Lisu Christian Hymnal
Hymn 12 ꓬꓲ ꓒꓵ ꓟꓽ ꓠꓵ ꓠꓵ ꓖꓶˍ ꓟ ꓣꓱ ꓛꓰ Lyrics
ꓢꓲꓼ ꓢꓴ ꓥ ꓕ ꓑꓳ. ꓬꓲ ꓙꓬ ꓗꓪ ꓡꓯ ꓟꓴ꓿ ꓒꓴ ꓟꓽ ꓙꓳ ꓢꓴˍ ꓟꓲ ꓡꓯ꓿ ꓠꓴ ꓪ ꓡ ꓢꓲ ꓪꓴ ꓜ ꓡꓯ꓿ ꓥ ꓡꓳ꓾ ꓒꓴ ꓟꓽ ꓣꓱ ꓣꓱ꓾ ꓬꓲ ꓒꓵˍ ꓟꓲ ꓟꓽ ꓓꓳ ꓓꓳ꓾ ꓛꓱ ꓡꓱ ꓙꓵˍ ꓐꓰ ꓮ ꓚꓵꓹ ꓬꓲꓻ ꓪꓴꓻ ꓡꓯ ꓟꓴ꓿
ꓠꓴ ꓪ ꓠꓬ ꓮ ꓫꓵꓽ ꓑꓶꓸ ꓓꓴ ꓜꓽ ꓓꓴ ꓟꓽ ꓥ ꓡꓳ ꓫꓵꓽ ꓐꓱ ꓶ ꓒꓴ ꓣꓱ ꓒꓬꓹˍ ꓡꓺꓽ꓿ ꓮ ꓫꓵꓽ ꓪꓴꓸ ꓠꓬꓲ ꓠꓲꓹ ꓘꓪ ꓫꓵ ꓓꓴ ꓟꓽ ꓥ ꓟ ꓐꓱ ꓶ ꓢꓯꓼ ꓕꓵꓼ ꓪꓴ ꓧꓶˍ ꓡꓺꓽ꓿ ꓠꓴ ꓪ ꓥꓪ ꓔꓯ ꓬꓲꓸ ꓜꓶ ꓐꓰ ꓠꓺ ꓠꓹ ꓢꓲ꓾ ꓙꓲˍ ꓟ ꓜꓽ ꓓꓴ ꓜ ꓡꓯ꓿ ꓐꓳˍ ꓟ ꓞꓶˍ ꓟ ꓗꓪ ꓐꓰ ꓠꓲ ꓟ ꓔꓯ ꓗꓹ ꓛꓲ ꓡꓰ ꓝꓲ ꓟꓴꓽ꓿
ꓠꓴ ꓪ ꓠꓸ ꓑꓳ ꓒꓳꓹ ꓡ ꓢꓲ ꓥꓪ ꓔꓯ ꓡꓯ꓿ ꓠꓴ ꓪ ꓠꓺ ꓡꓳꓸ ꓢꓲ ꓢꓯꓸ ꓔꓬ ꓟꓶˍ ꓥꓳ꓿ ꓖꓳ ꓡꓱ ꓠꓬ ꓥꓪ ꓠꓴ ꓪˍ ꓐꓰ ꓕꓲ ꓞꓲ ꓕꓲ ꓑˍ ꓟ ꓘꓶꓽ ꓫꓵꓽ ꓬꓰˍ ꓥꓳ꓿ ꓕꓱ ꓟ ꓠꓬ ꓓ-ꓪꓵ ꓔꓯ ꓖꓶ ꓙ ꓟꓳˍ ꓟ꓾ ꓦ ꓡꓱ ꓐꓳˍ ꓟ ꓥꓪ ꓙ ꓗꓳ ꓠꓲꓹ ꓥ ꓡꓳ꓿
ꓠꓬꓲ ꓠ꓾ ꓥꓪ ꓠꓬ ꓬꓲ ꓔꓯ ꓑ ꓫꓬ ꓐꓴ ꓐꓱ ꓶ ꓢꓷꓸ ꓙ ꓟꓳ ꓙ ꓢꓴˍ ꓐꓰ꓾ ꓞꓳ ꓫꓵ ꓐꓴ ꓢꓲꓽ ꓒˍ ꓐꓰ ꓙꓵꓽ ꓒ ꓬꓰ ꓠꓹ ꓟ ꓢꓲꓺ ꓚꓰꓸ ꓗꓷꓳ꓿
