Lisu Christian Hymnal
Hymn 18 ꓬꓰ-ꓢꓴ ꓗꓪ ꓐꓰ ꓤ ꓠꓱ ꓤ ꓐꓴ ꓐꓱ ꓶ ꓔꓯꓺ ꓢꓳꓺ ꓓꓴ Lyrics
ꓤ ꓠꓱ ꓤ ꓠꓬ ꓪꓴ ꓡ ꓟꓴ ꓡ ꓢꓲ ꓢꓯꓼ ꓙꓳ ꓡˍ ꓡꓳ꓿ ꓙ ꓜꓲꓼ ꓠꓲˍ ꓟꓲ ꓐꓲꓺ ꓡˍ ꓡꓳ꓿ ꓝꓮꓲ ꓠꓬ ꓪꓴ-ꓢ ꓣꓱ ꓛꓰ ꓬꓲ ꓔꓯ ꓙꓳˍꓡꓳ꓿
ꓕꓲ ꓘꓳˍ ꓡꓰ ꓕꓲ ꓘꓳ ꓦꓲ-ꓘꓳꓻ-ꓑꓮꓲ ꓬꓰˍ ꓕꓯ꓾ ꓬꓲ ꓮ ꓐ ꓮ ꓟ ꓠꓬ ꓙꓱ-ꓣꓴ-ꓢ- ꓡꓱ ꓗꓪ ꓙꓰˍ ꓡꓳ꓿
ꓬꓲ ꓞꓲꓻ ꓠꓬꓲ ꓘꓳꓼ ꓐꓲꓺ ꓡ ꓠꓬ꓾ ꓑꓮꓲꓽ ꓬꓰˍ ꓟ ꓗ ꓫꓵ ꓔꓯ ꓛꓳ ꓢꓲ꓾ ꓬꓲ ꓪ ꓓꓯ ꓙꓰˍ ꓡꓳ꓿
ꓖꓳ ꓡꓱ ꓢꓲ ꓑꓮꓲꓽ ꓬꓰ ꓓꓳ ꓡꓰ ꓠꓬ꓾ ꓬꓲ ꓪ ꓬꓲ ꓙꓰˍ ꓕꓯ꓾ ꓤ ꓖꓴ ꓡꓯ ꓤ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓔꓲ ꓬꓰˍ ꓡꓳ꓿ ꓬꓲ ꓮ ꓐ ꓮ ꓟ ꓠꓽ ꓟꓽ ꓢꓷ꓿
ꓬꓲ ꓠꓬ ꓕꓲ ꓛꓳˍ ꓐꓰ ꓫꓱ ꓢꓴ ꓗꓪ ꓙꓰ ꓔꓬˍ ꓡꓳ꓾ ꓐꓰ ꓬꓲ ꓪ ꓓꓵ ꓙ ꓢꓲ꓾ ꓕꓲ ꓠꓬꓲ ꓙ ꓖꓴ ꓫꓱ ꓗꓷ ꓠꓬ꓾ ꓬꓲ ꓪ ꓫꓵ ꓤ ꓧꓪ ꓤˍ ꓐꓰ ꓢꓷꓸˍ ꓟ ꓡ ꓞꓳ ꓗꓳ ꓡꓳ ꓗꓪ ꓬꓲ ꓔꓯ ꓧꓪ ꓢꓲ꓾
ꓧꓪ ꓟꓽ ꓟꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓡꓽ ꓙꓰ ꓢꓲ꓾ ꓬꓲ ꓔꓯ ꓧꓪ ꓬꓰˍ ꓡꓳ꓿
