Lisu Christian Hymnal
Hymn 16 ꓬꓰ-ꓢꓴ ꓦꓵ ꓡˍ ꓟ Lyrics
ꓦꓬꓼ ꓠꓬꓲ ꓖꓳ ꓟ ꓗꓪ꓾ ꓢꓲ-ꓢ ꓮ-ꓗꓴ-ꓢꓶ-ꓔꓴ ꓡꓰ ꓟꓵ ꓗꓳ ꓓꓵ ꓓꓵ ꓢꓴ ꓞꓳ ꓵ ꓟꓬꓱ ꓕꓳ ꓶ ꓗꓪ ꓟꓬꓱꓺ ꓐꓳ ꓠ ꓗ ꓡꓳ꓾ ꓐꓰ꓾ ꓕꓵꓼ ꓪ ꓖꓶ ꓩꓴ ꓗꓷˍ ꓡꓳ꓿
ꓞꓳ ꓵꓺ ꓟꓬꓱꓺ ꓐꓳˍ ꓟ ꓕꓱ ꓟ ꓠꓬ꓾ ꓫꓲ-ꓡꓲ-ꓬ ꓟꓵꓽ ꓙꓵꓽ ꓒ ꓚꓲ-ꓡꓲ-ꓠꓴ ꓣꓱˍ ꓕꓯ ꓥ ꓢꓲ꓾ ꓬꓲꓸ ꓪꓴꓸ ꓕꓲ ꓧꓪꓹ ꓬꓰˍ ꓟ ꓥ ꓡꓳ꓿
ꓮ ꓙꓵ ꓢꓴ ꓠꓬ ꓟꓬꓱꓺ ꓐꓳ ꓠ ꓟ꓾ ꓟꓲ ꓡꓳ ꓒꓱ ꓗꓪ ꓟꓲ ꓙꓰˍ ꓡꓳ꓿
ꓬꓳ-ꓢꓷˍ ꓟꓲ ꓖ-ꓡꓲ-ꓡ ꓟꓵꓽ ꓠ-ꓢ-ꓡꓱ ꓗꓪ ꓐꓰ ꓬꓴ-ꓔ ꓟꓵ ꓐꓱ-ꓡꓲ-ꓦꓱ ꓟꓬꓱꓺ ꓔ ꓟ ꓓ-ꓪꓵ ꓡꓳ ꓒꓱ ꓗꓪ ꓓꓯ ꓙꓰˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠ ꓓ-ꓪꓵ ꓕꓲ ꓪꓳꓼ ꓕꓲ ꓦꓲꓻ ꓢꓴ ꓥ ꓡꓳ꓿
ꓬꓲꓸˍ ꓐꓰ ꓬꓲ ꓔꓯ ꓖꓶ ꓔˍ ꓟ ꓟ-ꓡꓲ ꓟꓲ ꓟꓬꓱꓺ ꓐꓳ ꓙꓰˍ ꓡꓳ꓿ ꓖꓳ ꓕꓯ ꓟ-ꓡꓲ ꓠꓬ ꓬꓲ ꓖꓳ ꓓꓱ ꓡꓲꓽˍ ꓡꓳ꓿
ꓬꓲ ꓪ ꓖꓳ ꓗꓪ ꓔꓬˍ ꓕꓯ꓾ ꓟ‐ꓡꓲ ꓠꓬ ꓤ ꓠꓱ ꓦꓵꓻ ꓡˍ ꓟ ꓦꓬ ꓠꓬꓲ ꓛꓲ ꓡˍ ꓡꓳ꓿
ꓬꓲ ꓠꓬ ꓤ ꓪꓴꓽ ꓕꓲ ꓣꓳ ꓦꓵꓻ ꓢꓲ ꓮꓸ ꓑꓱꓺ ꓡꓰ ꓕꓱꓹ ꓢꓲ ꓠꓬꓲ ꓡꓴ ꓗꓪ ꓫꓵꓸ ꓔˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓶꓽ ꓧꓪ ꓦꓲꓻ ꓗꓪ ꓬꓲ ꓪ ꓔꓬ ꓖꓴ ꓟꓽ ꓙꓳ꓿
