓡꓳ꓿ ꓙꓲˍ ꓟ ꓮ ꓣꓳ ꓡꓳꓸ ꓢꓴ ꓠꓬ꓾ ꓮ ꓣꓳ ꓐꓱ ꓶ ꓬꓲ ꓢꓯꓼ ꓟꓬ ꓖꓶˍ ꓡꓳ꓿
ꓪꓽ ꓗꓴꓸ ꓔ ꓟ ꓠ꓾ ꓮ ꓣꓳ ꓡꓳ ꓢꓴ ꓟꓽ ꓥ ꓢꓲ꓾ ꓮ ꓣꓳ ꓠꓬ ꓬꓲ ꓔꓯˍ ꓟ ꓟꓽ ꓥ ꓠꓬꓲ꓾ ꓪꓰ ꓕꓳꓹ ꓡˍ ꓟ ꓔꓯ ꓟꓳ ꓗꓷ ꓠꓬ꓾ ꓮ ꓣꓳ ꓔꓯ ꓡꓳꓺ ꓔ ꓬꓰ ꓢꓲ ꓛꓰ ꓙꓰˍ ꓡꓳ꓿ ꓖꓳ ꓡꓱ ꓢꓲ ꓪꓰ ꓕꓳꓹ ꓠꓬ ꓮ ꓣꓳ ꓔꓯ ꓡ ꓢꓲ꓾ ꓬꓲ ꓪ ꓔꓯ ꓖꓼ ꓒꓬꓱ ꓗꓷˍ ꓡꓳ꓿
ꓬꓲ ꓠꓬ ꓪꓽ ꓗꓴꓸ ꓔ ꓟ ꓥ ꓠꓬꓲ꓾ ꓮ ꓣꓳ ꓔꓯ ꓟꓽ ꓥꓳꓺ ꓢꓲ ꓛꓰ ꓙꓰˍ ꓡꓳ꓿
ꓥꓪ ꓠꓬ ꓙꓲꓻˍ ꓟ ꓮ ꓣꓳ ꓡꓳꓸ ꓢꓴ ꓥ ꓡꓳ꓿ ꓐꓹ ꓐ ꓥꓪ ꓔꓯ ꓢꓷꓸˍ ꓡꓰ ꓐꓰ ꓥꓪˍ ꓟꓲ ꓐꓹ ꓐ ꓔꓯ ꓢꓷꓸ ꓟˍ ꓡꓰ ꓐꓰ꓾ ꓥꓪ ꓮ ꓣꓳ ꓔꓯ ꓥꓪ ꓢꓷˍ ꓡꓳ꓿ ꓥꓪ ꓮ ꓣꓳˍ ꓟꓲ ꓥꓪ ꓔꓯ ꓢꓷˍ ꓡꓳ꓿ ꓖꓳ ꓡꓱ ꓢꓲ ꓥꓪ ꓠꓬ ꓮ ꓣꓳ ꓐꓱ ꓶ ꓥꓪ ꓢꓯꓼ ꓟꓬ ꓖꓶˍ ꓡꓳ꓿