kamba hymns Mbathi sya Kumutaia Nga

Hymn 462 NGAI NUE WATW’ĨKĨTHISYE

1
Ngai nue watw’ĩkĩthisye nthĩ ĩno.
Na weekĩie mĩvaka yayo,
Syũmbe syonthe i syĩ nthĩnĩ wayo;
Yeova nue watw’ĩkĩthisye,
ĩtina wa kwĩtw’ĩkĩthya syonthe,
Nĩwoonie kwaĩle mũndũ,
Ethĩwe e mũsũmbĩki wasyo:
Syonthe ila waĩtw’ĩkĩthisye.

2
Twĩna mũvea kwaku Yeova
Nũndũ wa kũtũnenga ũsumbĩ;
Kwĩsumbĩka nthĩ ĩno yaitũ,
ĩla nue watũnengie yo;
Nũndũ woonie yo ĩtwaĩle,
Wamĩvakan’ya yĩthwe yaitũ;
Na wamĩkĩa ũthwii mwingĩ,
Wa mĩthemba yonthe kwondũ witũ

3
Nĩtũũkũvoya ame Yeova,
Kwondũ wa Mũtongoi wa nthĩ ĩno;
ũla ũmwiĩte mbee waitũ,
Mũathime mũno ame Yeova;
Mwongele ũĩ o na ũmanyi,
Mũnenge ũmĩĩsyo mũnene;
Nĩ kana atongoesye andũ,
Ethwe na wendo kwa andũ onthe.

4
Mwongele ĩvinda ya thayũ kũũ nthĩ,
Eanĩsye ũthũkũmi w’onthe,
ũla nĩ w’o we wamũnyuvĩĩe,
Ethĩwe Mũtongoi waitũ,
Mũnenge ũthwĩĩ ndakanyivĩwe,
Nĩ syonthe ila sya kũmwaĩla;
Na ndakolwe nĩ ũkwĩnyivĩsya,
Ame Yeova mũtongoeasye.

5
Mũtongoi waitũ na anini make,
Nĩtũũmanengane mbee wakũ Ngai;
Nĩ kana ũsalũkye metho moo.
Kana mawone ũsumbĩ waku;
Mũsumbĩ waw’o nĩ Yesũ Klĩsto,
Na w’o nĩ wa tene na tene;
ũtheu waku ame Yeova,
Wĩthĩwe ĩũlũ wa kĩla ũmwe.

6
Maitha maitũ matyendeaw’a,
Nĩ ithyĩ twĩsumbĩkĩte nthĩ ĩno,
Ame Yeova tũsũvĩe kwamo;
Na tũsũvĩane na mĩisyo;
Na yĩ makookĩla namo me na
Kĩeleelo kya kũwananga,
ũsumbĩ ũla ũtũnengete;
Ame Yeova tũsũvĩae kwamo.
(Amen)