ꓠꓬꓲ ꓠꓹ꓾ ꓬꓰ-ꓧꓳ-ꓧꓪ ꓠꓴ ꓪꓴ-ꓢ ꓑꓶꓸ ꓓꓴˍ ꓐꓰ꓾ ꓬꓲ-ꓢꓷ-ꓡꓰ ꓐꓴ ꓢꓲ-ꓫꓬ ꓢꓴ ꓑꓶ ꓓꓴ꓾ ꓠꓴ ꓟꓽ ꓢꓷꓸ ꓟ ꓞꓳ ꓫꓵꓽ ꓔꓯ ꓠꓴ ꓘꓴ ꓔꓯꓹ ꓡˍ ꓥꓳ꓿ ꓠꓴ ꓔꓯ ꓟꓽ ꓢꓷꓸ ꓠꓬꓲ ꓟ ꓞꓳ ꓙꓰꓽˍ ꓟꓲ꓾ ꓠꓴ ꓔꓯ ꓔꓷꓹ ꓩꓴ ꓡˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓡꓰ ꓠꓴ ꓔꓯ ꓟꓬꓱ ꓓꓳ ꓖꓶ ꓗꓷꓳ꓿
ꓬꓰ-ꓧꓳ-ꓧꓪ ꓔꓯ ꓧꓪ ꓟꓶ ꓓˍ ꓢꓰ ꓕꓯˍ ꓡꓰ꓾ ꓬꓲ ꓔꓯ ꓧꓪꓺ꓿ ꓬꓲ ꓕꓲ ꓞꓹˍ ꓕꓯˍ ꓡꓰ꓾ ꓬꓲ ꓔꓯ ꓘꓴ ꓓꓰ ꓟꓴꓽ꓿
ꓞꓳ ꓥꓶ ꓠꓬ ꓚꓲ ꓛꓬ ꓙ ꓖꓴ ꓔꓯ ꓧꓹ ꓗꓷ ꓢꓲ꓾ ꓟꓽ ꓙꓲ ꓫꓬ ꓢꓴˍ ꓟꓲ ꓚꓲ ꓛꓬ ꓓꓵ ꓙˍ ꓟ ꓔꓯ ꓡꓳ ꓩꓴ ꓗꓷ ꓢꓲ ꓠꓬꓲ꓾ ꓬꓰ-ꓧꓳ-ꓧꓪ ꓔꓯ ꓬꓲꓼ ꓡꓯ꓿ ꓬꓰ-ꓧꓳ-ꓧꓪ ꓠꓬ ꓬꓲꓸ ꓔꓯ ꓫꓱꓸ ꓤˍ ꓥꓳ꓿ ꓥꓪ ꓠꓴꓽ ꓪꓴ-ꓢ ꓔꓯ ꓬꓲꓼ ꓡ ꓠꓯˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓽ ꓠꓲꓹ ꓡꓳ ꓡꓳˍ ꓡꓰ ꓖꓽ ꓖꓶ ꓥꓳ꓿
ꓬꓰ-ꓧꓳ-ꓧꓪ ꓡꓰ ꓐꓯˍ ꓡꓳ꓾ ꓥꓪ ꓓꓵ ꓙˍ ꓟ ꓠꓬ꓾ ꓠꓴ ꓪ ꓓꓵ ꓙˍ ꓟ ꓟꓽ ꓥ꓾ ꓠꓴ ꓪ ꓚꓱꓹˍ ꓟꓲ ꓥꓪ ꓚꓱ ꓟꓽ ꓥ꓿
