Lisu Christian Hymnal
Hymn 13 ꓟꓲ-ꓢ-ꓬ Lyrics
ꓬꓰ-ꓫꓲ ꓬꓲ ꓪꓴꓸ ꓓꓴꓽ ꓗꓪ ꓐꓰ ꓬꓲ ꓡꓯꓼ- ꓑꓵꓺ ꓕꓲ ꓧꓹ ꓠꓱꓽ ꓡˍ ꓥꓳ꓿ ꓬꓲ ꓚꓰ ꓗꓪ ꓐꓰ ꓠꓱꓽ ꓡˍ ꓟ ꓡꓯꓼ ꓗꓸ ꓠꓬ ꓬꓲ ꓢꓶ ꓓꓱꓼˍ ꓥꓳ꓿
ꓬꓰ-ꓧꓳ-ꓧꓪ ꓬꓲ ꓦꓻ ꓠꓬ ꓬꓲ ꓕꓯ ꓢꓲ ꓠꓽ ꓡˍ ꓥꓳ꓿ ꓢꓷꓸ ꓠꓲꓹˍ ꓐꓰ ꓙ ꓜꓲꓼ ꓠꓲꓹ ꓦ꓾ ꓚꓴꓽ ꓬꓲꓹ ꓟꓳ ꓖꓶˍ ꓟˍ ꓐꓰ ꓪꓽ ꓠꓬꓲˍ ꓟ ꓦꓻ꓾ ꓬꓰ-ꓧꓳ-ꓧꓪ ꓔꓯꓸ ꓢꓷꓸˍ ꓟˍ ꓐꓰ ꓙꓳꓺ ꓒꓵꓽˍ ꓟ ꓦꓻ ꓥ ꓡꓳ꓿
ꓬꓲ ꓗꓹ ꓛꓲ ꓓꓴ ꓠꓬ ꓬꓰ-ꓧꓳ-ꓧꓪ ꓔꓯ ꓙꓳꓺ ꓒꓵꓽˍ ꓟ ꓗꓪ ꓐꓰ ꓥ ꓡꓳ꓿ ꓬꓲ ꓠꓬ ꓬꓲ ꓟꓬ ꓢꓶ ꓡꓰ ꓟꓳˍ ꓟ ꓔꓯ ꓛꓳ ꓢꓲ ꓐꓯ ꓟꓴ ꓘꓶˍ ꓟ ꓟꓽ ꓬꓰ꓾ ꓬꓲ ꓠꓸ ꓑꓳꓸ ꓑ ꓙˍ ꓟ ꓔꓯ ꓛꓳ ꓢꓲ ꓐꓯ ꓞꓷˍ ꓟˍ ꓟꓲ ꓟꓽ ꓬꓰ꓿
ꓬꓲ ꓠꓽ ꓙꓲ ꓫꓬˍ ꓟ ꓡꓰ ꓞꓳ ꓫ ꓔꓯ ꓐꓯ ꓟꓴ ꓘꓶˍ ꓥꓳ꓿ ꓟꓲ ꓠꓯ ꓗꓪ ꓟ ꓠꓲꓹ ꓠꓴꓽ ꓢꓴ ꓐꓴ ꓐꓱ ꓶ ꓬꓲ ꓠꓬ ꓜꓳꓽˍ ꓟ ꓡꓰ ꓐꓯ ꓞꓷˍ ꓥꓳ꓿
ꓬꓲ ꓟꓷ ꓠꓷ ꓗꓪ ꓟ ꓙꓵꓽ ꓓ ꓡꓰ ꓟꓲ ꓠꓯ ꓔꓯ ꓔꓲꓸˍ ꓥꓳ꓿ ꓬꓲ ꓟꓷ ꓠꓷ ꓗꓴꓸ ꓙꓲ ꓗꓪ ꓐꓰ ꓦ ꓓꓳ ꓡˍ ꓟ ꓢꓯꓼ ꓡꓰ ꓟꓽ ꓙꓲ ꓟꓽ ꓜꓳ ꓟ ꓞꓳ ꓤ ꓐꓴ ꓔꓯ ꓢꓰꓼˍ ꓥꓳ꓿
ꓙꓲ ꓫꓬˍ ꓟ ꓠꓬ ꓬꓲ ꓙꓴꓽ ꓝꓲꓸ ꓗꓪ ꓟ ꓙꓽ ꓧꓷ ꓥ ꓡꓳ꓿ ꓦ ꓡꓱ ꓐꓳˍ ꓟ ꓠꓬ ꓬꓲ ꓙꓳꓽ ꓐꓬ ꓗꓪ ꓟ ꓧꓷꓹ ꓚ ꓥ ꓡꓳ꓿