ꓖꓳ ꓕꓯ ꓖꓳ ꓕꓲ ꓟꓵꓽ ꓗꓪ ꓮ ꓣꓳ ꓡꓳꓸ ꓢꓴ ꓠꓬ ꓡꓲ ꓛꓲ ꓗꓪ꓾ ꓢ ꓘꓪ ꓕꓯ ꓮ ꓣꓳ ꓜꓴꓻ ꓔꓯ ꓦꓴꓻ ꓠꓬ ꓔꓬ ꓡꓳ꓿
ꓢꓲ ꓒ ꓬꓲ ꓝꓲ ꓓꓴ ꓕꓲ ꓣꓳ ꓠꓬ ꓬꓲ ꓪ ꓚꓳ ꓚꓬ ꓗꓪ ꓦꓰꓼ ꓞ ꓢꓲ꓾ ꓢꓲ ꓒ ꓬꓲ ꓐꓬꓱꓼ ꓡꓱꓼ ꓡꓱ ꓟ ꓠꓬ ꓬꓲ ꓪ ꓚꓳ ꓡꓳ ꓡꓳ ꓗꓪ ꓣꓳꓺ ꓡ ꓠꓬꓲ ꓬꓲ ꓪ ꓮ ꓘꓶ ꓙꓳꓺˍ ꓡꓳ꓿
ꓖꓳ ꓡꓱ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓬꓲꓸ ꓪ ꓔꓯ꓾ ꓕꓽ ꓙꓳꓺ꓾ ꓠꓺ ꓠ꓾ ꓥꓪ ꓠꓬ ꓑ ꓫꓬ ꓮ ꓙꓵ ꓐꓱ ꓶ ꓮ ꓘꓶꓸ ꓗꓹ ꓛꓲˍ ꓟ ꓶꓼ ꓥꓳ ꓫꓱ ꓥꓳ ꓠꓴ ꓪ ꓔꓯ ꓐꓯ ꓖꓶ ꓡˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓠꓬꓲ ꓠꓬꓲ ꓓ-ꓪꓴ ꓡꓳ ꓒꓱ ꓗꓪ ꓠꓴ ꓪ ꓐꓱ ꓶ ꓚꓬꓴ ꓢꓲ ꓒ ꓕꓲ ꓣꓳ ꓦꓵꓻ ꓔꓸˍ ꓡꓳ꓿ ꓬꓲ ꓠꓬ ꓢꓲ ꓒ ꓙꓲ-ꓢꓴ ꓥ ꓡꓳ꓿
ꓮ ꓑꓱ ꓡꓰ ꓕꓱ, ꓢꓲ ꓡꓴ ꓕꓴ ꓗꓪ ꓫꓵꓸ ꓔˍ ꓟ ꓞꓳ ꓫꓵꓼ ꓤ ꓕꓲ ꓣꓳ ꓠꓴ ꓪ ꓟꓳˍ ꓥꓳ꓿ ꓖꓳ ꓟ ꓠꓬ ꓠꓴ ꓪ ꓢꓷ. ꓡꓰ ꓓꓴ ꓥ ꓡꓳ꓾ ꓐꓯˍ ꓡꓳ꓿
ꓞꓼ ꓐꓰ ꓟꓴ ꓗꓪ ꓗꓪ ꓟ ꓬꓲ ꓜꓴ ꓠꓬ ꓝꓲ ꓓꓴ ꓖꓳ ꓕꓲ ꓣꓳ ꓔꓯ ꓛꓳ ꓢꓲ꓾ ꓪꓴ-ꓢ ꓔꓯ ꓕꓱ ꓡꓱ ꓫꓱ ꓖꓶˍ ꓡꓳ꓿