ꓮ ꓡꓲꓳ ꓐꓯ ꓠꓬ ꓟꓴ ꓗꓪ ꓠꓬ ꓟꓲ ꓠꓯ ꓢꓶꓸ ꓟꓽ ꓞꓲ ꓟꓴˍ ꓟˍ ꓡꓰ ꓐꓰ꓾ ꓥꓪ ꓚꓱꓹˍ ꓟꓲ ꓠꓴ ꓪ ꓚꓱꓹ ꓢꓶ ꓟꓽ ꓞꓲ ꓟꓴˍ ꓟ ꓥ ꓡꓳ꓿ ꓥꓪ ꓓꓵ ꓙˍ ꓟˍ ꓟꓲ ꓠꓴ ꓪ ꓓꓵ ꓙˍ ꓟ ꓢꓶ ꓟꓽ ꓞꓲ ꓟꓴˍ ꓟ ꓥ ꓡꓳ꓿
ꓮ ꓡꓲꓳ ꓐꓯ ꓠꓬ ꓟꓶ ꓦˍ ꓐꓰ ꓪꓽ ꓠꓬ ꓟꓴ ꓗꓪ ꓗꓪ ꓐꓰ ꓬꓯ ꓡꓰ ꓢꓲ ꓟꓽ ꓚꓱꓹ ꓓꓯ ꓙꓰ ꓙꓰ꓾ ꓟꓲ ꓠꓯ ꓔꓯ ꓠꓱꓺ ꓡꓰ ꓝꓲ ꓢꓲ꓾ ꓣꓱ ꓡ ꓓꓱꓼ ꓡ ꓝꓲˍ ꓟˍ ꓡꓰ ꓐꓰ꓾ ꓫꓵꓸ ꓢꓴ ꓔꓯ ꓬꓲ ꓫꓵꓸ ꓖꓶ ꓡ ꓢꓲ꓾ ꓜꓽ ꓢꓴ ꓔꓯ ꓜ ꓓꓴ ꓖꓶ ꓡˍ ꓟˍ ꓡꓰ ꓐꓰ꓾
ꓥꓪ ꓟꓷ ꓠꓷ ꓗꓪ ꓐꓰ ꓓꓳ ꓙꓰˍ ꓟ ꓥꓪ ꓐꓯ ꓘꓶˍ ꓟꓲ ꓬꓲ ꓖꓳ ꓡꓱ ꓗˍ ꓡꓳ꓿ ꓥꓪ ꓔꓯ ꓬꓲ ꓖꓳꓽ ꓟꓽ ꓚꓱꓹ ꓬꓲꓼ ꓡꓺꓹꓳ꓿ ꓥꓪ ꓠꓲꓹ ꓡꓶ ꓔꓯ ꓬꓰ ꓐꓲ ꓡꓰ ꓝꓲˍ ꓥꓳ꓿ ꓥꓪ ꓐꓯ ꓘꓶ ꓔꓯ ꓝꓲ ꓩꓴ ꓗꓷˍ ꓟ ꓫꓵ ꓪꓴ ꓗꓪˍ ꓟꓲ ꓶꓼ ꓛꓳ ꓡˍ ꓥꓳ꓿
ꓮ ꓡꓲꓳ ꓐꓯ ꓠꓬ ꓠꓴ ꓪ ꓠꓽ ꓗꓹ ꓛꓲ ꓠꓬꓲ ꓐꓰ ꓓꓳ ꓙꓰ ꓢꓲ꓾ ꓢꓲ ꓡꓲ ꓡꓲˍ ꓡꓰꓽ ꓧꓳ ꓙꓰˍ ꓟ ꓟꓶˍ ꓥꓳ꓿ ꓪ ꓙꓵˍ ꓐꓰ ꓪ ꓚꓲ ꓠꓬ ꓠꓴ ꓪ ꓟꓲ ꓙꓬ ꓗꓪ ꓟꓴ ꓖꓪꓽ ꓖꓪ ꓔꓴ ꓡˍ ꓥꓳ꓿ ꓡꓲ ꓛꓲ ꓗꓪ ꓟ ꓢꓲꓹ ꓜꓲ ꓮ ꓙꓵˍ ꓟꓲ ꓡꓯꓼ ꓗꓪ ꓓꓶꓽ ꓥꓳ꓿