ꓥꓪ ꓡꓰ ꓔꓳꓹ ꓔ ꓖꓶˍ ꓟ ꓥꓪ ꓚꓳ ꓑ ꓔꓯ ꓡꓳꓸ ꓠꓬꓲ꓿ ꓬꓲ ꓠꓬ ꓥꓪ ꓡꓰ ꓢꓲꓺ ꓔˍ ꓟ ꓥ ꓢꓲ꓾ ꓥꓪ ꓠꓲꓹ ꓟ ꓠꓬ ꓬꓲ. ꓔꓯ ꓠꓲꓹ ꓒꓴˍ ꓡꓳ꓿ ꓥꓪ ꓡꓰ ꓥꓪ ꓦꓻ ꓬꓲ ꓔꓯ ꓖꓶ ꓗꓷꓳ꓿ ꓬꓲ ꓠꓬ ꓐꓶꓽ ꓞꓳ ꓔꓯ ꓔꓱꓹ ꓜꓳˍ ꓟ ꓙꓵꓽ ꓚꓱꓹ ꓚ ꓓꓳ ꓡꓰˍ ꓥꓳ꓿
ꓬꓲ ꓠꓬ ꓟꓽ ꓘꓴ ꓓꓳ ꓡ꓿ ꓑꓱꓹˍ ꓟꓲ ꓟꓽ ꓑꓱꓹ꓾ ꓙꓵꓺ ꓙ ꓖꓴ ꓗꓪˍ ꓟꓲ ꓬꓲ ꓢꓯꓼ ꓔꓯꓸ ꓟꓽ ꓑ ꓙ ꓡꓰ ꓝꓲ꓿
ꓠꓬꓲꓸ ꓠꓻ ꓡꓰꓻ ꓟ ꓬꓲꓻ ꓑ ꓒꓴ ꓓꓻ ꓔꓯ ꓬꓲ ꓟꓽ ꓘꓳꓹ ꓡꓰ ꓝꓲ꓿ ꓶꓻ ꓶˍ ꓐꓰ ꓐꓬ ꓞˍ ꓟ ꓟꓬ ꓡꓴ ꓚ ꓔꓯ ꓬꓲ ꓟꓽ ꓢꓰꓼ꓿ ꓬꓲ ꓠꓬ ꓦ ꓡꓱ ꓐꓳ ꓐꓳˍ ꓡꓰ ꓔꓱꓹ ꓜꓳˍ ꓟ ꓙꓵꓽ ꓚꓱꓹ ꓚ ꓓꓳ ꓙꓰˍ ꓥꓳ꓿
ꓟꓲ ꓠꓯ ꓗꓪ ꓬꓲ ꓡꓰ ꓔꓱꓹ ꓜꓳˍ ꓟ ꓙꓵꓽ ꓚꓱ ꓟꓽ ꓔꓶꓺ ꓕꓶ ꓡꓰ ꓕ ꓑꓳ꓾ ꓬꓲ ꓠꓽ ꓠꓲꓹ ꓟ ꓟꓽ ꓙꓬ ꓡꓰ꓾ ꓢꓯꓼˍ ꓟꓲ ꓟꓽ ꓐꓽ ꓡꓰ꓿ ꓖꓳ ꓡꓱ ꓢꓲ ꓬꓲ ꓗꓳ ꓡꓳ ꓟꓵꓽ ꓮ ꓙꓵ ꓠꓬ ꓬꓲ ꓙꓵꓽ ꓗ ꓔꓯ ꓡꓳ ꓠꓬˍ ꓥꓳ꓿
ꓖꓳ ꓡꓱ ꓥˍ ꓟꓲ ꓐꓱ-ꓡꓲ-ꓦꓱ ꓰ-ꓩ‐ꓕꓺꓳ꓾ ꓠꓴ ꓠꓬ ꓬꓴ-ꓔ ꓡ ꓞꓳ ꓬꓲ ꓔꓴ ꓬꓲ ꓔꓴ ꓗꓳ ꓡꓳ ꓗꓪ ꓣꓳꓺˍ ꓟ ꓥˍ ꓟꓲ꓾ ꓢ ꓖꓪ ꓠꓽ ꓠꓴ ꓗꓳ ꓡꓳ ꓗꓪ ꓐꓰ ꓥꓪ ꓐꓱ ꓶ ꓬꓲ-ꓢꓷ-ꓡꓰ ꓔꓯ ꓙꓵꓽ ꓢꓴ ꓕꓲ ꓣꓳ ꓓꓳ ꓡˍ ꓥꓳ꓿ ꓬꓲ ꓚꓰꓺ ꓠꓬ ꓮ ꓠꓱ ꓠꓱ ꓕꓯ ꓕꓲ ꓞꓲ ꓕꓲ ꓑ ꓟ ꓤꓶ ꓗꓪ ꓐꓰ ꓥ ꓡꓳ꓿