ꓟꓴ ꓡꓳꓹ ꓗꓪ ꓪꓴ-ꓢ ꓔꓯ ꓟꓬꓱꓺ ꓓꓳꓽ ꓖꓶ꓾ ꓟꓲ ꓠꓯ ꓗꓪ ꓬꓲ ꓠꓲ ꓒꓴˍ ꓟ ꓞꓳ ꓤ ꓔꓯ ꓢꓲ ꓡꓲˍ ꓟ ꓟꓶ ꓝꓲ꓾ ꓐꓯˍ ꓡꓳ꓿
ꓟꓴ ꓗꓪ ꓝꓲ ꓓꓴ ꓐꓴ ꓬꓲ ꓪ ꓔꓯ ꓧꓹ ꓗꓷ ꓢꓲ꓾ ꓟꓴ ꓗꓪ ꓗꓪ ꓓꓯ ꓙꓰ ꓗ ꓠꓯ. ꓮ ꓣꓳ ꓡꓳꓸ ꓢꓴ ꓕꓲ ꓣꓳ ꓛꓳ ꓕꓲ ꓣꓳ ꓕꓱ ꓡꓱ ꓐꓯˍ ꓡꓳ꓿ ꓣꓳ ꓠꓬ ꓐꓱ-ꓡꓲ-ꓦꓱ ꓗꓪ꓾ ꓢꓲ ꓒ ꓣꓳ ꓔꓯ ꓟꓸ ꓖꓶ ꓡ ꓟ ꓐꓯ ꓘꓶ ꓒꓬꓱꓼ ꓡˍ ꓟ ꓔꓯ ꓡꓳꓸ ꓠꓬꓲ ꓙꓰ ꓡꓯ꓾ ꓐꓯˍ ꓡꓳ꓿
ꓬꓲ ꓪ ꓠꓲ ꓞ ꓙꓰ ꓠꓬ꓾ ꓟ-ꓡꓲˍ ꓐꓰ ꓬꓳ-ꓢꓷˍ ꓐꓰ ꓡꓴ ꓕꓴ ꓗꓪ ꓫꓵꓸ ꓔˍ ꓟ ꓞꓳ ꓫꓵꓼ ꓤ ꓔꓯ ꓧꓪ ꓟꓶˍ ꓡꓳ꓿
ꓬꓲ ꓪ ꓟꓳ ꓗꓷ ꓠꓬ ꓬꓲ ꓪ ꓔꓯ ꓐꓯ ꓖꓶ ꓡˍ ꓟ꓾ ꓤ ꓠꓱ ꓤ ꓔꓯ ꓖꓴꓺˍ ꓟ ꓐꓯ ꓘꓶ ꓖꓳ ꓟ ꓐꓯ ꓟꓸ ꓖꓶˍ ꓡꓳ꓿
ꓖꓳ ꓡꓱ ꓠꓬ ꓮ ꓣꓳ ꓡꓳꓸ ꓢꓴ ꓡꓰ ꓐꓯˍ ꓟ ꓔꓯ ꓑ ꓙ ꓢꓴ ꓮ ꓙꓵ ꓓꓵ ꓙ ꓟꓶˍ ꓡꓳ꓿
ꓖꓳ ꓡꓱ ꓥˍ ꓟꓲ ꓟ-ꓡꓲ ꓠꓬ ꓐꓯ ꓘꓶ ꓕꓱ ꓟꓬ ꓟ ꓠꓲꓹ ꓟ ꓗꓪ ꓗꓶ ꓔ ꓢꓲ ꓓꓵ ꓙ ꓠꓬꓲ ꓔꓬˍ ꓡꓳ꓿
ꓮ ꓣꓳ ꓡꓳꓸ ꓢꓴ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓪ ꓔꓯ ꓐꓯ ꓖꓶ ꓡˍ ꓟ ꓡꓰ ꓐꓰ꓾ ꓑˍ ꓟꓲ ꓑ ꓙ ꓢꓲ꓾ ꓟꓳˍ ꓟꓲ ꓟꓳ ꓗꓷˍ ꓟ ꓑꓶꓸ ꓓꓴ꓾ ꓬꓲꓸ ꓪ ꓬꓲ ꓙꓰˍ ꓕꓯ ꓪꓴ-ꓢ ꓔꓯ ꓟꓬꓱꓺ ꓓꓳꓽ ꓓꓽ ꓟ ꓖꓶ ꓢꓲ꓾ ꓬꓲ ꓔꓯ ꓫꓱꓸ ꓖꓶˍ ꓡꓳ꓿