ꓗ ꓠꓯ ꓢꓽ ꓠꓬꓲ ꓢꓲ꓾ ꓢꓲ ꓫꓬ ꓦꓲ ꓠꓯꓸꓼ ꓗꓪ ꓬꓲ ꓔꓯ ꓧꓪ ꓟꓳˍ ꓡꓳ꓿ ꓬꓲ ꓠꓬ ꓟꓸ ꓒ ꓐꓴ ꓗꓳ ꓡꓳ ꓗꓪ ꓠꓬꓲ ꓠꓸ ꓔꓬ ꓢꓲ꓾ ꓟ. ꓟꓲ ꓠꓺ ꓠꓹ ꓢꓲ ꓠꓬꓲ꓾ ꓬꓲ ꓪ ꓔꓯ ꓠˍ ꓟꓲ ꓠꓺ ꓠꓬꓲ ꓔꓬˍ ꓡꓳ꓿
ꓬꓲ ꓔꓯ ꓑ ꓙ ꓢꓴ ꓮ ꓙꓵ ꓠꓬ ꓬꓲ ꓙ ꓜꓲˍ ꓟ ꓐꓰ ꓒꓳꓹ ꓖꓶ ꓡˍ ꓟ ꓔꓯ ꓓꓵ ꓙ ꓟꓶˍ ꓡꓳ꓿
ꓬꓲ ꓪ ꓬꓲ ꓔꓯ ꓟꓳ ꓗꓷ ꓠꓬ꓾ ꓬꓲ ꓪ ꓓꓵ ꓙ ꓟꓶ ꓢꓲ꓾ ꓬꓲ ꓟꓹ ꓟ ꓡꓰ ꓬꓲ ꓔꓯ꓾ ꓥꓪ ꓤꓽꓳ꓾ ꓮ ꓫꓵ ꓪꓴ ꓠꓬꓲ ꓥꓪ ꓠꓴ ꓔꓯ ꓕꓱ ꓡꓱ ꓬꓰ ꓖꓶˍ ꓡꓳ꓿ ꓠꓬꓲ ꓠ꓾ ꓠꓴ ꓐꓹ ꓐ ꓐꓰ ꓥꓪ ꓠꓬ ꓠꓲ ꓟ ꓫꓸ ꓠꓬꓲ ꓠꓴ ꓔꓯ ꓧꓪˍ ꓡꓳ꓾ ꓐꓯˍ ꓡꓳ꓿
ꓬꓲ ꓡꓰ꓾ ꓮ ꓫꓵ ꓪꓴꓸ ꓠꓬꓲ ꓥꓪ ꓔꓯ ꓧꓪˍ ꓡꓳꓺꓽ꓿ ꓥꓪ ꓠꓬ ꓥꓪ ꓐꓹ ꓐ ꓟꓬꓱꓽ ꓬꓰ ꓠ ꓗˍ ꓟ ꓠꓴ ꓪ ꓟꓽ ꓢꓷꓸ ꓡꓺꓽ꓾ ꓐꓯˍ ꓡꓳ꓿
ꓬꓲ ꓬꓲ ꓪ ꓔꓯ ꓐꓯˍ ꓟ ꓐꓯ ꓘꓶ ꓕꓱ ꓟ ꓠꓬ꓾ ꓬꓲ ꓪ ꓟꓽ ꓙ ꓜꓲꓼ꓿
ꓬꓲ ꓠꓬ ꓬꓲ ꓪˍ ꓐꓰ ꓕꓲ ꓛꓳ ꓠ-ꓢ-ꓡꓱ ꓗꓪ ꓬꓯꓼ ꓙꓰ ꓢꓲ꓾ ꓬꓲ ꓪ ꓙꓵꓽˍ ꓟ ꓔꓯ ꓛꓳˍ ꓡꓳ꓿ ꓬꓲ ꓟꓹ ꓟ ꓠꓽ ꓐꓯ ꓘꓶ ꓕꓱ ꓟꓬ ꓟ ꓮ ꓙꓵꓽ ꓬꓲ ꓠꓲ ꓟ ꓗꓪ ꓗꓶ ꓔˍ ꓡꓳ꓿
ꓬꓰ-ꓢꓴ ꓠꓬ ꓙ ꓜꓲ ꓠꓲꓹˍ ꓐꓰ ꓬꓲ ꓖꓳ ꓓꓱˍ ꓐꓰ꓾ ꓪꓴ-ꓢ ꓐꓰ ꓞꓳ ꓤ ꓬꓲ ꓔꓯ ꓠꓲꓹ ꓒꓴˍ ꓟ꓾ ꓮ ꓙꓵ ꓡꓱꓸꓼ ꓗꓪ ꓪꓴꓽ ꓡˍ ꓡꓳ꓿